Winali 11 - Wunta Mempori

Langkaino pabawa-Do i Ue

¹ Asalakono impehohawa Ira i Ue, Ue Alamiu, ka imeweweuo anu lano ta wineweumiu ndi Ondae saru mpe'ini mpiha a luwuno pompakosi, atora ka parenta-Do.

² Pewowoloomo kanandio-andio, kupepau komba ndi ondae anamiu anu nahi domento'orio ka nahi domengkitao pohuku-Do i Ue, Ue Alamiu, pewowoloomo langkaino pabawa-Do, kae-Do anu moroso ka tokia-Do anu tetande,

³ petondoni ka wineweu-Do i wita Masiri ndi Pirao, mokole i wita Masiri, ka luwuno witano;

⁴ saru mbo'u hapa anu wineweu-Do a nsorodadudo to Masiri, ngarado ka karetado, onaemo kana'umpe Doweweuo uwoi Tahi Teberau lulua ka itutuwi ira, tempono domelulu komiu, ranta Dopepate ira i Ue hawe oleo andio;

⁵ kanatuu koa mbo'u hapa anu wineweu-Do ndi omiu i pada one, ranta ka imehawe a mpo'ianga andio;

⁶ hapa mbo'u anu wineweu-Do ndi Datani ka ndi Abirami, anano i Eliabi, anano i Rube, onaemo tempono ipenganga wita ka itele ira saru luwuno pe'asa rahado, kema ka luwuno anu pinekariado, i tonga-tongado to Isaraeli.

⁷ Hangano, imengkitaakonomo matamiu luwuno wineweu-Do i Ue anu langkai.

Ronso ka totonaa

⁸ Gagi, asalakono impe'ini a luwuno parenta anu kupohaweakomiu a oleo andio, ka imemoroso mpewinso ka mpentorokio wita, ba isua komiu mpesakiako kai mpentorokio,

⁹ ka imelai tinuwumiu i wita anu dinandi-Do i Ue saru sumpa ndi ondae uempu'umiu ka Doweeako ira ka a inuledo, asa wita anu hadio ntu'u susu ka siu hoanino.

¹⁰ Hangano wita, ba isua impewinso komiu mpentorokio, komba kana i wita Masiri, ba isua impeluarako, anu umari rinawoako inii asalakono mpe'iseiakono umuwoio, kana lere pompahoa inahu.

¹¹ Sine wita, ba isua imelako komiu mpetorokio, onaemo wita anu hadio torukuno ka lembono, anu mohawe uwoi montonda hadiono usa anu metii inso i langi.

¹² Wita atuu Dopekariao i Ue, Ue Alamiu. Mata-Do i Ue, Ue Alamiu dumagaio mpiha inso a pumpu'uano hawe a pokotompaano ta'u.

¹³ Tewala mentee ntu'u imperorongeakono parenta anu kupohaweakomiu a oleo andio, ranta kai mpehohawa Ira i Ue, Ue Alamiu, ka mpesomba ndi Ondae a tompaano aroamiu ka a tompaano sumangamiu,

¹⁴ onaemo ka Dopompowee usa tiano witamiu a tempono, usa pompu'uano ka usa pokotompaano, ranta ka upokopopumpu gandu, anggoro ka lanamiu.

¹⁵ Ka Ira mompowee ewo i padamiu tiado pinotuwumiu, ranta kai mpohawe mpongkaa ka gagi mowohi.

¹⁶ Impope'inandaimo, kasi ntepopandei, ranta kai mepansia saru mpesomba a anu pinesomba susua ka mpenggolonto mpelangkaio.

¹⁷ Tewala kanatuu, tekuda-Do i Ue ta tesingka ndi omiu ka Ira tumondoo langi, ranta nami hina usa ka wita nahi ta moluarako hasilino, ka i'amba ronga mepiingko inso a wita moiko anu Doweeakomiu i Ue.

¹⁸ Sine, asalakono imenaao pinauku andio i laro aroamiu ka i laro sumangamiu; asalakono impetanggoakono gagi petondoni a ngkaemiu ka gagi petondoni ira'imiu.

¹⁹ Asalakono imempaguruako ira anamiu saru mempopauo ba impentoro i rahamiu ka ba kontongaamiu pelempa, ba mpepombole komiu ka ba impewangu.

²⁰ Asalakono imeburio pinauku a ngkaru pewowano rahamiu ka a mpewowa langkai kotamiu.

²¹ Kanandio omiu ka luwuno anamiu mentuwu melai i wita anu dinandi-Do i Ue saru sumpa ndi ondae uempu'umiu ka domewineeako, ba dahinao langi i wawontolino.

²² Hangano tewala mentee ntu'u impe'ini komiu a parenta anu kupohaweakomiu kai wineweu, ka mehohawa Ira i Ue, Ue Alamiu, saru mentuwu montonda luwuno sala anu Dotisoakomiu ka saru mpe'ini moroso ndi Ondae,

²³ manasa Ondae i Ue sumaari ira luwuno tongku andio inso i aromiu, ranta kai mpetorokio witado luwuno tongku anu langkaiopo ka morosoopo sekono omiu.

²⁴ Sompo po'ianga anu linandano pele ngkarumiu, omiumo anu mpe'ueo. Mompu'u inso i pada one hawe i torukuno Libano, ka inso a ngkoro Eparata, hawe a ntahi i sumooano oleo, ta gagi witamiu.

²⁵ Nahina anu ta polio mekorahako umaropi komiu. Ondae i Ue, Ue Alamiu Ira weweuo luwuno wita anu linandamiu atuu gagi mpondende ka doito ndi omiu, kana anu dinandi-Do i Ue ndi omiu.

²⁶ Kitaomo, kupopo'aroo ndi omiu a oleo andio ronso ka totonaa:

²⁷ ronso, tewala imperorongeakono parenta-Do i Ue, Ue Alamiu, anu kupohaweo ndi omiu a oleo andio;

²⁸ ke totonaa, tewala nahi mpoperorongeako parenta-Do i Ue, Ue Alamiu, ka mepansia inso a nsala anu kuparentaakomiu a oleo andio, kai mpotonda anu pinesombai susua anu nahi imento'orio.

²⁹ Gagi, mansano Dowawa komiumo i Ue, Ue Alamiu a wita anu pinewinsokimiu kai mpetorokio, asalakono impokomengkaao ronso i wawo ntorukuno Gerisimi ka totonaa i wawono torukuno Ebali.

³⁰ Kombake oruano mo'ia i asa towano koro Yarade, i sumooano oleo sala langkai, te'aro i sumooano oleo i witado to Kana'a anu mpo'ia i Araba-Yarade, tepo'aroako Giliga umpeda a luwuno keu tarabanti i More?

³¹ Hangano omiu andio nami ta tehine komiu mensakio koro Yarade kai mpewinsokio ka mpetorokio wita anu Doweeakomiu i Ue, Ue Alamiu. Ka tewala komiu mpetorokio ka mpo'iangario,

³² asalakono impetenunu meweweuo luwuno pompakosi ka atora anu kuweeakomiu a oleo andio.