Winali 21 - Wunta Mempori

Pesintuwua a mpompepateano mia anu nahi tino'ori

¹ ”Tewala i wita anu Doweeakomiu i Ue, Ue Alamiu, kai gagi pe'ueamiu, hinawe asa mia tempombole a ntonga mpada mate pinepate, ka nahi tino'ori isema anu mepateo,

² gagi asalakono luwuno mia memota'umiu ka puu mpobitara mpeluarako mesongkao olono lumako a luwuno kota petengi-tengino mia anu pinepate atuu.

³ Ka i'amba luwuno mia memota'u inso i kota anu lalu umpeda saru po'iangano mia anu pinepate atuu, asalakono mpo'ala asa sapi waino anu mongura, anu napi hori pinake, ka anu napi hori morende pasanga.

⁴ Luwuno mia memota'u i kota atuu asalakono mewawao sapi mongura atuu i asa lembono anu wela mpiha me'uwoi ka anu napi hori inangga ke pinorawoi. I ra'ai, i lembono atuu asalakono domempuduo we'uno sapi mongura atuu.

⁵ Luwuno sando mpesomba inuleno to Lewi, asalakono aiwa merangkuhio, hangano ondaemo anu bininiki-Do i Ue, Ue Alamiu, anu mekakaako Ira ka mompowee ronso a nee-Do i Ue. Montonda pomputusidomo sompo kara-kara bela-mobelai, kai pinoko'umari.

⁶ Luwuno mia memota'u inso i kota anu lalu umpeda saru po'iangano mia pinepate atuu, asalakono mewo'ohio kaedo i wawono sapi mongura anu we'uno pinudu i lembono atuu.

⁷ Ondae asalakono ka dompepau, ”Komba kaemami umuwuo rea andio ka nahi kitao matamami.

⁸ Iweweuomo pesintuwua tiado bawaa-Miu Isaraeli anu Itolosi iramo atuu, Ue. Siimo Ipopotembiako ira reano mia anu nahina salano i tonga-tongano bawaa-Miu Isaraeli.” Hangano rea atuu, wineweuomo pesintuwua tiado.

⁹ Kanatuumo imempahihio reano mia anu nahina salano atuu inso i tonga-tongamiu, hangano omiu asalakono mpoweweu hapa anu mentee a pongkita-Do i Ue.”

Beine tinawa anu inala kinombia

¹⁰ Tewala mpeluarako komiu mpetea umewai ira iwalimiu, ka Ondae i Ue, Ue Alamiu meweengako ira a ngkaemiu ka impokogagi ira mia tinawa,

¹¹ tewala mongkitako i olodo mia mentinawa atuu asa beine tekosi, ka inehemu umalao gagi beinemu,

¹² gagi asalakono uwawao i laro rahamu. Beine atuu asalakono kumeruo wuuno, poleo kukuno,

¹³ lumohuo sangka anu pinakeno tempono itinawa, ka ipo'ia i rahamu mengeseio ineno ka amano ilarono asa wula. Umarino atuu, moikoomo pewowaliakono ka gagi tamano, ka onae gagi kombiamu.

¹⁴ Tewala nami upe'eheo mbo'u, asalakono po'ineeo ka ilako po'eheno aroano. Osi'i ntu'u ko'umasao kai inowahiako doi; si weweuo po'eheno aroamu, hangano omuekoa dumadaio kumombiao.

Tiano ana aka

¹⁵ Tewala asa mia hinao orua kombiano, anu asa pinehohawa ka anu asa nahi pehohawao, ka pada ira me'anaakono ana ntama, moiko anu pinehohawa maupo anu nahi pehohawao, ka ana aka onaemo inso a ngkombiano anu nahi pinehohawa,

¹⁶ gagi i tempono ipontia arataano a luwuno anano atuu, anano inso a ngkombiano anu pinehohawa nahi moiko iweeakono ana aka, mokorugio ana inso a ngkombiano anu nahi pinehohawa, onae ana aka.

¹⁷ Sine asalakono imangakuakono ana anu aka, anano inso a ngkombiano anu nahi pinehohawa atuu, kai poweeakono orua ntia inso a luwuno arataano. Hangano onaemo amba-ambano pokomontamano; onaemo anu me'ueo tiano ana aka.

Nana'ote anu buunto

¹⁸ Bara'ura hinao mia anano tama anu nahi pinoko patudu ka umewa, anu nahi behe merorongeakono paudo amano ka ineno. Maupo dotunduhio, nahi perorongeako ira koa mbo'u.

¹⁹ Onaemo asalakono amano ka ineno uminio ka dowawao meluarako lumako a luwudo mia memota'u a mpewowa langkai i kota po'iangado.

²⁰ Ondae asalakono mepau a luwuno mia memota'u i kotano, ”Ana mami andio nahi pinokopatudu ka umewa. Nahi behe merorongeakono pau mami; onae modoko mongkaa ka mo'inu.”

²¹ Ka i'amba luwuno tama pe'asa kotano asalakono mewunoakono watu nana'ote atuu ranta kai mate. Asalakono kanatuumo upahihio anu mosa'o atuu inso i tonga-tongamiu. Luwuno to Isaraeli ira merongeo ka gagi medoito.

Pongkaburua mia anu hinuku mate

²² ”Tewala asa mia moweweu hala anu pototono ihinuku mate, ka i'amba hinuku mate, ka mendoeo a ngkeu pinontade,

²³ si mpo'ineeo wata ngkoroino asa wongi a ngkeu pinontade atuu. Sine, asalakono imengkaburuo a oleokoa mbo'u atuu, hangano asa mia anu ndinoe Dototonaao Ue Ala. Si mengkokoburutio wita anu Doweeakomiu i Ue, Ue Alamiu gagi tia pusakamiu.”