Tegagia 37 - Wunta Mempori

I Yusupu ka po'o'aliado pepaekompono

¹ I Yako mo'ia i wita Kana'a, i wita peratoano amano.

² Ndiomo tutuluno inuleno i Yako. I Yusupu anu tinuwuno hopulu ka opitu nta'u mompakambi asa bawaa bembe bimba saru luwuno pepaekompono. Onae wela mokowali ira anano i Biliha ka i Silipa, orua ira beineno amano. I Yusupu mohaweo ndi amano lele mongkona leludo pepaekompono anu mosa'o.

³ I Isaraeli lalu mehohawao i Yusupu sekonopo luwuno anano anu susua, hangano i Yusupu anano anu hina tempono imota'u. Onae metena moweweuakono lemba meloe anu tedoa tekosi.

⁴ Mansado mengkitao pepaekompono nine amado laluaopo ipehohawao i Yusupu sekonopo luwuno pepaekompono, onaemo ka dome'o'aliaakono ka nahi dompepauakono moi-moiko.

⁵ Pohona i Yusupu mo'ipi, ka i'amba mo'ipino atuu itutuluako ira pepaekompono. Onaemo pu'uno ka dontekense me'o'aliaakono.

⁶ Hangano ipotaeako ira, ”Imerongeo mo'ipi anu hinaweku andio.

⁷ Ontae tengkita tekonai a lere mponte'u wua gandu, nahi kinoo-koo mewanguako tine'uku ka mentade moleo. Ka i'amba luwuno tine'umiu aiwa melimbuo ka mpenggolontu mpesomba a ntine'uku.”

⁸ Dompotae pepaekompono ndi onae, ”Nde mingkikoke gagi mokolemami? Nde mingkikoke pabawai kami?” Tekense dome'o'aliaakono hangano mo'ipino ka hangano pinauno atuu.

⁹ Ka i'amba onae mohawe mbo'u mo'ipi anu susua ka itutuluako ira pepaekompono. Ipotae, ”Ongkue mo'ipi mbo'u. Tengkitaomo mata'oleo, wula ka hopulu ka asa anano wula mpenggolontu mpesomba ndi ongkue.”

¹⁰ Tempono itutuluo mo'ipino atuu ndi ondae amano ka luwuno pepaekompono, onae ikuahakono amano, ”Mo'ipi hapa atuu? Nde kana'umpemo ongkue ka inemu saru luwuno pepaekompomu aiwa mpenggolontu mpesomba ndi omue hawe a wita?”

¹¹ Luwuno mbo'u pepaekompono memosisiri ndi onae, sine amano numaao mongkona atuu i laro arono.

I Yusupu inasa i wita Masiri

¹² Asa tempo pepaekompono melako mpompakambi asa bawaa bembe bimbano amado umpeda i Sikemi.

¹³ Ka i'amba i Isaraeli motae ndi Yusupu, ”Kombake pepaekompomu mpompakambi asa bawaa bembe bimba umpeda i Sikemi? Aiwamo, aku tumenako lumako ndi ondae.” Sumangki i Yusupu, ”Humbee, ama.”

¹⁴ Motae i Isaraeli ndi onae, ”Lakomo pengkita kana'umpe teweweudo pepaekompomu ka teweweudo bawaano bembe bimba. Ka u'amba wawao lele ndi ongkue.” I Yako tumenao ka ilako inso i lembono Heberoni, ka haweomo i Yusupu i Sikemi.

¹⁵ Ka i'amba asa tama humaweo tekonai melempa ngkoraane ngkoramai a mpada, ka ipotae ndi onae, ”Hapa anu inungkemu?”

¹⁶ Isangkio, ”Ku'ungke ira pepaekompoku. Tulungi aku pauakune isua dopompakambi asa bawaa bembe bimba?”

¹⁷ Motae mia atuu, ”Mpelungka iramo inso i ndi'ai, hangano kurongeo dompotae: Aiwa tomelako i Dotani.” Ka i'amba i Yusupu tumonda lembui ira pepaekompono ka ihawe ira i Dotani.

¹⁸ Inso olai domengkitaomo. Sine se'eluno napi umpeda ndi ondae, ntepo'asa aroa iramo ira mpepateo.

¹⁹ Mpotae iramo pada ondaedo, ”Kitao, puu mpo'ipi atuu aiwa!

²⁰ Kanandio-andio, aiwamo tompepateo ka mpetadiakono a laro asa sumuru andio, ka to'amba mpotae: asa kondehora lambaha merangkamio. Kita koa mengkitao te'ingka hapa anu ta gagi saru luwuno mo'ipino atuu.”

²¹ Rumongeo mongkona atuu i Rube mingki motolao i Yusupu inso a ngkaedo, ipotae, ”Si tompepateo!”

²² Motae mbo'u i Rube ndi ondae, ”Si mpo'uwu rea, petadiakonomo koa a laro nsumuru anu kongko i pada one andio, sine siimo imbinio-mbio.” Tinoono motolao i Yusupu inso a ngkaedo ka wawao mekule ndi amado.

²³ Sahaweno i Yusupu a mpepaekompono domelohuo lemba meloeno i Yusupu anu tedoa tekosi anu pinakeno.

²⁴ Domewawao ka dompetadiakono a laro nsumuru. Sumuru atuu mooa nahi pe'uwoi.

²⁵ Ka do'amba mpentoro ira mpongkaa. Tempono dompengkita ngkoraane, domengkita iramo puu mpebalu-balu to Sumaila anu me'aiwa inso i Gileadi. Luwuno untado mpowawa hulu, balasee, ka hulu ladana. Ondae tekonai a laro mpelempaa mewawao luwuno sangka atuu i Masiri.

²⁶ Ka i'amba motae i Yehuda a luwuno pepaekompono, ”Hapa urano ba tompepateo uaito ka mewunio reano?

²⁷ Aiwa tome'asao a nto Sumaila atuudo. Sine si tomembio-mbioo, hangano onae pepaekompoto, rea ka ihito.” Luwuno pepaekompono mperorongeakono.

²⁸ Mansado ntelalo puu mpebalu-balu Midia atuu, i Yusupu pinadii i wawono inso a laro nsumuru atuu, ka i'amba inasa a nto Sumaila atuu me'oli rua pulu sikala salaka. Ka do'amba mewawao i Yusupu i Masiri.

²⁹ Tempono ipekule i Rube a nsumuru atuu, ikitao i Yusupu nami kongko mbo'u i larono. Ka i'amba berio lembano

³⁰ ka ipekule a mpepaekompono, ipotae, ”Nana'ote atuu nahi kongko mbo'u. Hapa anu asalakono kuweweuo?”

³¹ Ka do'amba me'alao lemba meloeno i Yusupu ka mensumbeleo asa bembe, ka do'amba me'emoo lemba meloe atuu a laro reano.

³² Lemba meloe anu tedoa tekosi atuu dome'oliwio ndi amado saru pe'oliwi, ”Kimehaweo andio. Iparesaomo ba lemba meloeno anamiu andio ke naahi?”

³³ Mansano paresao i Yako lemba meloe atuu, ipotae, ”Ndio lemba meloeno anaku! Iperangkamiomo kondehora lambaha. Manasaomo i Yusupu pinerangkamiomo.”

³⁴ I Yako berio lemba meloeno, ka i'amba mokonao sawu po'inombo a ntongano. Onae mompemasusa i larono ba'opia oleo tehineno hangano anano atuu.

³⁵ Luwuno anano tama ka beine mpopete'umala mentareroo, sine nahi behe tinarero. Ipotae, ”Naahi! Aku mompemasusa ranta ka kupetii tepohaweakono anaku a mpo'iangado mia mate!” Kanandiomo amano mengeseio i Yusupu.

³⁶ Kontongaano atuu i Yusupu dome'asao to Midia atuu i Masiri, ndi Potipa, asa mia langkai potorono ndi Pirao, petewawado anu mpodagai mokole.