Winali 24 - Wunta Mempori

Mongkona teposuaa ka pekombiaa

¹ Tewala asa tama mo'ala asa beine ka igagi tamano, sine lembuino nami pekonoo mbo'u beine atuu, hangano ihaweo anu nahi penunu ndi onae. Ka i'amba moburi wunta teponsuaa ka ipeweengakono a ngkaeno beine atuu, ka itenao lumako inso i rahano.

² Beine atuu meluarako inso i rahano ka ilako inso i ra'ai, ka i'amba gagi kombiano mia susua.

³ Tewala tama anu lembuino andio nami behe mbo'u, ka i'amba moburi wunta teposua ka ipeweengakono a ngkaeno beine atuu kai tenao meluakoro inso i rahano, ke ba tama anu lembuino umalao gagi kombiano atuu mate,

⁴ tamano anu amba-ambano, anu umari tumenao lumako atuu, nahi bisa i'alao mbo'u gagi kombiano, umarino sumosa'aio beine atuu. Hangano anu kanatuu mokoburu i aro-Do i Ue. Sipoweweuakono hala a wita anu Doweeakomu i Ue, Ue Alamu, gagi tia pusakamu.

⁵ Tewala da sarai ipo'ala kombiano, siimo ipeluarako merongaako ira sorodadu melako mpetea ke pinopotembiako asa anggaa. Ilarono asa nta'u onae asalakono pinoweeako tempo wanguo somborino ka mokomawongkoo aroano beine anu i'alaomo gagi beineno.

Mongkadudui pe'asa mia

⁶ Simpo'ala pogilia ke watu pogili i wawono gagi pogade, hangano anu kanatuu mo'ala penaano mia gagi pogade.

⁷ Tewala asa mia hinawe mompolaisako asa mia pepaekompono inso i olodo to Isaraeli, ka i'amba weweuo kana ata ke i'asao, asalakono anu mompolaisako atuu mate. Kanatuumo u'oninio anu mosa'o atuu inso i tonga-tongamu.

⁸ Impedagai mongkona a haki kuli anu mesaki ka weweuomo tementee luwuno anu dopaguruakomu sando mpesomba to Lewi. Hapa anu kuparentaa komiu, asalakono impetenunu meweweuo.

⁹ Impewowoloo koa hapa anu wineweu-Do i Ue, Ue Alamu, ndi Miriami i tempo pelempamu meluarako inso i wita Masiri.

¹⁰ Tewala omue mompesaboako hapamokoa a mpe'asa miamu, simpewinso i laro rahano komo'ala pe'inia inso ndi onae.

¹¹ Asalakono upentade i bungkuno, ka mia anu pinoweeako monsabo atuu asalakono meluarako wawao pe'inia atuu ndi omue.

¹² Tewala mia atuu mongkokolaro, sipoturi saru sangka pe'iniano.

¹³ Pokuleomo pe'inia atuu ndi onae i tempono sumoo oleo, kai pokompoturi koa mompake lemba meloeno onaeno ka rumonsoko. Ka omue gagi mentee i aro-Do i Ue, Ue Alamu.

¹⁴ Sipokonsiio mia megadi oleo anu marasai ka mongkokolaro, moiko onae pepaekompomu maupo asa mia hawe i iniamu, i kotamu.

¹⁵ A oleo koa mbo'u atuu, asalakono u'owahio tambono napi sumoo oleo, hangano onae mongkokolaro ka tuwuno momperorohi a tambo atuu. Kasi pebooli ndi Ondae i Ue mongkona omue kai gagi halamu.

¹⁶ Ama kasi hinuku mate hangano anano; ka ana mbo'u kasi hinuku mate hangano amano. Sompo mia asalakono hinuku mate hangano halano onaeno.

¹⁷ Sirontuo tiano mia hawe ka nana'ote nahina amano. Si alao mbo'u sangkano asa mia tuwu beine gagi pegade.

¹⁸ Asalakono kau pewowoloo, nine omue mbo'u i ndi'ipua ata i wita Masiri ka omue Dotolosiko i Ue, Ue Alamu, inso i ra'ai. Onaemo pu'uno kuparentaakomu kau weweuo anu andio.

¹⁹ Tewala sumowiko i leremu, kau tekolupe asa nte'u i lere, siimo upekule umalao; onaemo atuu tiado mia hawe, nana'ote nahina amano ka tuwu beine, ka Doronsoko i Ue, Ue Alamu a luwuno inanggamu.

²⁰ Tewala mo'opuko wuano keu saitumu kau rensuao, siimo imemparesao tepohona mbo'u sampano; onaemo atuu tiado mia hawe, nana'ote nahina amano ka tuwu beine.

²¹ Tewala mopumpuko wuano lere anggoromu, siimo uwali umopuo mbo'u; onaemo atuu tiado mia hawe, nana'ote nahina amano ka tuwu beine.

²² Asalakono kau pewowoloo, nine omue mbo'u i ndi'ipua ata i wita Masiri. Onaemo pu'uno, kuparentako meweweuo luwuno andio.