Winali 17 - Wunta Mempori

¹ ”Si mpesombaakono ndi Ondae i Ue, Ue Alamiu, sapi ke bimba anu hinao tataano, ke maupo hapa anu nahi moiko. Hangano anu kanatuu onaemo mokoburu-Do i Ue, Ue Alamiu.”

Pohuku mate a mia mompesombai lahumoa

² ”Bara'ura i olomiu, i aasa kota anu Doweeakomiu i Ue, Ue Alamiu, hinawe asa mia tama ke beine anu moweweu hapa anu mosa'o a pongkita-Do i Ue, Ue Alamiu, saru luminggeio pedandia-Do.

³ Mia atuu lumako mesomba a luwuno anu pinesombai susua ka menggolontu mesomba ndi onae, ke a mata oleo ke a wula ke a luwuno sorodadu i langi, mongkona anu Ku'ontoomo atuu.

⁴ Tewala mongkona atuu pinauako ndi omiuke imerongeo, asalakono imemparesao temoiko. Tewala mentee ntu'u ka manasaomo nine anu mokoburu atuu wineweu i Isaraeli,

⁵ asalakono imewawao tama ke beine anu moweweuomo wineweu mosa'o atuu meluarako a mpewowa langkai kota. Ka i'amba tama ke beine atuu asalakono winunoako watu ranta kai mate.

⁶ Pompaudo orua ke otolu mia sakosii, mia anu hinuku mate asalakono kai mate; siimo ihinuku mate butu pompauno asa mia sakosii.

⁷ Kaedomo luwuno sakosii atuu anu amba-ambano humuku mateo, domentondao luwuno palili. Kanatuumo asalakono impokotampulao anu mosa'o inso i olomiu.”

Pekara-kara anu lalu i wawono

⁸ Tewala asa kara-kara pekalatia i kotamiu impemotungkoo lahi memputusio, kana mompepate-pinepate, motuntu-tinuntu, ke mobelai-binelai, asalakono imelako mpe'aro a mpo'ianga anu Ira binikio i Ue, Ue Alamiu.

⁹ Asalakono imelako ndi ondae luwuno sando mpesomba, to lewi atuu, ka ndi puu mpobitara anu kongko i tempo atuu. Asalakono impesikeno ka ira mempauakomiu pomputusino songka.

¹⁰ Ka i'amba omiu asalakono meweweuo montonda pinutusi anu pinaudo ndi omiu inso a mpo'ianga anu Ira binikio i Ue. Asalakono impetenunu meweweuo luwuno anu dotisoakomiu.

¹¹ Montonda pontiso anu doweeakomiu ka montonda pinutusi anu pinaudo ndi omiu, asalakono imeweweuo. Si mepansia i koana ke i manggali inso a pinutusi anu pinaudo ndi omiu.

¹² Mia anu kowee-wee ka nahi perorongeakono pauno sando mpesomba anu mentade i ra'ai gagi puu mpopekakaako-Do i Ue, Ue Alamiu, ke maupo pauno puu mpobitara, manasa mia atuu mate. Kanatuumo asalakono impokotampulao anu mosa'o inso i Isaraeli.

¹³ Ka luwuno tongku atuu ira merongeo ka gagi medoito ka nahi ira mengkowee-wee mbo'u.

Songka mongkona mokole

¹⁴ Tewala mpewinso komiu ia wita anu Doweeakomiu i Ue, Ue Alamiu, ka impentorokio, saru mpo'ia i ra'ai, ka i'amba mpotae, ”Aku mompotoro mokoleku, kana luwuno tongku petengi-tengiku,”

¹⁵ ka butu mokole anu bininiki-Do iUe, Ue Alamu, anu moiko upotoroo. Inso i olodo pepaekompomu asalakono impotoroo mokolemiu, sine si mpompotoro mia hawe anu komba pepaekompomiu.

¹⁶ Polomokoa, mokole atuu si pokohadioo ngarano ka siwawa ira tongku andio mpekule i wita Masiri kai pohawe hadio ngara, hangano mepau Iramo i Ue ndi omiu, ”Osi'i ntu'u impekule lumaloo mbo'u sala andio.”

¹⁷ Kasi tiangio hadiono kombiano, kasi pansia aroano. Osi'i mbo'u ipokohadioo lahi wulaano ka salakano.

¹⁸ Tewala onae mentoro a ngkadera poparentaa, asalakono iburio tiano polimbano songka andio montonda wunta anu kongko ndi ondae luwuno sando mpesomba, to Lewi.

¹⁹ Wunta atuu asalakono kongko i horino ka asalakono ibasao asa ntinuwuno, kai pepaguru doitoako Ira i Ue, Ue Alano, me'ini a luwuno songka ka pompakosi andio, kai weweuo.

²⁰ Bakanatuu, nahi ta mompelangka-langkai a luwuno pepaekompono ke pansia inso a parenta atuu i koana ke i manggali, kai tehine ipoparenta, onae, ka anano saru ana'ueno i tonga-tongado to Isaraeli.