Winali 18 - Wunta Mempori

Pohaweado sando mpesomba ka to Lewi

¹ Luwuno sando mpesomba to Lewi, tendeano luwuno suku Lewi, nahi ira mpohawe tia pusaka meronga to Isaraeli. Ondae moiko dompongkaa pesomba anu tinunuako api tia-Do i Ue ka hapa anu gagi tia-Do.

² Ondae nahi ira mpohawe tia pusaka i olono pepaekompodo. Ondaemo i Ue tia pusakado, kana anu dinandi-Do ndi ondae.

³ Ndiomo tiado sando mpesomba inso a bawaa, inso ndi ondae anu mpopesombaako pesomba sinumbele, moiko sapi maupo bimba: pa'a i arono, orua aseno, ka kompo tongono, asalakono wineeako sando mpesomba.

⁴ Hasilino amba-ambano inso a gandumiu, anggoro ka lanamiu, saru wulu ginonti amba-ambano inso a bimbamiu, asalakono imeweeakono.

⁵ Hangano onaemo anu bininiki-Do i Ue, Ue Alamiu inso a luwuno sukumiu, kai pentade mompekakaako a nee-Do i Ue, onae ka anano saru ana'ueno ranta nahina tampulaano.

⁶ Tewala asa to Lewi hawe inso i kota isuamokoa i Isaraeli, po'iangano gagi mia hawe, ka saru tompaano sumangano mewinso a mpo'ianga anu Ira binikio i Ue,

⁷ moiko ipompekakaako a nee-Do i Ue, Ue Alano, mengkena kana luwuno pepaekompono, to Lewi, anu mpentade i ra'ai i aro-Do i Ue.

⁸ Ondae asalakono mpohawe tia kaanga anu mengkena, nahi rineke hapa anu hinaweno inso a mpo'asaa arataado uempu'uno.

Pepo'onto mompekaria tino'ori

⁹ Tewala mpewinso komiumo a wita anu Doweeakomiu i Ue, Ue Alamiu, si mpepaguru mpoweweu anu mokoburu kana anu wineweudo luwuno tongku atuu.

¹⁰ Si hina maupo te'asa mia hinawe i olomiu anu mompesombaako anano tama ke beine gagi pesomba a laro api, ke asa mia anu gagi sando mpoto'ori, puu pompau anu ta gagi, puu mpopau ura ke rugino mia, mpebali-bali mata,

¹¹ puu mpobasa-basa tino'ori, ke maupo asa mia anu mesikeno a onitu mia mate, ke anu mo'ema pontiso a mia mate.

¹² Hangano sompo mia anu moweweu mongkona luwuno atuu, onaemo mokoburu-Do i Ue, ka hangano luwuno anu mokoburu atuu, Dosaari ira i Ue, Ue Alamiu inso i aromiu.

¹³ Asalakono imentuwu nahina tataano i aro-Do i Ue, Ue Alamiu.

Nabi tinena-Do i Ue

¹⁴ Lano, luwuno tongku anu witado komiu mpentorokio andio mpoperorongeeako puu mpopau anu ta gagi ke mia mpoto'ori, sine Ondae i Ue, Ue Alamiu, nahi Do'eheakomiu mpoweweu anu kanatuu.

¹⁵ Asa nabi inso i tonga-tongamiu, inso i olodo pepaekompomiu, kana ongkue andio, Ira tumenao i Ue, Ue Alamiu. Onaemo anu asalakono komiu merongeo.

¹⁶ Mongkona andio menunu saru anu inemamiu i ndi'ipua ndi Ondae i Ue, Ue Alamiu, i torukuno Hore, ia oleo pepumpua, ka impotae, ”Po'ineeomo nami kurongeo mbo'u pepau-Do i Ue, Ue Alaku, ka api anu langkai andio nami kukitao mbo'u, kasi kumate.”

¹⁷ Ka Do'amba i Ue mepau ndi ongkue, ”Hapa anu pinaudo atuu moiko.

¹⁸ Asa nabi Aku tumenaako ira i olono pepaekompodo, kana ongkue andio. Aku numaao pau-Ku a laro ngangano, ka onae ta pauako ira luwuno anu Kuparentaakono.

¹⁹ Tempono aasa mia nahi perorongeakono pau-Ku anu pinohaweno nabi atuu a nee-Ku, Aku tumuntuo ka isusuruo.

²⁰ Sine asa nabi anu kowee-wee mompohawe a nee-Ku, pau anu nahi Kuparentaakono kai pohaweo, ke anu mepau a neeno anu pinesombai susua, nabi atuu asalakono mate.”

²¹ Bara'ura komiu mpotae i laro aroamiu, ”Kana'umpe kami mento'orio pau anu nahi Dopauo i Ue?”

²² Tewala asa nabi mepau a nee-Do i Ue ka pinauno atuu nahi gagi ka nahi mengkaa, onaemo atuu pau anu nahi Dopauo i Ue. Nabi atuu kowee-weeomo mompohawe, si medoitoakono.