TITU 2 - Wunta Mempori

Songka mongkona mia mota'u, mia mongura ka ata 2:1-10

¹ Sine omue, paleleomo hapa anu menunu saru pompaguru anu mentee:

² Tama anu memota'u asalakono ka domentuwu poolo ka isoompo, mempinelangkai, mempande mposongka, mentee a pompe'ala-ala, a pompehohawa ka mpompedato.

³ Kanatuu koa mbo'u beine anu memota'u asalakono ka domentuwu gagi mia mpesomba, si dompomposebe, si domegagi atano anggoro, sine mempande mpompaguruako luwuno anu moiko

⁴ ka hangano kanandio paguru ira beine mongura mpehohawa ira tamado ka anado,

⁵ tuwu pande mposongka ka mempori, mokua mpo'atora sombori, memoiko aroa ka mpomperorongeako a ntamano, ka si dompepaukiakono mia pau-Do Ue Ala.

⁶ Kanatuu koa mbo'u mia memongura; imempatudu iramo ka domempabawaio koroido a luwuakoano

⁷ ka pokogagiomo koroimu omuemu aasa pandiri a mpoweweu moiko. Asalakono ka umoleo ka pompesu'ui a pompagurumu,

⁸ mentee ka nahina tataano a pompalelemu, ranta ka imokoko'ii taromu, hangano nahina mongkona anu mosa'o anu dompokopaleleo mongkona ontae.

⁹ Luwuno ata asalakono mpomperorongeako ndi uedo a luwuakoano ka dompemoikoo, si dome'ewaio pinaudo,

¹⁰ si domemolengku, sine asalakono ka iwela koa inso i aroado ka mpetenunu, hangano kanandio a luwuakoano ka dompokomarambao pompaguru-Do Ue Ala, Puu pongkaduduito.

Pe'aroa-Do Ue Ala kumaduduio luwuno mia 2:11-15

¹¹ Hangano pe'aroa-Do Ue Ala anu kumaduduio luwuno mia mengkaaomo.

¹² Onae paguru kita ka tomebintao gau mosa'o ka luwuno mosisiri ntolino ka tomentuwu pande mponsongka, moleo ka mpesomba i wawontolino kanandio-andio

¹³ saru mensikorio te'ihiino pomperorohito anu buke me'uraa ka mengkaano maramba-Do Ue anu Tedoa Langkai ka Puu pongkaduduito Ondae i Yesu Kerisituu,

¹⁴ anu meweengakonomo koroi-Do hangano ontae motola kita inso a luwuno anu mosa'o ka mokomemporiako Ira aasa bawaa, bawaa-Do Ondae-Do, anu memokua mpoweweu moiko.

¹⁵ Paleleomo luwuno atuu, patudu iramo ka pokomanasaako ira a luwuno poweweumu anu tekona domentondao. Si hina mia anu me'uru-uruko.