Tegagia 40 - Wunta Mempori

Puu mpo'ipi mompau pengkonaano mo'ipi

¹ Ba opia tempo lembuino puu mpo'atora inuado mokole i Masiri ka puu mpo'atora rotido sala mpelelu a uedo, mokole i Masiri.

² Tekudaomo i Pirao a orua mia langkai potorono atuu, petewawado puu mpo'atora inua ka petewawado puu mpo'atora roti.

³ Itorungku ira a rahano petewawado puu mpodagai mokole, a laro torungku ukoano i Yusupu.

⁴ Petewawado puu mpodagai mokole moweeakono anggaa i Yusupu mokowali ira mpompekakaako ndi ondae. Kanandiomo domekongko a laro torungku ba opia tempo tehineno.

⁵ Ia asa wongi mo'ipi iramo orua ira, moiko puu mpo'atora inua maupo puu mpo'atora rotido mokole i Masiri, anu tinaha a laro torungku atuu. Singge ira mo'ipi ka mo'ipido pada hinao pengkonaano.

⁶ Tisomono mo'oru i Yusupu aiwa ndi ondae ka ikita ira kontongaado mompemasusa.

⁷ Ka i'amba mesikeno a orua mia langkai potorodo ndi Pirao anu tinaha saru onae a laro rahano uedo atuu, ”Tembio ka nahi sanaa rupamiu oleo andio?”

⁸ Dosangkio, ”Omami mo'ipi, sine nahina mia anu mokonto'orio pengkonaano.” Ka i'amba motae i Yusupu ndi ondae, ”Kombake Ondae Ue Ala anu mopoto'orio pengkonaano mo'ipi? Itutuluomo mo'ipimiu atuu ndi ongkue.”

⁹ Ka i'amba puu mpo'atora inua atuu tumutuluo mo'ipino ndi Yusupu, ipotae, ”A laro mo'ipiku tengkita hinao keu anggoro i aroku.

¹⁰ A ngkeuno anggoro atuu hinao otolu sampano. Dasaraipo keu atuu imentumba, sisino meluarakoomo ka luwuno tonggino buke wua anggoro anu motahaomo ntu'u.

¹¹ Pialano i Pirao kongko a ngkaeku, ka i'amba wua anggoro atuu ku'alao ka kuporo'io a laro pialano i Pirao. Ka i'amba tonde mekaru atuu kupeweengakono a ngkaeno i Pirao.”

¹² Motae i Yusupu ndi onae, ”Kanandiomo pengkonaano mo'ipi atuu: otolu sampa atuu pengkonaano otolu oleo.

¹³ I larono otolu oleo i Pirao ta tumandeko ka mokuleko a mpotoromu se'eluno ka omue komeweengakono piala atuu a ngkaeno i Pirao kana se'eluno, tempono da ugagi puu mpo'atora inuado.

¹⁴ Sine, rambe aku koa tempono teweweumu wali moiko. Popokitaomo pe'aroamu ndi ongkue ka ututuluakono i Pirao mongkona ongkue, ka doluarako aku inso a raha andio.

¹⁵ Hangano, mentee ntu'u ongkue pinolaisako inso i witado to Ibarani ka maupo i ndi'ai nahi kuhori moweweu hapa-hapa anu tekona kuwininso a laro aa torungku andio.”

¹⁶ Mansano kumitao petewawado puu mpo'atora roti moiko ntu'u pengkonaano mo'ipi atuu, ipotaeakono, ”Ongkue mbo'u mo'ipi. Tengkitaomo ongkue monsu'u otolu baki me'ihi kakaanga.

¹⁷ A baki i wawono ntu'u hinao mperupa-rupa kaanga tiano i Pirao, wineweudo puu mpo'atora roti, sine manu-manu mengkaano inso a baki a wawo uluku.”

¹⁸ Sumangki i Yusupu, ”Kanandiomo pengkonaano mo'ipi atuu: otolu baki atuu pengkonaano otolu oleo.

¹⁹ I larono otolu oleo andio i Pirao ta tumandeo ulumu i wawono ka ndumoeko a asa keu pinontade, ka do'amba mengkaano manu-manu ihimu inso a ngkoroimu.”

²⁰ Ka i'amba, a oleo ko'otolu, oleo hinaano i Pirao, i Pirao moweweu pelimbua tiado luwuno pegawaino. Itande ira petewawado puu mpo'atora inua ka petewawado puu mpo'atora roti atuu i olodo luwuno pegawaino:

²¹ Petewawado puu mpo'atora inua atuu pinokule a mpotorono, onaemo ka ipokompoweeakono mbo'u piala a ngkaeno i Pirao.

²² Posuleno, petewawado puu mpo'atora roti atuu indoeo, kana anu pinauno i Yusupu ndi ondae.

²³ Sine, petewawado puu mpo'atora inua atuu nahi rambeo mbo'u i Yusupu; ikolupeo.