Winali 14 - Wunta Mempori

Gau po'inombo anu inonto

¹ Omiumo ana-Do i Ue, Ue Alamiu; si mensosorekio koroimiu ke mengkeruo wuu i wawono ra'imiu hangano mateno asa mia.

² Hangano omiumo bawaa anu mempori tia-Do i Ue, Ue Alamiu, ka omiu bininiki-Do i Ue kai megagi bawaa pinehohawa-Do inso i olono luwuno tongku anu i wawontolino.

Kondehora nahi mokoburu ka anu mokoburu

³ Si mpongkaa maupo hapa anu gagi mokoburua.

⁴ Ndiomo luwuno kondehora anu moiko imengkaano: sapi, bimba, ka bembe;

⁵ rusa, lagiwa, rusa dandi, bembe ntobu, lagiwa i torukuno, sapi ntobu ka bimba ntobu.

⁶ Sompo kondehora anu mekuku tebansi, kukuno me'olo ondau gagi orua, ka anu wali mongai kaangano i olono kondehora, moiko imengkaano.

⁷ Sine, ndiomo anu si mengkaano inso i olono anu wali mongai kaangano ke inso i olono anu tebansi ka me'olo kukuno: unta, kelinci ntobu, ka maramoti. Hangano, luwuno atuu lano wali mongai kaangano, sine nahi tebansi kukuno; luwuno atuu mokoburu ndi omiu.

⁸ Boe mbo'u mokoburu ndi omiu, hangano boe kukuno tebansi, sine nahi wali mongai kaangano. Bauno luwuno kondehora atuu si mengkaano ke medanggio wata ngkoroino.

⁹ Ndiomo anu moiko imengkaano inso a luwuno anu tuwu i laro uwoi; luwuno anu melowiri ka mekaransa moiko imengkaano.

¹⁰ Sine luwuno anu nahi pelowiri ka mekaransa si mengkaano; luwuno atuu mokoburu ndi omiu.

¹¹ Sompo manu-manu anu nahi mokoburu moiko imengkaano.

¹² Sine si mengkaano: manu-manu rajawali, singko medanggo ka singko a ntahi;

¹³ singko motaha, singko mo'ito, ka dunggurio mperupa-rupa tadeno;

¹⁴ sompo tadeno manu-manu paa-paa;

¹⁵ manu-manu unta, koa, samari ka mperupa-rupa tadeno singko sikapi;

¹⁶ manu-manu koa kodei, koa langkai, koa mopute;

¹⁷ undani, singko eringi, ka dendangi uwoi;

¹⁸ timba'u, ka mperupa-rupa manu-manu koro, meragai, ka poneki.

¹⁹ Luwuno mbo'u kondehora mpehowu anu mepani, onae mbo'u anu mokoburu ndi omiu; si mengkaano.

²⁰ Luwuno manu-manu anu nahi mokoburu, moiko imengkaano.

²¹ Si mpongkaa maupo wata ngkoroi maupo hapa, sine moiko iweeako ira mia mehawe ikita miu ka domengkaano ke moiko i me'asao a mia hawe. Hangano, omiumo bawaa anu mempori ndi Ondae i Ue, Ue Alamiu. Si menahuo ana bembe a laro uwoi uono ineno.

Atora mongkona pesomba tia hopulu

²² Asalakono imponsiao tia hopulu inso a luwuno wuano inii anu tuwu i leremiu, sompo ta'u.

²³ I aro-Do i Ue, Ue Alamiu, a mpo'ianga anu Ira binikio kai po'ia nee-Do i ra'ai, asalakono imengkaano tia hopulu inso a gandu, anggoro, ka lanamiu, ka mbo'u ana amba-ambano sapi ka asa bawaa bembe bimbamiu, kai mpepaguru doitoako Ira mpiha i Ue, Ue Alamiu.

²⁴ Bara'ura, sala lumako i tu'ai impe'olaio lahi ranta nahi mpokowawao luwu, hangano Ondae i Ue, Ue Alamiu rumonsokomiu ka po'ianga anu bininiki-Do i Ue, Ue Alamiu mokomengkaao nee-Do i ra'ai olai lahi inso ampo'iangamiu.

²⁵ Asalakono impokogagio doi ka mewawao doi atuu a ngkaemiu ka i'amba melako a mpo'ianga anu ta bininiki-Do i Ue, Ue Alamiu.

²⁶ Impe'oliakonomo doi atuu a luwuno anu ineheno aroamiu, ia nsapi ke a asa bawaa bembe bimba, a anggoro ke inua anu mompokomolangu, ke hapamo koa anu ineheno aroamiu, ka i'amba mpongkaa i ra'ai i aro-Do i Ue, Ue Alamiu, ka memawongko, omiu, ka luwuno ihino rahamiu.

²⁷ Kasi kolupe ira to Lewi i kotamiu, hangano ondae nahi mpohawe tia pusaka meronga saru omiu.

²⁸ Sompo pokotompaano otolu nta'u asalakono imewawao luwuno tia hopulu inso a hasilino witamiu a nta'u atuu ka imenaao i kotamiu.

²⁹ Hangano to Lewi nahi dompohawe tia pusaka meronga saru omiu, ira me'aiwa saru mia hawe, nana'ote nahina amano ka tuwu beine i kotamiu, ka do'amba mpongkaa mowohi. Ba kanandio Ira rumonsokomiu i Ue, Ue Alamiu, a luwuno inanggano kaemiu.