Winali 2 - Wunta Mempori

Pelempaa i pada one

¹ Umarino atuu mpewolili kitamo, mpelungka melako i pada one, te'aro i Tahi Teberau, kana anu pinau-Do i Ue ndi ongkue. Tehine ntu'u tompelempa tumanggolilio Mentorukuno Seiri.

² Ka Do'amba mepau i Ue ndi ongkue, kanandio,

³ ”Tehineomo impelempa mentanggolilio mentorukuno andio. Kanandio-andio impelengkuako i utara.

⁴ Parenta iramo tongku atuu, kanandio: Nami ta tehine komiu mpelempa melaloo wita po'iangaado pepakompomiu, inuleno i Esau anu mpo'ia i Seiri. Ira medoito ndi omiu, sine impetangkoro mpiha.

⁵ Si mensapoi ira, hangano nahi Aku moweeakomiu maupo te'asa pele ngkaru inso a witado. Hangano Mentorukuno Seiri Kuweeakonomo i Esau me'ueo.

⁶ Asalakono kaanga ime'oliakono doi ndi ondae, kai mpohawe koa mpokaa. Asalakono uwoi komiukoa mbo'u me'oliakono doi ndi ondae, kai mpohawe koa mpo'inu.”

⁷ Mentee ntu'u Ondae i Ue, Ue Alamiu rumonso komiu a laro luwuno inanggano kaemiu. Dokongkomi komiu a mpelempaamiu lumaloo pada one anu malua andio. I larono pato pulu nta'u andio Dokongkomi komiu i Ue, Ue Alamiu, ka nahina maupo hapa makuramiu.

⁸ Ka to'amba mpelempa mpotilalo binta ira pepaekompoto inuleno i Esau anu mpo'ia i Seiri, bintao sala inso i Araba-Yarade, mompu'u inso i Elati ka i Esioni-Geberi. Umarino atuu mpelengkuako kita ka tompelempa mpotilalo te'aro i pada one Moabi.

⁹ Ka Do'amba i Ue mepau ndi ongkue, ”Si ewaio Moabi kasi pe'iwaliako ira, hangano nahi Aku moweeakomiu maupo hapa inso a witano gagi pe'ueamiu. Hangano i Ari Kuweeakonomo inuleno i Lo'oti gagi pe'ueano.”

¹⁰ I ndi'ipua to Emimi mpo'ia i ra'ai, aasa tongku anu langkai ka mehadio ira, ondaudo kana to Enaki.

¹¹ Ondae mbo'u atuu dompotae ba to Repaimi, kana teweweuno to Enaki, sine domempauo to Moabi, ondae to Emimi.

¹² I ndi'ipua to Hori mpo'ia i Seiri, sine inuleno i Esau mentorokio witado, iropu ira inso i arono, ka i'amba mo'ia mpiha i ra'ai umeu ira. Teweweu anu mengkena domeweweuo to Isaraeli a wita pine'uedo anu Doweeako ira i Ue.

¹³ ”Kanandio-andio impepatindamo ka imensakiomo Korono Seredi.” Ka to'amba mensakio Korono Seredi.

¹⁴ Mpelempa kita mompu'u inso i Kadesi-Baranea hawe mensakio Korono Seredi, i larono tolu pulu ka oalu nta'u, ranta luwuno sorodadu atuu piingko memate inso a mpekema, kana anu pinau-Do i Ue saru sumpa ndi ondae.

¹⁵ Tendeano kae-Do Ondae-Do i Ue umewai ira ka dontesiarawo inso a mpekemaa, ranta ka dopiingko memate.

¹⁶ Mansano luwuno sorodadu inso a tongku atuu memate iramo luwu,

¹⁷ mepau Iramo i Ue ndi ongkue,

¹⁸ ”A oleo andio komelempa poleio tida wita Moabi, i Ari.

¹⁹ Tewala haweko umpeda a inuleno i Amoni, si ewai ira ka si sapoi ira. Hangano nahi Aku moweeakomu maupo hapa inso a witano inuleno i Amoni gagi pe'ueamu, hangano Kuweeakonomo inuleno i Lo'oti gagi pe'ueano.”

²⁰ Wita mbo'u andio dompotae ba witado to Repaimi. I ndi'ipua to Repaimi mpo'ia i ra'ai, sine dompotae to Amoni, ondae to Samisumimi.

²¹ Ondae aasa tongku anu langkai ka mehadio ira, ondaudo kana to Enaki. Sine Ondae i Ue rumopu ira inso i arodo to Amoni anu mpetorokio witado ka mpo'ia iramo mpiha i ra'ai umeu ira.

²² Mongkona anu wineweu-Do i Ue a inuleno i Esau anu mpo'ia i Seiri, tempono to Hori Doropu ira inso i arodo. Dompetorokio witado to Hori atuu ka dompo'ia mpiha i ra'ai umeu ira hawe kanandio-andio.

²³ To Awi mbo'u anu mpo'ia a luwuno inia hawe i Gasa, doropu ira to Kapitori anu me'inso i Kapitori, ka do'amba to Kapitori atuu mpo'ia mpiha i ra'ai umeu ira.

²⁴ ”Impepatindamo, mpelungka ka imensakiomo Korono Aranoni. Kitaomo Kupeweengakono a ngkaemu i Sihoni, mokole i Hesiboni, to Amori atuu saru witano. Pompu'umo pentorokio wita atuu ka peteaakonomo.

²⁵ I oleo andio Aku mompu'u mompotii a luwuno tongku i asa wawontolino pondendea ka doitoa ndi omiu. Ira merongeo mongkona omiu, ka dompondidi-ndidi ka mpondende hangano omiu.”

Peteaa umewaio i Sihoni, mokole i Hesiboni

²⁶ Umarino atuu montena aku mia inso i pada one Kedemoti lumako ndi Sihoni, mokole i Hesiboni, mohaweo pe'oliwi pesintuwua, kanandio,

²⁷ ”Po'inee akumo melempa telalo i witamiu. Aku koa motilalo melempa tumondao sala langkai, nahi aku pansia i koana ke i manggali.

²⁸ Asaomo kaanga ndi ongkue umeuakono doi, ka kupohawe mongkaa. Wee akumo uwoi aku umeuakono doi, ka kupohawe mo'inu. Butu koa, ehe akumo telalo melempa karu,

²⁹ kana anu wineweudo inuleno i Esau ndi ongkue anu mpo'ia i Seiri ka to Moabi anu mpo'ia i Ari, ranta ka kusakio Koro Yarade, lumako a wita anu Dowee kami i Ue, Ue Ala mami.”

³⁰ Sine i Sihoni, mokole i Hesiboni nahi ehe kita ntelalo i witano, hangano Ondae i Ue, Ue Alamiu weweuo me'ulu watu ka motea aroa, anu tinoo-Do meweengakono a ngkaemiu, kana anu gagi kanandio-andio.

³¹ Ka Do'amba i Ue mepau ndi ongkue, ”Kitaomo, mompu'u Akumo meweengakono i Sihoni ka witano ndi omue. Pompu'umo alao witano gagi pe'ueamu.”

³² Ka i'amba i Sihoni ka luwuno sorodaduno me'aiwa rumangkuhi kita, ka ira mpetea umpeda i Yahasi.

³³ Sine Ondae i Ue, Ue Alato, meweengakono ndi ontae, ranta ka tomenangio saru luwuno anano ka luwuno sorodaduno.

³⁴ I tempo atuu tompoko'alao luwuno kotano ka rumopuo palili sompo kota: tama ka beine saru nana'ote. Nahina maupo te'asa mia anu tompo'ineeo tepotola.

³⁵ Butu pinotuwu anu rinontuto gagi tiato, saru mbo'u pinomuru inso a luwuno kota anu tompoko'alao.

³⁶ Mompu'u inso i Aro'eri i wiwi Korono Aranoni ka kota i lembono atuu hawe i Gileadi, nahina kota anu tedoa moroso tome'aropio. Ondae i Ue, Ue Alato, meweengakono luwu ndi ontae.

³⁷ Butu witado to Amoni anu nahi imerangkuhio, moiko Korono Yaboki asa ngkeu wiwino maupo luwuno kotano i mentorukuno, kanamo anu inonto-Do i Ue, Ue Alato.