Tegagia 6 - Wunta Mempori

Mia mpoweweu mosa'o

¹ Tempono mia mompu'u tetiangi hadio i wawontolino, ka dompe'anaako ira ana beine,

² luwuno anu tuwu i suruga mengkitao nine ana beinedo mia atuu ntekokosi. Ka i'amba inso i olodo beine atuudo ondae mpo'ala gagi beinedo, isemamo koa anu inehedo.

³ Mepau Iramo i Ue, ”Penaa-Ku nahi ta mo'ia mpiha i larono mia hangano mia atuu ihi. Tinuwuno butu ta hawe asa etu ka rua pulu nta'u koa.”

⁴ I tempo atuu ka lembuino mbo'u, hinao mia melolangkai i tolino, tempono anu tuwu i suruga mpewowaliako ira ana beinedo mia ka beine atuudo mpe'anaako ira anado. Ondaemo atuu mia anu moroso ka mosia i tempo se'eluno, luwuno mia anu telele needo.

⁵ Dokitao i Ue tedoa langkai mosa'ono wineweuno mia i tolino, ka luwuno pinewowolono aroano wela mewuaako mosa'oa mpena.

⁶ Ka Do'amba i Ue me'o'ole nine Dopokogagiomo mia i tolino, ka mongkona atuu mokomasusao aroa-Do.

⁷ Mepau Iramo i Ue, ”Aku mokotampula ira mia anu pinokogagi-Ku atuu inso i wawontolino, moiko mia maupo pinotuwu, luwuno kondehora melele ka luwuno manu-manu i laro meene, hangano me'o'ole Aku nine Kupokogagi iramo.”

⁸ Sine i Noho mohawe pompehohawa-Do i Ue.

I Noho ka bangkano

⁹ Ndiomo tutuluno somborino i Noho. I Noho onaemo asa mia anu mentee ka nahina tataano i olodo luwuno mia i tempo atuu, ka i Noho momperorohi ndi Ondae Ue Ala.

¹⁰ I Noho mohawe otolu ira anano tama: i Semi, i Hami, ka i Yapeti.

¹¹ I aro-Do Ue Ala tolino mosa'oomo lahi ka bukeako pobobarasaia.

¹² Dokitao Ue Ala tolino atuu, ka mengkaa tedoa ntu'u mosa'o, hangano luwuno mia mpoweweu anu mosa'o i tolino.

¹³ Mepau Iramo Ue Ala ndi Noho, ”Kuputusiomo mokotampulao tuwudo luwuakoano anu tuwu, hangano tolino bukeako pobobarasaido. Kanandio-andio, Aku mokotampula ira meronga saru tolino.

¹⁴ Weweuomo asa bangkamu inso a ngkeu gopiri. Bangka atuu asalakono weweuo mpebolo-bolongko ka asalakono apiiakono tere i bungkuno ka i larono.

¹⁵ Kanandiomo asalakono uweweuo bangka atuu: tolu etu hiku ondauno, lima pulu hiku maluano, ka tolupulu hiku mantandeno.

¹⁶ Poweweuakono atono bangka atuu ka poko'umariomo bangka atuu hawe asa hiku inso i wawono, ka pasaomo tondono i apano. Weweuomo bangka atuu metuda i totono, i tongano ka i wawono.

¹⁷ Menteeano Aku mompotii lolowi sumampuo tolino mokotampulao luwuno anu tuwu, anu hinao penaano i totono langi; luwuno anu kongko i tolino ta mate.

¹⁸ Sine, Aku moweweu pedandia-Ku saru omue. Omue komewinso a laro bangka atuu: omue meronga saru luwuno anamu, beinemu ka beinedo luwuno anamu.

¹⁹ Inso a luwuno anu tuwu, inso a luwuno anu hinao penaano, asa pasa inso a luwuno atuu asalakono uwawao a laro bangka, ka itepekaria tuwudo meronga saru omue; asalakono wawao lakino ka waino.

²⁰ Inso a luwuno rupano manu-manu, inso a luwuno rupano kondehora melele i wawontolino, inso a luwuno rupano pinotuwu, inso a luwuno atuu, asalakono hawe asa pasa ndi omue, ka itepekaria tuwuno.

²¹ Sine omue, wawaomo luwuno anu moiko ikinaa. Pumpuomo atuu ndi omue ka igagi kaangamu ka ondae.”

²² Ka i'amba i Noho weweuo luwuno atuu; kona ntu'u kana peparenta-Do Ue Ala ndi onae, kanatuumo iweweuo.