Tegagia 8 - Wunta Mempori

Uwoi lolowi tempae

¹ 1 Ondae Ue Ala rumambeo i Noho, luwuno kondehora mo'ila ka luwuno pinotuwu anu meronga saru onae a laro bangka atuu, ka i'amba Ondae Ue Ala weweuo angi mepuuri i wawontolino, ranta ka itempae uwoi atuu.

² Luwuno mata uwoi a ondaloano tolino, saru luwuno pentangoa i langi tinondo, ka usa marombo inso i langi pinokompenaa-naa,

³ ka uwoi atuu kotempa-tempaeno i wawontolino. Kanatuumo ipetii uwoi atuu umarino asa etu ka lima pulu oleo.

⁴ A wula ko'opitu, oleo kohopulu ka opitu wula atuu, terareomo bangka atuu i mentorukuno Arara.

⁵ Uwoi atuu komaku-makurano hawe wula anu kohopulu. A wula kohopulu, tanggala asa wula atuu, tengkitaomo luwuno punsuno torukuno.

⁶ Mansano laloomo pato pulu oleo, i Noho umungkahio pentangoano bangka anu wineweuno.

⁷ Ka i'amba motolao asa manu-manu paa-paa; ka manu-manu atuu menee lumako ka ipekule, ranta uwoi atuu gagi motu'i inso i wawontolino.

⁸ Ka i'amba motolao asa manu-manu marapatii, ta kumitao ba makuraomo uwoi i wawontolino.

⁹ Sine, manu-manu marapatii atuu nahi pohawe pomuaano ka onae wali mepokule ndi Noho a laro bangka atuu, hangano i asa wawontolino da hinao uwoi. I Noho tumandeo kaeno rumakoo manu-manu atuu ka iwawao mewinso a laro bangka.

¹⁰ Isikorio opitu oleo mbo'u, ka i'amba wali motolao manu-manu marapatii atuu inso a bangka.

¹¹ Tamo ngkiniwia manu-manu marapatii atuu mekule ndi Noho saru asa tangke lewe saitu mololowulu a tungkuno, onaemo ka ito'orio i Noho, nine uwoi atuu makuraomo i wawontolino.

¹² Mansano mesikori opitu oleo mbo'u, ipotolao manu-manu marapati atuu, sine manu-manu atuu nahi pekule mbo'u ndi onae.

¹³ A nta'u konomo etu ka aasa, wula ko'aasa, a ntanggala aasa wula atuu, uwoi atuu motu'iomo inso i wawontolino. Ka i'amba i Noho umungkahio ulono bangka atuu, ka mengkita limbu-limbu, mengkaa wawontolino mompu'uomo motu'i.

¹⁴ A wula ko'orua, a oleo korua pulu ka opitu wula atuu, tolino motu'iomo.

¹⁵ Mepau Iramo Ue Ala ndi Noho,

¹⁶ ”Peluarakomo inso a bangka, omue saru beinemu, luwuno anamu ka beinedo anamu,

¹⁷ luwuno kondehora anu meronga saru omue, luwuno anu tuwu: manu-manu, pinotuwu ka luwuno kondehora anu melele i tolino. Tena iramo ka dompeluarako meronga saru omue, ka dompenggowo luwuno atuu i tolino, saru mpo'ule ka ntetiangi hadio i tolino.”

¹⁸ Ka i'amba meluarakoomo i Noho saru luwuno anano, beineno ka beinedo anano.

¹⁹ Luwuno kondehora mo'ila, luwuno kondehora melele ka luwuno manu-manu, luwuno anu melelu i tolino, singge montonda rupano, mpeluarako mbo'u inso a bangka atuu.

²⁰ Ka i'amba i Noho mowangu meda pontunua pesomba ndi Ondae i Ue. I'alao ba opia kondehora inso a luwuno pinotuwu anu nahina tataano, ka inso mbo'u a luwuno manu-manu anu nahina tataano ka ipesombaakono pesomba tinunu a wawo meda pontunua pesomba atuu.

²¹ Tempono Dowooo i Ue lahono anu mompokomawongko atuu, Mepau Iramo i Ue i laro aroa-Do, ”Nahi Aku tumotonaao mbo'u tolino andio hangano mia, maupo tinoono aroano mosa'o mompu'u ikodei, ka nahi Aku mepate ira mbo'u luwuno anu tuwu, kana anu Kuweweuomo.

²² Tewala da hinao tolino, nahi ta menaa-naa tempo morawo inii ka sumowi, tempo morini, ka mokula, tempo motu'i-tu'i ka usa, meene ka wongi.”