Winali 20 - Wunta Mempori

Songka mpetea

¹ ”Tewala mpeluarako komiu mpetea umewai ira iwalimiu, ka imengkitao ngara ka kareta, sorodadu anu lalu hadio sekono omiu, simedoitoako ira, hangano Ondae i Ue, Ue Alamiu, anu tumaatekomiu mpeluarako inso i wita Masiri, kumongkomikomiu.

² Se'eluno ime'aropio peteaa, asalakono sando mpesomba anu lumako i arono ka ipepau a mpalili.

³ Asalakono ka ipotaeako ira, ’Hei to Isaraeli, imerongeomo! Oleo andio komiu mpo'aropi peteaa umewai ira iwalimiu. Si molema aroamiu, si medoito, si medanggara ka si memondende i arodo.

⁴ Hangano Ondae i Ue, Ue Alamiu, Ondaemo anu melempa kumongkomi komiu kai mpetea umewai ira iwalimiu, ka Doweeakomiu ponangia.’

⁵ Luwuno anu mpo'atora asalakono mpepau a mpalili, kanandio, ’Isema mia anu da'iaopo ipowangu rahano, sine napi po'iangario? Moiko ipekule i rahano, kasi mate a laro mpeteaa ka mia susua anu mo'iangario.

⁶ Isema anu melere lere anggoro, sine napi perapio hasilino? Moiko ipekule i rahano, kasi mate a laro mpeteaa ka mia susua anu merapio hasilino.

⁷ Ka isema anu mesamboraomo saru asa beine, sine napi kombiao? Moiko ipekule i rahano, kasi mate a laro mpeteaa ka mia susua anu kumombiao.’

⁸ Luwuno anu mpo'atora atuu asalakono dompepau mbo'u a mpalili, kanandio, ’Isema anu doito ka molema aroano? Moiko ipekule i rahano, kasi motewe aroado luwuno pepaekompono kana aroano.’

⁹ Mansano luwuno anu mpo'atora umari mpepauako ira palili, asalakono ka dompontiso luwuno petewawa baresi anu tumadulakoi ira sorodadu.

¹⁰ Tewala mporangkuhi komiu asa kota komiu mpetea umewaio, asalakono ime'oluako ira pesintuwu.

¹¹ Tewala itarimao kota atuu pesintuwua ka i'ungkahiakomiu pewowa langkai, asalakono luwuno mia anu mpo'ia i tu'ai mpo'angga dinadai ka megagi atamiu.

¹² Sine, tewala kota atuu nahi behe mesintuwuakomiu, tendeano metea umewai komiu, asalakono imengkaduo.

¹³ Umarino Dopeweengakono i Ue, Ue Alamiu a ngkaemiu, asalakono impepateako ira ponai luwuno palilino anu tama.

¹⁴ Butu luwuno pinoburu moiko beine, ka nana'ote, maupo pinotuwu ka luwuno anu hina i kota atuu, imerontuomo gagi tiamiu. Pinomuru inso a iwalimiu atuu, anu Doweeakomiu i Ue, Ue Alamiu, moiko upakeo.

¹⁵ Kanatuumo asalakono imeweweuo a luwuno kota anu tedoa olai po'iangano inso a mpo'iangamiu, anu nahi tewinso luwuno kotado tongku i ndi'ai.

¹⁶ Sine, inso a luwuno kotado tongku atuudo anu Doweeakomiu i Ue, Ue Alamiu, gagi tia pusakamiu, hapamokoa anu menaa, si po'inee ira mentuwu.

¹⁷ Menteeano imeropu ira luwu, onaemo to Heti, to Amori, to Kana'a, to Perisi, to Hewi, ka to Yebusi, kana anu Doparentaa komiu i Ue, Ue Alamiu.

¹⁸ Tinoono, kasi domempaguru komiu mpoweweu luwuno anu mokoburua ka wineweudo a mpinesombaido susua, ranta kai ntehala ndi Ondae i Ue, Ue Alamiu.

¹⁹ Tewala impeteaakono asa kota, tehine imengkaduo komiu mpete'umalao, si mensolangi ira keuno komiu mpo'ioakono uase. Wuano moiko imengkaano, sine keuno si mentuehio. Nde lano mia ke keu anu ia tonga mpada atuu, ranta kai pototono imengkaduo?

²⁰ Butu luwuno keu anu imento'orio nahi kinaa wuano, moiko imensolangio ka imentuehio weweua wala pongkadu kota anu metea umewai komiu, ranta kai tedonta kota atuu.”