Winali 19 - Wunta Mempori

Luwuno kota pepekaduduia

¹ Tewala Dopokotampula iramo i Ue, Ue Alamiu luwuno tongku anu witado Doweeakomiu i Ue, Ue Alamiu, ka impentorokiomo witado saru mpo'ia a luwuno kota ka rahado,

² omiu asalakono mpesusuao otolu kota i wita anu Doweeakomiu i Ue, Ue Alamiu kai mpentorokio.

³ Asalakono pinakosi olaino sala, ka tumiao gagi otolu ntia wita anu Doweeakomiu i Ue, Ue Alamiu, gagi tia pusaka, kai sompo anu mompepate mokompolai a ngkota pepekaduduia.

⁴ Ndiomo atorano mongkona mia mompepate anu molai i ra'ai: onae moiko ikongko tuwu tewala ipompepate pe'asa miano nahi pe'inungako ka nahi o'aliaakono se'eluno.

⁵ Kana, aasa mia lumako a ntobu saru walino ira mobansi keu, mata uase tepotola inso a tangkeno, kai konao walino ranta kai mate. Ka onae moiko ipolai i aasa kota atuu ka kongko tuwu.

⁶ Tinoono, kasi mansa mia ta mombalo, kontongaano mokula aroano, kai luluo mia mompepate atuu, ka hangano olai pelempaano ipokorakoo ka ipepateo. Kahinaano mia mompepate atuu nahi pototono hinuku mate, hangano nahi o'aliaakono se'eluno.

⁷ Onaemo pu'uno kupoweeakomiu parenta, kanandio: otolu kota asalakono impesusuao.

⁸ Tewala Dopokomaluaomo i Ue, Ue Alamiu witamiu, kana anu dinandi-Do saru sumpa ndi ondae uempu'umiu, ka Doweeakomiuomo luwu wita anu pinau-Do, Ira meweengakono ndi ondae uempu'umiu,

⁹ hangano petenunumiu meweweuo parenta anu kupohaweakomiu oleo andio kai pehohawa Ira i Ue, Ue Alamiu, ka mentuwu mpiha montonda sala anu tiniso-Do, asalakono imentiangio otolu kota mbo'u sangkadio anu otolu atuu.

¹⁰ Tinoono, kasi te'uwu reano mia anu nahina salano i wita anu Doweeakomiu i Ue, Ue Alamiu, gagi tia pusaka ka pasua rea metako ndi omiu.

¹¹ Sine, tewala aasa mia umo'aliaakono pe'asa miano, ka ipewuni sumikorio, ka i'amba sumapoio saru tumunduhio ranta kai mate, ka i'amba molai i aasa kota atuu,

¹² asalakono luwuno mia memota'u i kotano mpotena mia umalao inso i ra'ai. Umarino atuu asalakono dompeweengakono a mia anu motuntu pasua rea, kai mate.

¹³ Si haweako aroamiu mpehohawao. Kanatuumo imempahihio reano mia anu nahina salano inso i Isaraeli, kai moikokoa imentuwu.

Tida wita

¹⁴ Si mpopahe tida witano pe'asa miamiu anu pinakosido mia ntese'elu a ntia pusaka anu komiu mpe'ueo i wita anu Doweeakomiu i Ue, Ue Alamiu, gagi pe'ueamiu.

Songka mongkona sakosii

¹⁵ Tewala butu asa mia sakosii nahi pokokalakio asa mia mongkona sala ke hala hapamo koa anu bara'ura iweweuo. Butu anu pinauno orua ke otolu mia sakosii, kara-kara atuu tinarima.

¹⁶ Tewala asa mia sakosii mosa'o kumalakio aasa mia kai tuluriakono mongkona asa pe'ewa,

¹⁷ onaemo orua mia anu mekara-kara atuu asalakono mentade i aro-Do i Ue, i arodo luwuno sando mpesomba ka puu mpobitara anu kongko i tempo atuu.

¹⁸ Luwudo puu mpobitara atuu asalakono paresao temoiko. Tewala mengkaa sakosii atuu asa mia sakosii megaupi anu mekalakiako anu nahi mentee a mpepaekompono,

¹⁹ ka omiu asalakono meweweuo kana'umpe tinoono mokoko'iio pepaekompono. Kanatuumo asalakono impokotampulao anu mosa'o inso i tonga-tongamiu.

²⁰ Ka do'amba mia susua ira merongeo ka gagi medoito, ranta nahi ira mpoweweu mbo'u wineweu mosa'o kanatuu i tonga-tongamiu.

²¹ Si haweako aroa pompehohawamiu, hangano pinolempa songka: penaa me'eu penaa, mata me'eu mata, ngisi me'eu ngisi kae me'eu kae, karu me'eu karu.