Winali 12 - Wunta Mempori

Tepumpuano Songka Winali 12–26 Asa po'ianga pesombaa

¹ ”Ndiomo pompakosi ka atora anu asalakono impetenunu meweweuo i wita anu Doweeakomiu i Ue, Ue Alado uempu'umiu kai mpe'ueo, asa ntinuwumiu i wawontolino i wita atuu.

² Asalakono imeropu ira ntu'u luwuno po'ianga pesombaa anu pinesombaido tongku anu liniahakomiu atuu, moiko a ntorukuno ondau, a pongku wita ka i totono sompo keu anu marombo.

³ Meda pontunua pesombado asalakono impobangkuo, luwuno tugu lahumoado imempurokio, luwuno karu lahumoado imentunuo luwu, luwuno tinaha anu pinesombaido i mperawo-rawo ira, ka needo imempahihio inso a mpo'ianga atuu.

⁴ Si mpoweweu kanatuu ndi Ondae i Ue, Ue Alamiu.

⁵ Sine, asalakono komiu me'ungkeo po'ianga Ira binikio i Ue, Ue Alamiu, inso a luwuno sukumiu gagi po'ianga-Do mokomengkaao nee-Do i ra'ai. I ra'aimo asalakono imelako.

⁶ Asalakono imewawao i ra'ai pesomba tinunu ka pesomba sinumbelemiu, pesomba tia hopulu ka pesomba pinesusua, pesomba pontanga ka pesomba moleono aroamiu, luwuno ana amba-ambano sapimiu ka asa bawaa bembe bimbamiu.

⁷ I ra'aimo imengkaano i aro-Do i Ue, Ue Alamiu, ka memawongko, omiu ka pe'asa rahamiu, hangano a luwuno inanggano kaemiu Doronsoo i Ue, Ue Alamiu.

⁸ Si mpoweweu maupo hapa anu wineweuto i ndi'ai kanandio-andio, onaemo singge mia moweweu hapa anu pinementeeno.

⁹ Hangano ranta kanandio-andio naapo imehawe a mpo'ianga penaa-naaa ka tia pusaka anu Doweeakomiu i Ue, Ue Alamiu.

¹⁰ Sine komiu mensakio koro Yarade ka mpo'ia i wita anu Doweeakomiu i Ue, Ue Alamiu, kai mpe'ueo, ka Ira moweeakomiu rodoa inso a luwuno iwali petengi-tengimiu, ranta ka impo'ia manangai.

¹¹ Ka i'amba a mpo'ianga anu bininiki-Do i Ue, Ue Alamiu, weweuo nee-Do ka ipo'ia i ra'ai, asalakono imewawao luwu anu kuparentaa komiu: pesomba tinunu ka pesomba sinumbele, pesomba tia hopulu ka pesomba pinesusuamiu, ka luwuno pesomba pontangamiu anu tebiniki, anu tinangamiu ndi Ondae i Ue.

¹² Asalakono imemawongko i aro-Do i Ue, Ue Alamiu, omiu saru anamiu tama ka beine, atamiu tama ka beine ka to Lewi i kotamiu, hangano to Lewi nahi dompohawe tia pusaka meronga saru omiu.

¹³ Impope'inandaimo, kasi mpopesombaako luwuno pesomba tinunumiu a mondeeno po'ianga anu kinitamiu.

¹⁴ Sine, a mpo'ianga anu bininiki-Do i Ue i witado asa i olono sukumiu, i ra'aimo asalakono impesombaakono pesomba tinunumiu. I ra'aimo asalakono imeweweuo luwuno anu kuparentaa komiu.

¹⁵ Sine, moiko imposumbele ka mpongkaa bau po'eheno aroamiu, menunu saru poronso-Do i Ue, Ue Alamiu, anu Doweeakomiu a luwuno kotamiu. Moiko ikaano mia mokoburu ke mia morina, kana mongkaa bau lagiwa ke rusa.

¹⁶ Butumokoa reano si mengkaano, sine asalakono ime'uwuo a wita kana uwoi.

¹⁷ I kotamiu nahi mpongkaa moiko pesomba tia hopulu inso a gandu, anggoro, ka lanamiu, ke ana amba-ambano sapi ka asa bawaa bembe bimbamiu, ke asa inso a mpesomba anu komiu mpotangaako, ke mpesomba a moleono aroa, ke pesomba pinesusuamiu.

¹⁸ Sine, asalakono imengkaano i aro-Do i Ue, Ue Alamiu, a mpo'ianga anu Ira binikio i Ue, Ue Alamiu, omiu saru anamiu tama ka beine, atamiu tama ka beine, ka to Lewi anu i kotamiu. Komiu memawongko i aro-Do i Ue, Ue Alamiu, hangano luwuno anu inanggano kaemiu.

¹⁹ Impope'inandaimo, kasi mengkulupe ira to Lewi, i larono impo'ia i witamiu.

²⁰ Tewala Dopokomaluaomo i Ue, Ue Alamiu witamiu, kana anu dinandi-Do ndi omiu ka impopewowolo, ’Ineheku mongkaa bau,’ hangano mingkiko ntu'u mongkaa bau, impongkaa bau po'eheno aroamiu.

²¹ Tewala po'ianga anu Ira binikio i Ue, Ue Alamiu ka mokomengkaao nee-Do i ra'ai, olai lahi inso a mpo'iangamiu, onae moiko imposumbele sapi ka asa bawaa bembe bimba anu Doweeakomiu i Ue, kana anu kuparentaakomiu, ka imengkaano bauno i kotamiu po'eheno aroamiu.

²² Moiko impongkaa bauno, kana impongkaa bauno lagiwa ke bauno rusa; moiko ikaano mia mokoburu maupo mia morina.

²³ Sine, impedagai temoiko, kasi mpongkaa reano, hangano rea onaemo penaa. Si mpongkaa penaa meronga saru bau.

²⁴ Si mengkaano; asalakono ime'uwuo a wita kana uwoi.

²⁵ Si mengkaano, kai moiko tumuwumiu ka inulemiu lembunino, hangano mpoweweu komiu hapa anu mentee a pongkita-Do i Ue.

²⁶ Sine pesomba memporimiu anu kongko ndi omiu ka pesomba pontangamiu asalakono imewawao a mpo'ianga anu Ira binikio i Ue.

²⁷ Asalakono imempatindao pesomba tinunumiu, moiko bau maupo reano, i wawono meda pontunua pesomba ndi Ondae i Ue, Ue Alamiu, sekono reano pesomba sinumbelemiu asalakono inuwu a wawo meda pontunua pesomba ndi Ondae i Ue, Ue Alamiu, sine moiko imengkaano bauno.

²⁸ Imperorongeakonomo temoiko luwuno anu kuparentaakomiu, kai moiko tumuwumiu ka inulemiu lembuino ranta nahina tampulaano, ba mpoweweu komiu anu moiko ka mentee a pongkita-Do i Ue, Ue Alamiu.”

Pepopoto'ori a mpesombaa lahumoa ka pesombaa nahi mentee

²⁹ Tewala Dopokoropuomo i Ue, Ue Alamiu inso i aromiu luwuno tongku anu witado impewinsokio ka impetorokio, tewala imeliahako iramo ka mpo'ia i witado,

³⁰ asalakono impope'inandai. Kasi mengkona oho ka tumonda ira, umarido merinopu inso i aromiu. Kasi mpesisikeno mongkona anu pinesombaido kai mpotae, ”Kana'umpe dompesomba luwuno tongku andio a anu pinesombaido? Ongkue mbo'u ineheku moweweu kanatuu.”

³¹ Si mpoweweu kanatuu ndi Ondae i Ue, Ue Alamiu. Hangano, luwuno anu gagi mokoburu-Do i Ueka Do'o'aliaakono, onaemo wineweudo a anu pinesombaido. Tendeano anado tama ka beine domentunuo ia api tiano anu pinesombaido.

³² Luwuakoano anu kuparentaa komiu asalakono impetenunu meweweuo, si mentiangio ke mengkurangio.