Tegagia 7 - Wunta Mempori

Uwoi lolowi

¹ Mepau Iramo i Ue ndi Noho, ”Pewinsomo a larobangka atuu, omue ka luwuno ihino rahamu, hangano omuemo anu mentee a pongkita-Ku i olodo mia tempo andio.

² Inso a luwuno kondehora anu nahi upali asalakono ka u'alao opitu pasa, lakino ka pasano, sine inso a ngkondehora anu upali, asa pasa, lakino ka pasano,

³ inso mbo'u a manu-manu anu i laro meene opitu pasa, lakino ka waino, ka ikongko tuwu inuleno i asa wawontolino.

⁴ Hangano opitu oleopo mbo'u, Aku mompotii usa i wawontolino i larono pato pulu oleo pato pulu wongi, ka Aku mokotampulao inso i wawontolino luwuno anu tuwu, anu pinokogagi-Ku atuu.”

⁵ Ka i'amba i Noho weweuo luwuno kona ntu'u kana peparenta-Do i Ue ndi onae.

⁶ Tinuwuno i Noho nomo etu nta'u tempono uwoi lolowi sumampuo tolino.

⁷ I Noho mewinso a laro bangka atuu saru luwuno anano, kombiano ka kombiado luwuno anano hangano uwoi lolowi atuu.

⁸ Inso a kondehora anu nahi upali ka anu upali, inso a luwuno manu-manu ka inso a luwuno anu melele i wawontolino,

⁹ mehawe nte'o'asa pasa ndi Noho a laro bangka atuu, lakino ka waino, kana peparenta-Do Ue Ala ndi Noho.

¹⁰ Mansano opitu oleo, tolino isampuomo lolowi.

¹¹ Tempono tinuwuno i Noho nomo etu nta'u, a wula ko'orua, a oleo ko hopulu ka opitu wula atuu, a oleo atuu tebosiomo luwuno mata uwoi i ondaloano anu mongkokodoito i totono tolino, ka te'ungkahiomo luwuno pentangoa i langi.

¹² Ka i'amba metiiomo usa marombo i wawontolino i larono pato pulu oleo pato pulu wongi.

¹³ A oleomo atuu i Noho mewinso saru i Semu, i Hami ka i Yapeti, luwuno anano i Noho, ka beineno i Noho saru otolu ira beinedo anano, a laro bangka atuu,

¹⁴ meronga saru mbo'u ondae luwuno rupano kondehora mo'ila, luwuno rupano pinotuwu, luwuno rupano kondehora anu melele i tolino ka luwuno rupano manu-manu, luwuno manu-manu ka luwuno anu mepani.

¹⁵ Luwuno anu tuwu anu hinao penaano mehawe nte'o'asa pasa ndi Noho a laro bangka atuu.

¹⁶ Luwuno anu mehawe atuu, mpewinso, lakino ka waino inso a luwuno anu tuwu, kana peparenta-Do Ue Ala ndi Noho. Ka Do'amba i Ue tumondoo pewowano bangka.

¹⁷ Ilarono pato pulu oleo lolowi sumampuo tolino. Uwoi atuu mewuatako ka tumandeo bangka atuu, ranta ka itetande mantande inso i tolino.

¹⁸ Tempono uwoi koteti-tetiangino ka mewuatako tedoa mongkokodoito i wawontolino, melonto-lontoomo bangka atuu a wawo uwoi.

¹⁹ Uwoi atuu tetiangi tedoa mongkokodoito sumampuo tolino ka tumutuwio luwuno torukuno mantande itotono langi.

²⁰ Uwoi atuu koteti-tetiangino hawe hopulu ka olima hiku i wawono luwuno ntorukuno, ranta ka itutuwio.

²¹ Ka i'amba memate iramo luwuno anu tuwu, anu melelu i tolino, luwuno manu-manu, pinotuwu, ka kondehora mo'ila ka luwuno kondehora anu mpenggowo i tolino, saru luwuno mia.

²² Luwuno anu hinao penaa tuwu a laro engeno, luwuno anu mo'ia a wita memate luwu.

²³ Kanandiomo Dopokotampulao Ue Ala luwuno anu tuwu i wawontolino, moiko mia maupo pinotuwu, kondehora melele ka luwuno manu-manu i laro meene, ranta luwuno atuu pinokotampula inso i wawontolino; anu tola butu i Noho ka luwuno anu meronga saru onae a laro bangka atuu.

²⁴ Uwoi atuu koteti-tetiangino i wawontolino, i larono asa etu ka lima pulu oleo.