Tegagia 39 - Wunta Mempori

I Yusupu, inso a rahano i Potipa hawe a ntorungku

¹ I Yusupu winawa i Masiri, ka i'amba i Potipa, asa to Masiri, langkai potorono ndi Pirao, petewawado puu mpodagai mokole umolio inso a ngkaedo to Sumaila anu mewawao i ra'ai.

² Sine Ondae i Ue kumongkomio i Yusupu, ranta ka igagi mia mehasili. Onae mo'ia a rahano ueno, to Masiri atuu.

³ Ueno kumitao nine Ondae i Ue kumongkomio ka nine maupo hapa anu inanggano, Doweweuo i Ue mehasili.

⁴ I Yusupu mohawe pompehohawano ueno ka gagi puu pompekakaakono. I Yusupu pinoweeako pabawa a rahano ka luwuno arataano ipeweengakono a ngkaeno i Yusupu.

⁵ Mompu'u iweeakono i Yusupu pabawa a laro rahano ka a luwuno arataano, Ondae i Ue rumonsoo rahano to Masiri atuu hangano i Yusupu, ranta ronso-Do i Ue kongko a luwuno arataano, moiko anu i raha maupo anu i lere.

⁶ Ipeweengakono luwuno arataano a ngkaeno i Yusupu, ka hangano haweno i Yusupu onae nahi mokolili uluakono mbo'u maupo hapa sangkadio kaangano onaeno. I Yusupu atuu tekosi koroino ka montama rupano.

⁷ Telaloomo ba opia tempo kombiano ueno tedonta aroa kumitao i Yusupu, ka i'amba motae, ”Aiwamo poturi saru ongkue.”

⁸ Sine, i Yusupu nahi behe ka ipotaeakono kombiano ueno atuu, ”Haweku i ndi'ai ondae ueku nahi domokolili uluakono mbo'u maupo hapa anu kongko a laro raha andio ka dopeweengakonomo luwu arataado a ngkaeku.

⁹ Tamoako i raha andio, ondae nahi lalua sekono ongkue, ka nahina anu nahi dopeweengakono ndi ongkue sangkadio omiu, hangano omiu kombiado. Nde kana'umpe aku moweweu mosa'oa anu langkai andio ka moweweu hala ndi Ondae Ue Ala?”

¹⁰ Maupo beine atuu popandeio i Yusupu oleo me'eu oleo, nahi perioo ta moturi saru onae ke walino moturi.

¹¹ I asa oleo i Yusupu mewinso a laro raha ta umanggao anggaano, tekonai nahina maupo te'asa mia inso a ihino raha atuu kongko i raha.

¹² Ka i'amba beine atuu uminio i Yusupu ka idiio lembano ka ipotae, ”Aiwamo poturi saru ongkue.” Sine i Yusupu bintao lembano a ngkaeno beine atuu ka ipelulu meluarako.

¹³ Mansano kumitao beine atuu nine i Yusupu bintao lembano a ngkaeno ka molaiomo meluarako,

¹⁴ onae mebooli moboi ira ihino raha. Ipotae ndi ondae, ”Kitao, iwawao asa to Ibarani ndi ontae, ka ipemae-maeakita mia andio. Mia andio rumangkuhi aku ta moturi saru ongkue, sine mebooli aku meroku,

¹⁵ Mansano rumongeo kupebooli meroku ntu'u, ibintaomo lembano ndi ongkue ka ipelulu meluarako.”

¹⁶ Ka i'amba beine atuu numaao lembano i Yusupu i horino, ranta ka ipekule ueno.

¹⁷ Ipohaweomo ndi Potipa tutulu anu mengkena, ipotae, ”Ata to Ibarani anu winawamiu ndi ontae, rumangkuhi aku mingki memae-maeakune.

¹⁸ Sine tempono kupebooli meroku ntu'u, ibintaomo lembano ndi ongkue, ka i'amba melulu meluarako.”

¹⁹ Rumongeo tutulu pinohaweno kombiano ndi onae, ”Kanatuumo iweweu aku atamiu atuu,” onaemo ka itesingka tekudano ueno.

²⁰ Ka i'amba i Yusupu irakoo ueno ka wininso a laro torungku, ukoado luwuno tinahado mokole. Kanandiomo itinorungku i ra'ai.

²¹ Sine, Ondae i Ue kumongkomio i Yusupu ka pompehohawa-Do nahi otu-otu ndi onae. Doweweuo i Yusupu mohawe pompehohawa inso a mpetewawa torungku atuu.

²² Petewawa torungku me'ala-alaakono luwuno mia mentinaha a laro torungku atuu ndi Yusupu, ka luwuno anu asalakono wineweu i tu'ai, onaemo anu umorusuo.

²³ Petewawa torungku nahi salo-saloo luwuno anu ipe'ala-alaakono i Yusupu, hangano Ondae i Ue kumongkomio ka maupo hapa anu inanggano Ondae i Ue weweuo mehasili.