Tegagia 43 - Wunta Mempori

Pepaekompono i Yusupu melako i Masiri kompenduano

¹ Mokoninggoa i wita atuu mongkokongiri ntu'u.

² Mansano pingko kinaa gandu anu winawado inso i Masiri, motaeomo amado, ”Imelakomo mbo'u mpo'oliakita kaanga tedei.”

³ Sumangki i Yehuda, ”Mia atuu moweeakamimo pepopoto'ori anu mokora: si ntu'u imengkitao mbo'u rupaku, sangkadio uaimiu metonda merongaakomiu.

⁴ Tewala i'eheakono uaimami lumako meronga saru omami, kami koa melako mpo'oliakomiu kaanga i ra'ai.

⁵ Sine tewala nahi i'eheakono lumako, nahi kami melako i ra'ai, hangano mia atuu motaeomo ndi omami: Si ntu'u imengkitao mbo'u rupaku, sangkadio uaimiu metonda merongaakomiu.”

⁶ Ka i'amba i Isaraeli motae, ”Tembio ka impoweweuakune marasaia andio ka imempauo a mia atuu nine da hinao asa mia uaimiu?”

⁷ Mesangki ira, ”Mia atuu ipenootio ntu'u sumikeno kami mongkona omami ka pepaekompomami: Da tuwu irake amamiu? Da hinaoke pepaekompomiu anu susua? Kimempauakonomo luwu menunu saru luwuno pesikenono atuu. Nde kana'umpe kami mento'orio nine onae ta motae: Wawaomo uaimiu atuu i ndi'ai.”

⁸ Ka i'amba motae i Yehuda ndi Isaraeli, amano, ”I'eheakonomo nana'ote atuu lumako meronga saru ongkue. Kami koa mpepatinda ka melako, ka todamentuwu koa, si tomemate, moiko omami maupo omiu ka luwuno anamami.

⁹ Ongkuemo anu sumusuruo. Moiko ituntuo ndi ongkue tewala nahi kuwawao mekule i aromiu, aku tehala ndi omiu asa ntinuwuku.

¹⁰ Ande-andeno nahi towela mpotuluo, bakanaano kanandio-andio mpekule kamimo anu kompenduano.”

¹¹ Ka i'amba i Isaraeli, amano motaeakono, ”Tewala kanatuu, weweuomo andio: Alaomo ka wawaomo a mia atuu hasilino wita andio anu lalu moiko a laro mponaapamiu gandu gagi pesomba: tedei solika ka tedei siu hoani, hulu ka hulu ladanu, sanggore makademia ka wua badama.

¹² Wawaomo doi meluka mpendua hadiono. Doi anu pinokuleomo a laro nganga luwuno kampilimiu atuu asalakono iwali mewawao. Bara'ura atuu nahi pine'inungako.

¹³ Imewawaomo mbo'u uaimiu atuu, impepatindamo ka imelakomo mbo'u a mia atuu.

¹⁴ Po'ineeomo Ondae Ue Ala Anu Tedoa Pabawa moweeakomiu pompehohawa a pongkitano mia atuu, ka i'eheakono mekule pepaekompomiu anu susua atuu ka i Benami. Mongkona ongkue andio, tewala mansa ira tetadi anaku, po'ineeomo dontetadi inso ndi ongkue!”

¹⁵ Ka i'amba mia atuudo me'alao pesomba atuu ka me'alao doi meluka mpendua hadiono ka i Benami mbo'u. Mpelungka iramo te'aro i Masiri ka mpe'aro ndi Yusupu.

¹⁶ Mansano kumitao i Yusupu i Benami meronga saru ondae, motaeomo a puu pompekakaako rahano, ”Wawa iramo mia andiodo a laro raha, sumbeleomo pinotuwu ka patindaomo atuu, hangano mia andiodo ira mpongkaa meronga saru ongkue ntonga oleo andio.”

¹⁷ Mia atuu weweuo kana anu iparentaakono i Yusupu. Iwawa ira mia atuudo a laro rahano i Yusupu.

¹⁸ Ka medoito iramo mia atuudo, hangano ondae mewinawa a laro rahano i Yusupu. Dompotae, ”Ontae mewinawa i ndi'ai hangano doi anu pinokule a laro kampilito tempono tome'aiwa amba-ambano atuu, ka tomerinako pinokogagi ata, ka kalideto inala.”

¹⁹ Dome'umpedaakonomo puu mpompekakaako rahano i Yusupu, ka dompotae ndi onae i arono pewowano raha,

²⁰ ”Tabeamiu ue! Omami i ndi'ipua me'aiwa ramai aiwa mpo'oli kaanga,

²¹ sine tempono kimehawe a mperatoa ka me'ungkahio kampilimami, tengkitaomo doi mami singge mia a nganga kampilino, moondo nahina makurano. Sine kanandio-andio wali kami mewawao.

²² Ka mpowawa kami koa mbo'u doi po'olimami kaanga. Nahi kimento'orio isema anu numaao doimami atuu a laro kampilimami.”

²³ Sine isangki ira, ”Pomperodo, si medoito! Ondae Ue Alamiu ka Ue Alado amamiu moweeakomiu arataa a laro kampilimiu; doimiu atuu kutarimaomo.” Ka i'amba i Simeo winawa meluarako ndi ondae.

²⁴ Mia atuu wawa ira a laro rahano i Yusupu, ka i'amba moweeako ira uwoi pewo'ohi ngkarudo. Ipaka ira mbo'u kalidedo.

²⁵ Umarino atuu domempatindao pesombado kontongaado mensikorio haweno i Yusupu ntonga oleo, hangano domerongeomo nine ira mpongkaa i tu'ai.

²⁶ Mansano mekule i Yusupu, domewawao pesombado ndi Yusupu anu hina ndi ondae a laro raha, ka do'amba mpesomba ndi onae hawe a wita.

²⁷ Umarino atuu ipesikenoakono teweweudo. Ka i'amba motae, ”Kana'umpe teweweudo amamiu anu mota'u iramo anu pinaumiu atuu? Da tuwu irake?”

²⁸ Mesangki ira, ”Ondae amamami, atamiu atuu, moiko ira koa; da tuwu ira.” Umarino atuu mpenggolontu ira ka mpesomba.

²⁹ Mansano mo'aroo i Yusupu pengkitano ikitaomo i Benami, uaino pe'asa ineno, ka i'amba motae, ”Onaeke andio uaimiu anu tompasusu atuu, anu pinaumiu ndi ongkue?” Ipotae mbo'u, ”Po'ineeomo Ondae Ue Ala moweeakomu pompehohawa, anaku!”

³⁰ I Yusupu mompari-pari lumako inso i tu'ai, hangano aroano te'urense kumitao uaino atuu, ka i'amba mo'ungke po'iangano mengese. Onae mewinso a laro bolongko ka ipengese i tu'ai.

³¹ Umarino atuu onae mero'u ka i'amba meluarako. Ipeteao aroano ka ipotae, ”Patindaomo kaanga.”

³² Ka i'amba pinatindaomo kaanga tiano i Yusupu pinesusua, tiado pepaekompono pinesusua ka tiado to Masiri anu mpongkaa meronga ondae atuu pinesusua. Hangano to Masiri nahi moiko dompe'asa mpongkaa saru to Ibarani, hangano anu kanatuu asa anu mokoburudo to Masiri.

³³ Luwuno pepaekompono atuu mpentoro i arono i Yusupu, mompu'u inso anu te'aka hawe anu tompasusu, ranta ka domemambekita saru kohali-hali.

³⁴ Ka do'amba mempinatindaako kaanga inso a medano i Yusupu, sine tiano i Benami meluka pelima lalu hadio inso a luwuno anu susua. Mpo'inu iramo ka memawongko saru onae.