Tegagia 49 - Wunta Mempori

I Yako rumonso ira anano rangku mateano

¹ Ka i'amba i Yako moboi ira anano ka ipotae, ”Ime'aiwamo mpepumpu, ka kupauakomiu, hapa anu komiu mpembasaio lembuino.

² Impepumpumo ka imerongeomo, luwuno anano i Yako. Imerongeo i Isaraeli, amamiu,

³ Rube, omue ana akaku, rosoku ka wua amba-ambano mosiaku, omuemo anu lalua a laro pompelangkai, anu lalua a laro mpabawa.

⁴ Omue anu mebubulaka kana uwoi, komba omue mbo'u anu lalua, hangano upewuatakoiomo poturiano amamu ka sumosa'aio. Ipewuatakoiomo poturiaku!

⁵ I Simeo ka i Lewi mepaekompo; parewa mpeteado onaemo parewa pobobarasai.

⁶ Ka si mansa koroiku tetonda a mpedandiado mpoweweu mosa'o, ka si mansa tepo'asa aroaku saru tepumpuado, a laro ntekudado ondae pompepate mia ka montonda po'ehedo mpototopi dii-diino sapi.

⁷ Tetotonaaomo tekudado, hangano tekudado lambaha, tetotonaaomo bamburudo, hangano bamburudo mongkokongiri. Aku tumia-tia ira i olodo anano i Yako ka sumiarawo ira i olodo anano i Isaraeli.

⁸ I Yehuda, omue ira me'unde-undeko pepaekompomu, kaemu ta dumansoo bangawe'udo iwalimu, ndi omue ira mpenggolontu mpesomba luwuno anano amamu.

⁹ I Yehuda kana anano singa. Umari morako, komewuatako mantande, hei anaku. Onae me'opo ka mepombole kana singa lakino ke singa waino, isemake anu mosia wanguo?

¹⁰ Tuko poparentaa nahi ta melimba inso ndi Yehuda ka tuko poparenta inso i olono karuno, ranta ka ihawe onae anu tekona ndi onae, ka ndi onae ira mpetuundu luwuno tongku.

¹¹ Onae metanggoakono kalideno a ngkeu anggoro ka ana kalideno a ngkeu anggoro bininiki; onae ta molombo sangkano mompake anggoro ka lembano mompake rea wua anggoro.

¹² Matano motaha hangano anggoro ka ngisino mopute hangano susu.

¹³ I Sebulo ta rodo i wiwi ntahi, onae gagi tiimano kapala, ka tidano hawe i Sidoni.

¹⁴ I Isakari kana kalide anu moroso wukuno, anu me'opo i'asio tinembino.

¹⁵ Tempono kumitao moiko ntu'u penaa-naaa atuu ka tedoa tekosi wita atuu, ilingkeo oweano ta montembi, ka gagi ata mo'angga dinadai.

¹⁶ Kanatuu mbo'u i Dani, onae ta bitara ira tongkuno mengkena kana asa suku Isaraeli.

¹⁷ Po'ineeomo i Dani gagi kana ule a nsala, kana ule me'ipo a nsala kodei, anu motungku tundono ngara, ranta ka itewangunsule anu mesawikio.

¹⁸ Ongkue monsisikori tekaduduia inso ndi Omiu, oo Ue.

¹⁹ I Gadi ira mensapoio gerombola ponsapoi, sine onae ta sumapoio tundodo.

²⁰ Kaanga inso ndi Asere memo'ahi ka onae ta mompatinda kaangado luwuno mokole.

²¹ I Napatali kana rusa waino anu pinotola, onae ta me'anaako ira nana'ote anu tekosi.

²² I Yusupu kana keu mongura anu mewua, keu mongura anu mewua umpeda mata uwoi. Luwuno sampano mewuatako lumaloio rere watu.

²³ Puu mpepana mensapoio, mpepana ka mentolahio,

²⁴ sine panano moroso mpiha, ka tokiano ipokomelongkuo, hangano kae-Do Anu Tedoa Moroso, Ondae Ue Alano i Yako, hangano puu pompakambino, Torukuno Watuno i Isaraeli,

²⁵ Ondae Ue Alano amamu anu Ira tumulungiko, Ondae Ue Ala Anu Tedoa Pabawa, anu Ira rumonsoakomu ronso inso i langi i wawono, saru ronso inso a ntahi malua anu metotoako itotono, saru ronso uo ka pe'anakaa.

²⁶ Ronsono amamu lumaloio ronsono luwuno torukuno nahina tampulaano, ka anu memo'ahi a luwuno pongku anu mompu'u i ndi'upua. Luwuno atuu ta metii a wawo uluno i Yusupu, a wawo taku uluno mia bininiki inso i olodo pepaekompono.

²⁷ I Benami kana Serigala anu momperangkami; i tempono mo'oru ikaano pinongko'alano ka i tempono ngkiniwia itia-tiao rinontuno.”

²⁸ Onaemo atuu luwuno suku Isaraeli, hopulu ka orua porokono. Kanandiomo anu pinauno amano ndi ondae. Singge mia ironsoakono ronso anu lano tiado.

I Yako maate i wita Masiri ka kinaburu i wita Kana'a

²⁹ Ka i'amba i Yako me'oliwi ndi ondae, ”Tewala te'ipua ongkue pinumpu a uempu'uku, imengkaburu akumo i horido uempu'uku a laro ngkunepo anu po'iangano a lereno i Eperoni, to Heti atuu,

³⁰ a laro ngkunepo a lere i Makapela i sabaano oleo Mamere i wita Kana'a, lere anu umariomo i'olio i Burahima inso ndi Eperoni, to heti, gagi pekaburua pine'ueno.

³¹ I tu'aimo ikinaburu i Burahima saru i Sara, beineno; i tu'aimo mbo'u ikinaburu i Saki ka i Ribeka, beineno,

³² ka imengkaburuo mbo'u i Lea i tu'ai, a lere saru kunepo anu inoliomo inso a nto Heti.”

³³ Umarino me'oliwi a luwuno anano, i Yako padiio karuno a wawo mpoturiano ka tampulaomo penaano. Onae pinumpu a uempu'uno.