Winali 10 - Wunta Mempori

Watu anu wo'ohu

¹ I tempo atuu mepau Ira i Ue ndi ongkue, ”Pa'oomo orua watu anu mengkena saru amba-ambano, ka pewuatakomo i wawo ntorukuno tepohaweaKune. Weweuomo asa burua inso a ngkeu.

² Ka Aku burio a watu atuu luwuno pau anu hina a watu amba-ambano anu upehaomo atuu, ka u'amba nunaao orua watu atuu i larono burua.”

³ Onae kaku weweuo asa burua inso a ngkeu akasia ka mompa'o orua watu anu mengkena saru anu amba-ambano. Ka ku'amba morake i torukuno saru orua watu atuu a ngkaeku.

⁴ Awatu atuu Doburio i Ue Songka Hopulu mengkena kana burino anu amba-ambano, anu Dopauomo ndi omiu i wawo ntorukuno inso i tonga-tongano api a oleo pepumpuamiu. Umarino atuu Dopeweengakono i Ue ndi ongkue.

⁵ Ka ku'amba wali metii inso i wawo ntorukuno, ka kunaao watu atuu a laro burua anu kuweweuomo. Ka i tu'aimo po'iangano, kana parenta-Do i Ue ndi ongkue.

⁶ Onaemo ka dompelungka to Isaraeli inso i Be'eroti Bene-Ya'akani melako i Mosera. I ra'aimo imate i Haruni ka kinaburu. Ka i'amba i Eleasa, anano gagi sando mpesomba umeuo.

⁷ Inso i ra'ai mpelungka ira melako i Gudagodi, ka inso i Gudagodi melako i Yotabata, aasa wita anu hadio korono.

⁸ I tempo atuu Ondae i Ue mesusua ira suku Lewi anu mewawao burua pedandia-Do i Ue, ka dompo'angga mekakaako Ira i Ue ka domporonso a nee-Do, hawe kanandio-andio.

⁹ Onaemo pu'uno suku Lewi nahina tia pusakado mperonga-ronga saru luwuno pepaekompodo. Ondaemo iUe tia pusakado, kana anu pinau-Do i Ue, Ue Alamiu, ndi onae.

¹⁰ Mo'ia aku i wawo ntorukuno pato pulu oleo ka pato pulu wongi tehineno, kana anu amba-ambano, ka pohona mbo'u andio Doronge aku i Ue. Nahi Ira rumopu komiu i Ue.

¹¹ Umarino atuu mepau Iramo i Ue ndi ongkue, ”Rongamo lako ka pelempa i arodo tongku atuu, ka dompewinsokio ka mpetorokio wita anu Kudandiakono sumpa ndi ondae uempu'udo ka domewineeako.”

Po'oluako mehohawa Ira i Ue ka mia memolema

¹² Kanandio-andio, hei to Isaraeli, hapa anu tinuntu-Do i Ue, Ue Alamiu, inso ndi omiu, sangkadio doitoako Ira i Ue Alamiu, tuwu montonda luwuno sala-Do, mehohawa Ira, mesomba ndi Ondae i Ue, Ue Alamiu a tompaano aroamiu ka a tompaano sumangamiu,

¹³ me'ini a parenta ka pompakosi-Do i Ue anu kupohaweakomiu a oleo andio, kai moiko tumuwumiu.

¹⁴ Menteeano Ondae i Ue, Ue Alamiu anu me'ueo langi, tendeano langi anu i wawoio luwuno langi, ka tolino saru luwuno ihino.

¹⁵ Sine butu koa ndi ondae uempu'umiu tepadii aroa-Do i Ue, ranta ka Dopehohawa ira, ka omiumo inuledo, anu bininiki-Do inso a luwuno tongku, kana anu gagi kanandio-andio.

¹⁶ Onaemo pu'uno imebaliomo aroamiu ka siimo mbo'u impe'ulu watu.

¹⁷ Hangano Ondaemo i Ue, Ue Alamiu, Ue Alano luwuno anu pinesombai susua ka Ueno luwuno ue, Ue Ala anu langkai, moroso ka mongkokongiri, anu nahi Dopobiniki mia ke montarima pompowee komba tiano.

¹⁸ Ondae mo'alaako tiado nana'ote nahina amado ka tuwu beine ka mehohawa ira mia hawe saru moweeako ira kaanga ka sangka.

¹⁹ Onaemo pu'uno, asalakono impehohawa ira mia hawe, hangano omiu i ndi'ipua mia komiu mehawe i wita Masiri.

²⁰ Asalakono imedoitoako Ira i Ue, Ue Alamiu. Ndi Ondae asalakono impesomba ka mpe'ini moroso, ka impesumpa a nee-Do.

²¹ Ondaemo pu'uno po'unde-undeamiu ka Ondaemo Ue Alamiu, anu umariomo weweuo i olomiu luwuno wineweu anu langkai ka mongkokongiri, anu imengkitaakonomo matamiu.

²² Butu pitu pulu mia uempu'umiu melako i wita Masiri, sine kanandio-andio Ondae i Ue, Ue Alamiu weweu komiumo hadio kana anano wula i langi.