Winali 23 - Wunta Mempori

Mia anu nahi bisa mewinso a bawaa-Do i Ue

¹ ”Mia anu tepeha wuku nsu'uluino ke anu tetotopi anuno, si dompontonda tepotowoa a bawaa-Do i Ue.

² Asa mia ana i olono sipewinso bawaa-Do i Ue, tendeano maupo inuleno anu kohopulu nahi bisa ipewinso a bawaa-Do i Ue.

³ Asa to Amoni ke to Moabi sipewinso a bawaa-Do i Ue, tendeano maupo inuledo anu kohopulu nahi bisa ipewinso a bawaa-Do i Ue, ranta nahina tampulaano,

⁴ hangano nahi domentotowoakomiu roti ka uwoi i tempono pelempaamiu mpeluarako inso i wita Masiri, ka hangano domentamboo i Bilea anano i Beori inso i Petori i Arami-Mesopotamia umewaiko, kai totonaako.

⁵ Sine Ondae i Ue, Ue Alamu nahi behe rumongeo i Bilea ka Dobaliomo i Ue, Ue Alamu totonaa atuu gagi ronsomu, hangano Dopehohawako iUe, Ue Alamu.

⁶ Asa ntinuwumu si mpompewowoloako ira manangaiado ranta nahina tampulaano.

⁷ Simokoburuako ira to Edomi, hangano onae pepaekompomu. Simokoburuako ira to Masiri, hangano omue mbo'u i ndi'ipua mia hawe i witado.

⁸ Luwuno nana'ote anu hina ndi ondae a inule anu ko'otolu, bisa dompewinso a bawaa-Do i Ue.”

Tahirino pekemaa

⁹ ”Tewala kolumako saru sorodadumu umewaio iwalimu, asalakono komentangkoro a luwuno anu mosa'o.

¹⁰ Tewala hinao i olomu asa tama anu nahi mempori hangano meluarako uwoi anuno i tempono wongi, asalakono ilako i bungkuno pekemaa, ka siimo ipekule mbo'u.

¹¹ Umpeda ngkiniwia asalakono ipedoloako uwoi. Tempono sumoo oleo, onae moiko wali mewinso a mpekemaa.

¹² I bungkuno pekemaa atuu, asalakono hinao ndi omue asa po'ianga ba isua uteta'i.

¹³ I olono parewamu asalakono hinao ndi omue sikopa kodei. Tewala kotumotanda teta'i, asalakono upongkeke bolo mompake sikopa, ka howuio ta'imu.

¹⁴ Hangano Ondae i Ue, Ue Alamu melempa inso i tonga-tongano pekemaamu Ira motolako ka meweengakono iwalimu ndi omue. Asalakono pekemaamu atuu mempori, kasi Dopongkita hapa anu nahi penunu i olomu, ka Dopebungkuiko.”

Ata anu molai

¹⁵ ”Sipeweengakono ndi ueno asa mia ata anu molai ndi omue inso ndi ueno.

¹⁶ Moikokoa ipo'ia saru omue, i tonga-tongamu, a mpo'ianga anu bininikino i asa po'iangamu, anu ipemoikoo; ka sipokonsiio.”

Mo'ewai pebelesua a mpo'ianga mempori

¹⁷ I olodo ana beine Isaraeli sihina belesu a raha mpesombaa lahumoa, ka i olodo ana ntama Isaraeli sihina belesu a raha mpesombaa lahumoa.

¹⁸ Sipowawa doi tambo pebelesua beine ke po'owahi pebelesua tama ia raha-Do i Ue, Ue Alamu, gagi po'ihii asa pontanga, hangano oruano atuu mokoburu-Do i Ue, Ue Alamu.

Simpo'ema anano doi inso a pepaekompo pe'asa tongku

¹⁹ ”Sipompe'anaako doi a pepaekompomu, moiko doi maupo kaanga ke hapamokoa anu pinokompe'ana.

²⁰ Inso a mia hawe moiko impo'ema ana doi, sine inso a pepaekompomu simpo'ema anano doi, ka Doronsoko i Ue, Ue Alamu, a luwuno usahamu i wita anu komewinsokio ka mentorokio.”

Mongkona pontanga

²¹ ”Tewala montangako ndi Ondae i Ue, Ue Alamu, sipotuluo weweuo, hangano manasa Ondae i Ue, Ue Alamu, Ira tumuntuo inso ndi omue, onaemo kai gagi halamu.

²² Sine tewala komba montangako, mongkona atuu komba gagi halamu.

²³ Hapa anu meluarako inso a wiwimu, asalakono petenunu weweuo, hangano po'eheno aroamu montanga ndi Ondae i Ue, Ue Alamu, asa rupa anu pinauno ngangamu.”

Mongkona mo'opu wua anggoro ka bansano gandu i witado mia susua

²⁴ ”Tewala molaloko lere anggorodo pe'asa miamu, moiko upongkaa wuano anggoro po'eheno aroamu, sine sipowinso a laro pontongomu.

²⁵ Tewala molaloko lere gandudo pe'asa miamu anu napi sinowi, moiko upo'opuako kaemu bansa-bansano, sine siponsewo gandudo pe'asa miamu atuu.”