Winali 25 - Wunta Mempori

Pohuku anu nahi mondeeno

¹ Tewala hinao pe'u'uaa i olono ba opia mia, ka domelako a pompaua kara-kara, ka pinau kara-karado kai pinutusi isema anu mentee ka isema anu sala.

² Tewala mia anu sala atuu pototono kai sinepi, asalakono puu mpobitara tumenao kai pe'opo kai sinepi i arono ba tepempia menunu saru salano.

³ Mia atuu moiko i sinepi pepanto pulu, si torea. Tewala onae sinepi torea mbo'u, pepaekompomu ta pinokongkodei i aromu.

⁴ Siponguo ngusuno sapi anu kontongaano monsesa.

Mokombia oleono

⁵ Tewala mia mpepaekompo mpo'ia mperonga-ronga ka asa mia inso ndi ondae mate ka nahi pobinta ana ntama, asalakono kombiano mia anu mate atuu sipetamaako tama anu nahi tewinso pe'etuno. Asalakono pepaekompono tamano mewowaliakono ka i'alao gagi kombiano ka ba kanatuu wineweuomo gau mongkombia oleono.

⁶ Ana aka anu te'ingka pine'anaakono beine atuu asalakono rineke gagi anano pepaekompono anu mate atuu, kasi tampula neeno inso i olodo to Isaraeli.

⁷ Sine, tewala mia atuu nahi behe umalao kombiano pepaekompono, asalakono kombiano pepaekompono atuu lumako a mpewowa langkai kota me'aro ndi ondae mia memota'u, ka ipotae, ”Oleoku nahi behe tumeahakono neeno pepaekompono i olodo to Isaraeli, nahi behe weweuo gau mongkombia oleono saru ongkue.”

⁸ Ka i'amba mia memota'u i kotano, asalakono mpoboio mia atuu ka mpepau saru onae. Tewala kanatuu mpiha sangkino, ka ipotae, ”Nahi kubehe umalao gagi beineku,”

⁹ asalakono kombiano pepaekompono atuu aiwa ndi onae i arodo mia memota'u, lumohuakono sandalano mia atuu inso a ngkaruno, umonuio rupano, kai potae, ”Asalakono kanandiomo iwineweu a mia anu nahi behe mowangu inuleno pepaekompono.

¹⁰ Ka i olodo to Isaraeli asalakono pinau neeno: Suku anu sandalano linohu.”

Wineweu anu penunu

¹¹ Tewala orua mia meu'ua ka kombiano anu asa mia aiwa umpeda ta tumulungio tamano inso a ngkaeno anu tumunduhio, ka beine atuu weroo kaeno kai rakuo anuno mia atuu,

¹² asalakono kau totopio kaeno beine atuu. Si pehohawao.

Pontimba ka ponsa'u anu mentee

¹³ Sihina a laro kadu-kadumiu orua rupa watu pontimba, anu langkai ka anu kodei.

¹⁴ Sihina i laro rahamu orua rupa ponsa'u, anu langkai ka anu kodei.

¹⁵ Asalakono hinao ndi omue watu pontimba anu soompo ka mentee, saru ponsa'u anu soompo ka mentee, kai mentuwu melai i wita anu Doweeakomiu i Ue, Ue Alamu.

¹⁶ Hangano sompo mia anu moweweu kanatuu, anu moweweu molengku, mokoburu-Do i Ue, Ue Alamu.

To Amale asalakono kinolupe

¹⁷ Pewowoloomo hapa anu wineweudo to Amale ndi omue i tempo pelempaamu mpeluarako inso i wita Masiri.

¹⁸ Dotowoki komiu a nsala ka luwuno mia molema a baresi i bungkumiu dosapoi ira, kontongaamiu mokendo ka ntelusa. Nahi domedoitoako Ira Ue Ala.

¹⁹ Tewala Dopoweeakomu i Ue, Ue Alamu rodoa inso a luwuno iwali petengi-tengimu i wita anu Doweeako i Ue, Ue Alamu, kai mpe'ueo gagi tia pusakamu, asalakono oninio pinewowolo ndi Amale inso i totono langi. Sikolupeo!