Tegagia 9 - Wunta Mempori

Pedandia-Do Ue Ala saru i Noho

¹ Ondae Ue Ala rumonsoo i Noho ka luwuno anano, saru mepau ndi ondae, ”Impo'ulemo ka intetiangimo hadio ka imebuketio tolino.

² Luwuno kondehora mo'ila, luwuno manu-manu i laro meene, luwuno kondehora anu melelu i tolino ka luwuno bou a ntahi, ira medoito ka mpondende ndi omue. Luwuno atuu pineweengakoomo a ngkaemu.

³ Luwuno anu melelu, anu tuwu, ta gagi kaangamu. Kuweeakomumo luwu atuu kana mbo'u luwuno pinopaho mololowulu.

⁴ Butu bau anu da saru reano, onaemo penaano, si mengkaano.

⁵ Sine, a reamu, onaemo penaamu, Aku motuntu pombalo; inso a luwuno kondehora, Aku tumuntuo, ka inso a sompo mia, Aku tumuntuo penaano pe'asa miano.

⁶ Isema mo'uwu reano mia, reano ira me'uwuo mia, hangano mia pinokogagi, montonda gambara-Do Ue Ala.

⁷ Ka omiu impo'ulemo ka intetiangimo hadio, ranta nahi pinokodoa hadiomiu i wawontolino, oo, intetiangimo hadio i wawono.”

⁸ Mepau Iramo Ue Ala ndi Noho ka a luwuno anano anu merongaakono,

⁹ ”Menteeano Aku moweweu pedandia-Ku saru omiu ka inulemiu,

¹⁰ ka saru luwuno anu tuwu anu perongamiu: luwuno manu-manu, pinotuwu ka kondehora mo'ila anu perongamiu, anu mpeluarako inso a bangka atuu, luwuno kondehora i tolino.

¹¹ Kupakosio pedandia-Ku saru omiu, nine mompu'u andio luwuno anu tuwu nahi ta pinokotampulaako mbo'u lolowi, ka nahi ta hina mbo'u lolowi rumopuo tolino.”

¹² Ondae Ue Ala mepau, ”Ndiomo tondonino pedandia anu wineweu-Ku i olo-Ku ka omiu saru luwuno anu tuwu anu perongamiu, mapa'api-api inule ranta nahina tampulaano.

¹³ Toro'ue-Ku Kunaao a nseru gagi tondonino pedandia olono Ongkue ka tolino.

¹⁴ Tewala mompotii Aku seru i wawontolino ka toro'ue atuu tengkita a nseru,

¹⁵ Aku rumambeo pedandia-Ku anu hinaomo i olo-Ku ka omiu saru luwuno anu tuwu, luwuno anu hinao penaano. Nahi ta hina mbo'u uwoi anu gagi lolowi ta rumopuo luwuno anu tuwu.

¹⁶ Tewala toro'ue atuu kongko a nseru, Aku koa kumitao, ka rumambeo pedandia-Ku anu nahina tampulaano i olo-Do Ue Ala ka luwuno anu tuwu, luwuno anu tuwu anu kongko i tolino.”

¹⁷ Mepau Iramo Ue Ala ndi Noho, ”Ndiomo tondonino pedandia anu wineweu-Ku i olo-Ku ka luwuno anu tuwu anu kongko i tolino.”

I Noho ka luwuno anano

¹⁸ Luwuno anano i Noho anu mpeluarako inso a bangka onaemo i Semu, i Hami ka i Yapeti. I Hami, onaemo amano i Kana'a.

¹⁹ Ondaemo atuu otolu ira anano i Noho ka insomo ndi ondae tesiarawo luwuno palili anu mpo'ia i tolino.

²⁰ I Noho gagi puu mpelere; onaemo anu amba-ambano moweweu lere anggoro.

²¹ Mansano mo'inu anggoro, onae molangu ka kolambe-lambe a laro ngkemano.

²² I Hami, amano i Kana'a, kumitao anuno amano, ka i'amba tumutuluo a orua ira pepaekompono i bungkuno.

²³ I Semu ka i Yapeti umalao asa lewe sawu ka dowileo a oweado orua ira. Ka do'amba melempa monsuka, ka dotutuwio anuno amado saru wolilio rupado, kasi dokitao anuno amado.

²⁴ Mansano telike i Noho inso a molanguno, ka ito'orio hapa anu wineweuno anano anu tompasusu,

²⁵ motaeomo, ”Tetotonaaomo i Kana'a, onae ta gagi ata anu tedoa pinokongkodei a luwuno pepaekompono.”

²⁶ Ipotae mbo'u, ”Inunde-unde Iramo i Ue, Ue Alano i Semu! Po'ineeomo i Kana'a gagi atano.

²⁷ Po'ineeomo Ondae Ue Ala mokomaluao po'iangaano i Yapeti. Po'ineeomo ipo'ia a laro luwuno kemano i Semu, ka i Kana'a gagi atano.”

²⁸ I Noho da tuwu tolu etu ka lima pulu nta'upo mbo'u, umarino lolowi.

²⁹ Gaagi, tinuwuno i Noho hawe sio etu ka lima pulu nta'u, ka i'amba mate.