Winali 26 - Wunta Mempori

Mompesombaako hasilino wita amba-ambano

¹ Tewala mewinsokomo a wita anu Doweeakomu i Ue, Ue Alamu, gagi tia pusakamu, ka upentorokio ka mo'ia i ra'ai,

² asalakono kau alao hasilino wita amba-ambano anu pinumpumu inso a wita anu Doweeakomu i Ue, Ue Alamu. Asalakono kau naao a baki, ka u'amba lumako a mpo'ianga anu tiniso-Do i Ue, Ue Alamu, weweuo kai po'ia nee-Do i ra'ai.

³ Asalakono kau tepohaweakono sando mpesomba anu kongko i tempo atuu, kau potaekono, ”Oleo andio kupauo ndi Ondae i Ue, Ue Alamu, nine mewinso akumo i wita anu dinandi-Do i Ue saru sumpa ndi ondae uempu'uto Ira meweengakono ndi ontae.”

⁴ Ka i'amba sando mpesomba asalakono tumarimao baki atuu inso a ngkaemu ka inaao i arono meda pontunua pesomba ndi Ondae i Ue, Ue Alamu.

⁵ Ka i'amba asalakono omue pauo i aro-Do i Ue, Ue Alamu, kanandio, ”Amaku i ndi'ipua to Arami, asa mia puu mpelakopi. Onae lumako saru tedeikoa mia i wita Masiri ka mo'ia i ra'ai gagi mia hawe. Sine i ra'ai gagi ira asa tongku langkai, moroso ka mehadio ira.

⁶ Tempono to Masiri mebobarasai ka pokonsii kami ka mentena kami mpo'angga anu mobea,

⁷ mpebooli kami ndi Ondae i Ue, Ue Alado uempu'u mami. Dororongeo i Ue pebooli mami ka Dokitao tebobarasai ka masukaraa mami ka pobobarasaido ndi omami.

⁸ Ka i'amba Ondae i Ue wawa kami mpeluarako inso i wita Masiri saru kae-Do anu moroso ka tokia-Do tetaangako, saru mongkokongiria anu langkai ka saru luwuno petondoni ka anu mengkinohali-haliako.

⁹ Dowawa kami a mpo'ianga andio, ka Doweeakami wita andio, asa wita anu hadio ntu'u susu ka siu hoanino.

¹⁰ Onaemo pu'uno, i ndi'ai aku mowawa hasilino wita amba-ambano anu Iweeakakune, oo Ue.” Umarino atuu, asalakono kau naao i aro-Do i Ue, Ue Alamu, ka menggolontu i aro-Do i Ue, Ue Alamu.

¹¹ Omue, to Lewi ka mia hawe i tonga-tongamu memawongko hangano luwuno anu moiko Doweeakomu i Ue, Ue Alamu, ka luwuno ihino rahamu.

Pesomba tia hopulu

¹² Tewala a nta'u ko'otolu, ta'u pesombaa tia hopulu, umari komo me'alao luwuno pesomba tia hopulu inso a hasilino witamu, asalakono imeweeako ira to Lewi, mia hawe, nana'ote nahina amano, ka tuwu beine, ka dompohawe mpongkaa a laro po'iangamu ranta mowohi.

¹³ Asalakono kau pepau i aro-Do i Ue, Ue Alamu, ”Kuluarakonomo pesomba mempori atuu inso i rahaku, kuweeako iramo to Lewi ka a mia hawe, nana'ote nahina amano ka tuwu beine, menunu ntu'u kana parenta anu Iwee'akumo. Nahi kulaloo ke kukolupeo luwuno parenta-Miu atuu.

¹⁴ I tempono kupo'inombo nahi kupongkaa maupo hapa inso a mpesomba mempori atuu, ke moluarako te'asa inso ndi onae tempono kumokoburu, nahi kupopesombaako mbo'u inso ndi onae a mia mate. Sine kurongeo pau-Do i Ue, Ue Alaku, ka weweuo menunu saru luwuno anu Iparentaakume.

¹⁵ Ipensiroiomo inso a mpo'ianga-Miu anu mempori, i laro nsuruga, ka Ironso iramo bawaa-Miu Isaraeli, ka wita anu Iweekamimo, kana anu Idandiomo saru sumpa ndi ondae uempu'u mami, asa wita anu hadio ntu'u susu ka siu hoanino.”

Pau pokotompa mongkona pompaua songka Taura

¹⁶ A oleo andio Ondae i Ue, Ue Alamu parenta komiu meweweuo pompakosi ka atora andio. Petenunumo weweuomo luwuno atuu a tompaano aroamu ka tompaano sumangamu.

¹⁷ Oleo andio imentarimaomo nine Ondaemo i Ue, Ue Alamiu, ka nine komiu mentuwu montonda sala anu tiniso-Do, ka mpe'ini a pompakosi, parenta saru atora-Do, ka mperorongeakono pau-Do.

¹⁸ Oleo andio Dotarima komiumo i Ue nine omiumo bawaa anu pinehohawa-Do, kana anu dinandi-Do ndi omiu, ka asalakono impe'ini a luwuno parenta-Do.

¹⁹ Kanandiomo Ira tumande komiu i wawono luwuno tongku anu pinokogagi-Do, ka igagi inunde-unde, tepalele nee ka pinelangkai. Komiu megagi bawaa anu mempori tia-Do i Ue, Ue Alamiu, kana anu dinandi-Do.