Winali 22 - Wunta Mempori

Montulungi pe'asa

¹ Tewala imengkitao sapi ke bimbano pepaekompomiu tola, si mpo'onde-onde nahi mento'orio. Asalakono impokuleo a mpepaekompomiu atuu.

² Tewala pepaekompomiu atuu nahi umpeda po'iangano inso ndi omiu ka nahi mento'orio, asalakono pinotuwu atuu imewawao i rahamiu. Pinotuwu atuu asalakono ka ipo'ia ndi omiu, ranta ka ihawe pepaekompomiu atuu umungkeo, ka impokuleakono.

³ Kanatuumo asalakono imeweweuo a ngkalideno, kanatuukoa mbo'u imeweweuo a sangkano, kanatuumo imeweweuo a sompo sangkado pepaekompomiu anu tetadi, ka anu hinawemiu. Si mpo'onde-onde nahi mento'orio.

⁴ Tewala imengkitao kalideno pepaekompomiu ke sapino tebangku a nsala, si mpo'onde-onde nahi mento'orio. Asalakono imentulungio pepaekompomiu mewanguakono.

Mperupa-rupa atora

⁵ Asa beine si pesangkaako sangka ntama ka asa tama si pesangkaako sangka beine, hangano sompo mia anu moweweu kanandio mokoburu-Do i Ue, Ue Alamiu.

⁶ Tewala mpohawe komiu a nsala senono manu-manu, a asa keu ke a wita saru anano manu-manu ke su'uluino i larono, ka ineno kontongaano mo'opoti anano ke su'uluino, asalakono si alao ineno atuu meronga saru anano.

⁷ Moikoano ineno atuu, asalakono impotolao, sine anano moiko ime'alao. Tinoono, kai moiko imentuwu ka melai tinuwumiu.

⁸ Tewala da'iaopo impowangu raha, asalakono imewalao dunsino rahamiu, kasi pohaweako pasua rea a rahamiu atuu, tewala hinao mia tedonta inso i wawono.

⁹ Si mporawo a lere anggoromiu orua rupa inii, kasi mansa luwuno wuano, moiko inso a inii anu rinawomiu maupo inso a lere anggoromiu, gagi tiano po'ianga mempori.

¹⁰ Si mpopadeko meronga sapi saru kalide.

¹¹ Si mpesangkaako sangka inso a orua rupa sawu, onaemo wulu bimba ka lena meronga-ronga.

¹² Asalakono impoweweu rawe anu linisu a opaa tapuno lemba meloe tutuwino koroimiu.

Songka pekombiaa

¹³ Tewala asa tama mo'ala kombiano ka mansano mewowaliakono beine atuu, ka i'amba umo'aliaakono,

¹⁴ ka tumuluriakono nahi mentee ka mokomosa'oo neeno, ipotae, ”Beine andio ku'alao gagi beineku, sine mansaku mewowaliakono, nahina kupohawe ndi onae tondonino da ana beine,”

¹⁵ asalakono amano ka ineno beine atuu mopokitao tondonino ana beine atuu da ana beine a luwudo mia memota'u kota a mpewowa langkai.

¹⁶ Amano ana beine atuu asalakono mepau ndi ondae mia memota'u atuu, ”Kuweeakonomo anaku a ntama andio gagi kombiano, ka i'amba umo'aliaakono.

¹⁷ Imento'oriomo nine itulurio moweweu anu nahi mentee, ipotae, ’Nahi kupohawe tondonino da ana beine a anamiu.’ Sine ndiomo tondonino anaku da ana beine.” Ka i'amba asalakono domewileo sawu atuu i arodo luwuno mia memota'u i kota.

¹⁸ Luwuno mia memota'u i kota asalakono me'alao tama atuu, ka domentunduhio,

¹⁹ ka domedendao asa etu sikala salaka. Salaka atuu wineeako a amano ana beine, hangano tama atuu mokomosa'oomo neeno asa ana beine Isaraeli. Beine atuu asalakono gagi mpiha kombiano; asa ntinuwuno tama atuu siteponsuaakono.

²⁰ Sine tewala petuluri atuu mentee ka nahi hinawe tondonino da ana beine,

²¹ asalakono ana beine winawa meluarako i arono pewowa rahano amano. Luwuno tama pe'asa kotano asalakono mewunoakono watu, ranta kai mate, hangano mebelesu i rahano amano. Gagi isosa'ai iramo to Isaraeli. Kanatuumo asalakono ime'oninio anu mosa'o inso i tonga-tongamiu.

²² Tewala asa tama hinawe moturi saru asa beine anu hinao tamano, asalakono orua ira pinepate, tama anu moturi saru beine atuu ka beine mbo'u atuu. Kanatuumo asalakono ime'oninio anu mosa'o inso i olodo to Isaraeli.

²³ Tewala asa beine anu da ana beine ka mesamboraomo, ka itepohaweakono asa tama i kota ka ipoturi saru onae,

²⁴ asalakono orua ira winawa meluarako a mpewowa langkai kota ka imewunoako ira watu, ranta ka domate: hangano ana beine atuu nahi pebooli mepetulungi maupo i kota, hangano tama atuu ipewowaliakonomo kombiano pe'asa miano. Kanatuumo asalakono ime'oninio anu mosa'o inso i tonga-tongamiu.

²⁵ Sine tewala i tonga mpada tama atuu tepotowoakono ana beine anu mesamboraomo, ka idadasio ana beine atuu moturi saru onae, gagi butu tama anu moturi saru ana beine atuu anu asalakono mate.

²⁶ Ana beine atuu simembio-mbioo. Ana beine atuu nahina halano anu pototono hinuku mate. Menteeano kara-kara andio mengkena saru kara-karano asa mia anu sumapoio pe'asa miano ka ipepateo.

²⁷ Hangano tama atuu tepotowoakono i tonga mpada; maupo ipebooli mepetulungi ana beine anu mesamboraomo atuu, sine nahina anu hawe tumulungio.

²⁸ Tewala asa tama tepohawe saru asa beine anu da ana beine ka napi pesambora, ka idadasio ana beine atuu moturi saru onae, ka dohinawe,

²⁹ asalakono tama anu moturi saru ana beine atuu moweeakono lima pulu sikala salaka ndi amano ana beine atuu, ka ana beine atuu asalakono gagi kombiano. Hangano tama atuu umariomo mewowaliakono; asa ntinuwuno tama atuu siteponsuaakono.

³⁰ Asa tama sipo'ala kombiano amano kasi posungke tapuno hawuno amano.