Tegagia 50 - Wunta Mempori

¹ Mebanguakoomo i Yusupu kumopuio rupano amano, mengese ka iwoo-wooo.

² I Yusupu parenta ira atano, luwuno sando, ka domerampa-rampao wata ngkoroino amano ka si moboo. Ka do'amba luwuno sando atuu medoloakono rampa-rampa wata ngkoroino i Isaraeli.

³ Mongkona atuu pinoko'umari i larono pato pulu oleo, hangano kanandiomo tempo anu kinere a mporampaa wata ngkoroi. To Masiri mpo'inomboakono i larono pitupulu oleo.

⁴ Mansano telaloomo luwuno oleo po'inomboa atuu, i Yusupu motaeako ira luwuno ihino langkanaeno i Pirao, ”Tewala impehohawa aku, imempauakono i Pirao

⁵ nine dotena akumo amaku mesumpa, dopotae: Nahi tehine mbo'u akumo mate. A ngkaburu anu kukekeomo i wita Kana'a, asalakono i tu'aimo ukaburu aku. Onaemo pu'uno, i'eheakunemo lumako ndiraane, ka kukaburu ira amaku. Umarino atuu aku koa mekule.”

⁶ Ka i'amba motae i Pirao, ”Lakomo ka kaburuomo amamu atuu, kana sumpa anu itenaakomu.”

⁷ Ka i'amba i Yusupu melungka ta kumaburuo amano. Meronga onae mpelungka mbo'u luwuno pegawaino i Pirao, luwuno mia memota'u inso a langkanaeno, ka luwuno mia memota'u i wita Masiri,

⁸ saru pe'asa rahano i Yusupu, luwuno pepaekompono ka luwuno ihino rahano amano. Butu luwuno anado saru bawaano bembe bimba ka sapido domebintao i wita Gose.

⁹ Meronga onae mpetonda melako luwuno sorodadu mpengara ka luwuno karetano; petotondado langkai ntu'u.

¹⁰ Sahawedo i Gorene-Ha'atada, anu po'iangano i asatowano Koro Yarade, mpoweweu ira ponsabangia anu tedoa langkai ka magaga i tu'ai. I Yusupu moweweu po'inomboa i larono opitu oleo hangano amano.

¹¹ Tempono palilino wita atuu, to Kana'a, mengkitao po'inombo i Gorene-Ha'atada atuu, dompotae, ”Onaemo andio po'inombodo to Masiri anu tedoa magaga.” Onaemo pu'uno po'ianga atuu nineeako Abeli-Misiraimi, anu po'iangano i asatowano Yarade.

¹² Luwuno anano i Yako meweweuakono kana anu i'oliwiako ira.

¹³ Onae domewawao anano i wita Kana'a ka mengkaburuo a laro ngkunepo i lere Makapela, lere i sabaano oleo Mamere, anu i'oliomo i Burahima inso ndi Eperoni, to Heti atuu, anu gagi kaburu pine'ueno.

¹⁴ Umarino kumaburuo amano, i Yusupu mekule i Masiri, saru luwuno pepaekompono ka luwuno mia anu melako meronga onae mengkaburuo amano.

I Yusupu umampuni ira pepaekompono ka umalumi ira

¹⁵ Tempono domengkitao pepaekompono i Yusupu nine mateomo amado, mpotae ira, ”Bara'ura i Yusupu da monaa aroa ndi ontae ka ta mombaloakono ndi ontae luwuno wineweu mosa'o anu tomeweweuomo ndi onae.”

¹⁶ Onaemo pu'uno ondae mpotena mia mohaweo pe'oliwi andio ndi Yusupu, ”Napi domate amamiu, me'oliwi iramo:

¹⁷ Kanandiomo asalakono imempauakono i Yusupu: Po'ineeomo i'ampunio sala ka halado pepaekompomu, hangano mpoweweu iramo anu mosa'o ndi omiu. Kanandio-andio, po'ineeomo ka i'ampunio sala anu wineweudo tetenaa-Do Ue Alado amamiu.” Ka i'amba mengeseomo i Yusupu mansano rumongeo dompepau kanandio ndi onae.

¹⁸ Luwuno pepaekompono mbo'u me'aiwa ka dompenggolontu mpesomba i arono ka dompotae, ”Omami me'aiwa ka kimegagi atamiu.”

¹⁹ Sine, motae i Yusupu ndi ondae, ”Siimo imedoito, hangano ongkue andioke Ue Ala?

²⁰ Lano mposongka komiumo anu mosa'o ndi ongkue, sine Ondae Ue Ala mosongka Iramo moikoa, mokomengkaao hapa anu gagi kanandio-andio, onaemo mekariao tuwuno mia hadio.

²¹ Gagi siimo imedoito, aku mekariakomiu ka luwuno anamiu mbo'u.” Kanandiomo itareroako ira pauno ka mokorodoo aroado.

I Yusupu mate

²² I Yusupu mo'ia mpiha i Masiri saru pe'etuno. Tinuwuno i Yusupu asa etu ka hopulu nta'u.

²³ I Yusupu da mokokitao ana'ueno i Eparai hawe inule anu ko'otolu; luwuno mbo'u anano i Makihiri, anano i Manase, pineanaako a wawo mpa'ano i Yusupu.

²⁴ I Yusupu motaeako ira pepaekompono, ”Nahi tehine mbo'u akumo mate. Sine Ondae Ue Ala manasa Ira mekakaakomiu ka wawa komiu mpeluarako inso i wita andio a wita anu Dodandiakonomo sumpa ndi Burahima, ndi Saki ka ndi Yako.”

²⁵ Ka i'amba i Yusupu tumena ira anano i Isaraeli mpesumpa, ipotae, ”Ondae Ue Ala manasa Ira mekakaakomiu. I tempo atuu asalakono imewawao luwuno wukuku inso i ndi'ai.”

²⁶ Ka i'amba i Yusupu mate a ntinuwu asa etu ka hopulu nta'u. Wata ngkoroino rinampa-rampa ka simoboo, ka ninaa a laro bangkano mia mate i Masiri.