Tegagia 4 - Wunta Mempori

I Kai ka i Abeli

¹ Mia atuu mewowaliakono i Hawa, beineno. Beine atuu mentia, ka ipe'anaakono i Kai ka ipotae, ”Mohawe akumo asa tama a pontulungi-Do i Ue.”

² Ka i'amba me'anaakono i Abeli, uaino i Kai. I Abeli gagi puu pompakambi asa bawaa bembe bimba, sekono i Kai gagi puu mpelere.

³ Ba opia tempo lembuino, i Kai mompesombaako asa ntia inso a hasilino wita atuu ndi Ondae i Ue gagi pesombano;

⁴ i Abeli mbo'u mompesombaako asa ntia inso a ana amba-ambano asa bawaa bembe bimbano saru tabano. Ondae i Ue merioo i Abeli saru pesombano atuu,

⁵ sine i Kai ka pesombano nahi Doperioo. Ka i'amba i Kai gagi tedoa mokula aroano, ka rupano mompemasusa.

⁶ Mepau Ira i Ue ndi Kai, ”Tembio kaimokula aroamu ka rupamu mompemasusa?

⁷ Komba ta moleoke rupamu, tewala moweweuko anu moiko? Sine tewala nahi moiko wineweumu, hala padasoomo i arono pewowa. Po'eheno aroano te'aro ndi omue, sine asalakono ka upabawaio.”

⁸ Motae i Kai ndi Abeli, uaino, ”Aiwa ka tolako a mpada.” Tempono ondae kongko a mpada, borono i Kai sumapoio i Abeli, uaino, ka ipepateo.

⁹ Mepau Ira i Ue ndi Kai, ”Isua i Abeli, uaimu atuu?” Sangkino, ”Nahi kuto'orio! Ongkueke puu mpodagai uaiku?”

¹⁰ Mepau Ira, ”Hapake anu umari wineweumu andio? Reano uaimu meboo-booli ndi Ongkue inso a wita.

¹¹ Kanandio-andio, tetotonaakomo, tensia inso a wita anu menganga tumarimao reano uaimu atuu inso a ngkaemu.

¹² Tewala mo'anggako wita atuu, wita atuu nahi ta moweeko mbo'u hasilino. Omue kogagi mia molai ka topelakopi i tolino.”

¹³ Motae i Kai ndi Ondae i Ue, ”Hukuku atuu langkaiopo sekono anu aku mokotembio.

¹⁴ Kanandio-andio Isaari aku inso i wita andio, ka aku tewuni inso i aro-Miu ka gagi mia molai ka topelakopi i tolino. Isema anu ta tepotowoku, manasa ta mepate aku.”

¹⁵ Mepau Ira i Ue ndi onae, ”Naahi ntu'u, isemamo koa anu mepateo i Kai ta pinombaloako meluka pepintu.” Ka Do'amba i Ue monaakono tondonino i Kai, ka si dompepateo mia isemamo koa anu tepotowoakono.

¹⁶ Ka i'amba i Kai lumako inso i aro-Do i Ue ka ipo'ia i wita Nodi, i sabaano oleo Paradesi.

¹⁷ I Kai mewowaliakono beineno, ka i'amba beine atuu mentia ka ipe'anaakono i Heno. Ka i'amba i Kai mowangu asa kota anu ineeakono Heno, montonda neeno anano.

¹⁸ I Heno hinao anano i Iradi, ka i Iradi hinao anano i Mehuiaeli, ka i Mehuiaeli hinao anano i Metusaeli ka i Metusaeli hinao anano i Lameki.

¹⁹ I Lameki orua beineno, anu asa meneeako i Ada, anu susuano meneeako i Sila.

²⁰ I Ada me'anaakono i Yabali; onaemo anu gagi amado mia anu mpo'ia a ngkema ka mpompekaria pinotuwu.

²¹ Neeno uaino, i Yubali; onaemo anu gagi amado luwuno mia anu mpemaeakono katapi ka siloli.

²² I Sila mbo'u me'anaakono i Tubali-Kai, pese'eludo luwuno puu mpo'angga mala ka puu mpo'angga labu. Uaino beine i Tubali-Kai onaemo i Na'ama.

²³ Motaeomo i Lameki a orua beineno, ”Ada ka Sila, iperorongeakono pauku, hei omiu beineno i Lameki, ita'oomo birimiu a mpinauku andio: Kupepateomo asa tama hangano ibelai aku, mompepate asa mia mongura hangano ibelai aku;

²⁴ Tewala i Kai asalakono pinombaloako meluka pepintu, i Lameki meluka pitu pulu ka opitu.”

²⁵ I Adama mewowaliakono mbo'u beineno. Ka i'amba beine atuu me'anaakono asa ana ntama ka ineeakono i Seti, hangano ipotae, ”Ondae Ue Ala moweeakunemo asa mia inule anu susua gagi euno i Abeli, hangano ipepateomo i Kai.”

²⁶ Asa mbo'u ana ntamano i Seti pine'anaako, ka ineeakono i Enosi. I tempomo atuu mia mpompu'u mpoboio nee-Do i Ue.