TITU 3 - Wunta Mempori

Luwuno pe'oliwi pokotompa 3:1-14

¹ Popoto'oriako iramo ka dompe'urumako a mia mpeparenta ka a mia anu mempabawa, mpomperorongeako ka mpepatinda meweweuo sompo anggaa anu moiko.

² Si dompomposebe, si dompengenge, tendeano ka domemauru ka mpe'aroa a luwuno mia.

³ Hangano i ndi'upua ontae mentuwu kita koa mbo'u a monge-mongea: nahi tompomperorongeako, ntesosaelo, megagi atano mperupa-rupa po'eheno aroa ka mosisiri, mentuwu a mosa'oa ka kohilia, mokoburu, memambe'o'aliako.

⁴ Sine mansano mengkaa pe'aroa-Do Ue Ala, Puu pongkaduduito, ka pompehohawa-Do a mia,

⁵ i tempo atuu Dokadudui kitamo, komba hangano wineweu moiko anu tomeweweuomo, sine hangano pompehohawa-Do a mpebahoa ka towali mempine'anaako ka a pompokowo'ohua anu inangga-Do Penaa Mempori,

⁶ anu Doweeakitamo hangano Ondae i Yesu Kerisituu, Puu pongkaduduito,

⁷ Ontae anu megagi mia pinokomentee hangano pe'aroa-Do, ka tontekona mpontarima tuwua anu nahina tampulaano, menunu saru pomperorohito.

⁸ Pau andio mentee ka ineheku ka upokomorosoo ntu'u, ka luwudo anu mpompe'ala-ala iramo ndi Ondae Ue Ala ka dompe'o'osu ntu'u meweweuo anggaa anu moiko. Onaemo anu moiko ka mentudu a mia.

⁹ Sine olaiakonomo wineweu anu inungke-ungkeako ka anu monge-monge, mongkona potudano tumuwu, teposisalaa ka pengengea mongkona songka Taura, hangano luwuno atuu nahi mentudu ka nahina pengkonaano.

¹⁰ Asa mia anu mompaguru susua anu mararuomo upatuduo, laluopo olaiakono.

¹¹ Uto'orio nine mia anu kanatuu tesosaelo ntu'u ka halano humukuo koroino onaeno.

¹² Umariku tumenao i Aratema ke i Tikiku aiwa ndi omue, pompete'umalamo aiwa ndi ongkue i Nikopoli, hangano kuputusiomo aku mo'ia i tu'ai i larono tempo morini andio.

¹³ Tulungiomo temoi-moiko i Sena, anu monto'ori ntu'u Taura atuu ka i Apolo, a mpelempaado, ka si domemakuraako hapa-hapa.

¹⁴ Ka po'ineeomo ka dompepaguru mbo'u miato meweweuo anggaa anu moiko ka dompokosompoo pepotuwudo, ka ipewua koa tuwudo.

Tabea 3:15

¹⁵ Tabea inso a luwuno mia anu pewali-waliku i ndi'ai ka pohaweomo tabeaku ndi ondae anu mpehohawa kami a pompe'ala-ala. Pe'aroa kumongkomi komiu luwu!