Winali 16 - Wunta Mempori

Otolu oleo langkai pinesusua

¹ Impelangkaio wula Abi kai merame-rameo Pasa tia-Do i Ue, Ue Alamiu, hangano i larono wula Abi atuumo Dowawa komiu i Ue, Ue Alamiu mpeluarako inso i wita Masiri i tempono wongi.

² Asalakono imposumbele asa bawaa bembe bimba ka sapi gagi pesomba Pasa tia-Do i Ue, Ue Alamiu, a mpo'ianga anu Ira binikio i Ue kai po'ia nee-Do i ra'ai.

³ Si mpokaa hapa anu meragi saru onae. I larono opitu oleo omiu asalakono kai mpokaa roti nahi peragi, roti marasaia atuu, hangano mpodadusi komiu impeluarako inso i wita Masiri. Bakanatuu, asa ntinuwumiu komiu nterorambe ia oleo peluarakoamiu inso i wita Masiri.

⁴ Si hina ragi hinawe ndi omiu a luwuno po'iangamiu i larono opitu oleo; ka inso a bauno pinotuwu anu sinumbele ngkiniwia oleo amba-ambano, si menaao hawe mo'oru.

⁵ Si mpopesombaako pesomba Pasa i luwuno kota anu Doweeakomiu i Ue, Ue Alamiu,

⁶ sangkadio a mpo'ianga anu Ira binikio i Ue, Ue Alamiu, kai po'ia nee-Do. I ra'aimo asalakono impesombaakono pesomba Pasa atuu i tempono ngkiniwia, sumoomo oleo, ikonaio saru tempo impeluarako inso i wita Masiri.

⁷ Asalakono imenahuo ka imengkaano a mpo'ianga anu Ira binikio i Ue, Ue Alamiu. Tisomono mo'oru impekulemo a ngkemamiu.

⁸ I larono onoo oleo asalakono impongkaa roti nahi peragi. Ia oleo ko'opitu, asalakono kai hinakoa pepumpua langkai ndi Ondae i Ue, Ue Alamiu, si mpo'angga maupo anggaa hapamokoa.

⁹ Asalakono imedoao opitu minggu. Mompu'u inso tempono imponsewo gandu anu napi sinewo, asalakono imedoao opitu minggu atuu.

¹⁰ Umarino atuu kai merame-rameo oleo langkai Opitu Minggu ndi Ondae i Ue, Ue Alamiu, saru mpesomba a moleono aroa anu komiu mpeweengakono, menunu saru ronso anu Doweeakomiu i Ue, Ue Alamiu.

¹¹ Imemawongkomo i aro-Do i Ue, Ue Alamiu, omiu saru anamiu tama ka beine, atamiu tama ka beine, to Lewi anu i kotamiu, saru mbo'u mia hawe, nana'ote anu nahina amano ka tuwu beine anu i tonga-tongamiu. Imemawongkomo a mpo'ianga anu Ira binikio i Ue, Ue Alamiu, kai po'ia nee-Do i ra'ai.

¹² Asalakono impewowoloo, nine maupo omiu i ndi'ipua ata i wita Masiri, ka impetenunumo meweweuo pompakosi andio.

¹³ Oleo langkai Laika Lewe ngkeu asalakono imerame-rameo i larono opitu oleo, umarimiu mepumpuo hasili inso a mposesaa ka a mpomporo'iamiu.

¹⁴ Imemawongkomo a oleo langkaimiu atuu, omiu saru anamiu tama ka beine, atamiu tama ka beine, to lewi, saru mbo'u mia hawe, nana'ote anu nahina amano, ka tuwu beine anu i kotamiu.

¹⁵ Ilarono opitu oleo asalakono impoweweu rame-rame melangkai Ira i Ue, Ue Alamiu, a mpo'ianga anu Ira binikio i Ue. Hangano Ondae i Ue, Ue Alamiu, Ira rumonso komiu a luwuno sinowimiu, ka luwuno anu inanggano kaemiu, ranta kai polio memawongko ntu'u.

¹⁶ Pentolu asa nta'u luwuno tama i olomiu asalakono mesomba i aro-Do i Ue, Ue Alamiu, a mpo'ianga anu Ira binikio, onaemo a oleo langkai Roti Nahi Peragi, oleo langkai Opitu Minggu ka oleo langkai Laika Lewe ngkeu. Si dompesomba i aro-Do i Ue butu moa ngkae,

¹⁷ sine singge mia saru pesomba a ngkaeno, menunu saru poronso anu Doweeakomiu i Ue, Ue Alamiu.

Pekara-karaa anu mentee

¹⁸ Luwuno puu mpobitara ka luwuno anu mpo'angga ndi ondae, asalakono potoro ira i luwuno kota anu Doweeakomiu i Ue, Ue Alamiu, montonda luwuno sukudo. Ondae asalakono mpopau kara-karado tongku atuu saru pomputusi anu mentee.

¹⁹ Si mpoposule moleoa kasi mpobiniki mia. Osi'i mbo'u impotarima pompowee nahi moleo, hangano pompowee nahi moleo mokomorawuo matano mia pande mompewowolo ka momposule kara-karano mia mentee.

²⁰ Moleoa, butukoa moleoa anu asalakono ime'ungkeo, kai mentuwu ka mpe'ueo wita anu Doweeakomiu i Ue, Ue Alamiu.

Mperupa-rupa pepo'onto

²¹ Si mpopaho keu gagi karuno lahumoa i horino meda pontunua pesomba ndi Ondae i Ue, Ue Alamiu, pontunua pesomba anu komiu meweweuo tiamiu.

²² Osi'i mbo'u impowangu tugu lahumoa, hangano mongkona atuu Do'o'aliaakono i Ue, Ue Alamiu.