Tegagia 35 - Wunta Mempori

I Yako mekule i Beteli

¹ Ondae Ue Ala mepau ndi Yako, ”Pepatindamo, lakomo i Beteli, po'iamo i ra'ai. Weweuomo i ra'ai meda pontunua pesomba ndi Ondae Ue Ala, anu mepopokita Iramo ndi omue, tempono upolai inso ndi Esau, pepaekompomu.”

² Ka i'amba motae i Yako a luwuno pe'asa rahano ka luwuno mia anu perongano, ”Imentadio luwuno pinesombai susua anu kongko i olomiu, impokomemporiomo koroimiu ka ime'euomo sangkamiu.

³ Aiwamo tompepatinda ka melako i Beteli. Aku moweweu meda pontunua pesomba ndi Ondae Ue Ala i ra'ai anu sumangki akumo i tempono pompema'isoku ka anu kumongkomi akumo a nsala anu tinondaku.”

⁴ Dompeweengakono ndi Yako luwuno pinesombai susua anu pine'uedo ka tole-tole anu kongko a birido. Ka i'amba tumanoo i Yako a toto ngkeu tarabanti umpeda i Sikemi.

⁵ Umarino atuu mpelungka iramo. Mongkokongiria inso ndi Ondae Ue Ala umaluo luwuno kota petengi-tengido onaemo ka nahi domelinampui anano i Yako.

⁶ Ka i'amba haweomo i Yako i wita Lusi onaemo Beteli, anu i wita Kana'a, onae ka luwuno mia anu perongano.

⁷ Iwanguo meda pontunua pesomba i tu'ai ka numeeakono po'ianga atuu Eli-Beteli, hangano Ondae Ue Ala mepokomengkaa Iramo ndi onae i tu'ai, tempono ipolai inso a mpepaekompono.

⁸ I Debora, puu mpete'iano i Ribeka, mate. Onae kinaburu te'alaako i totono Beteli, a toto ngkeu tarabanti, anu domeneeakono mia: Keu Tarabanti Pengesea.

⁹ Ondae Ue Ala mepopokita mbo'u ndi Yako mansano hawe inso i Padana-Arami, ka rumonsoo.

¹⁰ Pau-Do Ue Ala ndi onae, ”Neemu i Yako. Neemu nahi ta pinau mbo'u i Yako, tendeano i Isaraeli ta gagi neemu.” Kanandiomo Ondae Ue Ala numeeakono i Isaraeli.

¹¹ Ondae Ue Ala mepau mbo'u ndi onae, ”Ongkuemo Ue Ala Anu Tedoa Pabawa. Impo'ulemo ka intetiangimo; asa tongku, tendeano asa tepumpuano luwuno tongku, ira mehina inso ndi omue ka luwuno mokole ira ntepu'u inso ndi omue.

¹² Wita andio anu Kuweeakonomo i Burahima ka i Saki, Aku weeakomu ka a inulemu.”

¹³ Umarino atuu Ondae Ue Ala mewuatako bintao i Yako inso a mpo'ianga-Do mepau ndi onae.

¹⁴ Ka i'amba i Yako mompontade tugu a mpo'ianga-Do Ue Ala mepau ndi onae, asa tugu watu. Ipesombaakono pesomba tinawa ka tumawao lana i wawono.

¹⁵ I Yako numeeakono po'ianga pepau-Do Ue Ala ndi onae ”Beteli.”

Hinaano i Benami ka mateno i Raheli

¹⁶ Umarino atuu ondae mpelungka inso i Beteli. Tempono nahi dome'olai mbo'u inso i Eparata, i Raheli me'ana, sine pe'anano tedoa motungko.

¹⁷ I tempono pe'anano anu motungko atuu, motaeomo sando mpe'ana ndi onae, ”Si doito, pohona mbo'u andio ana ntama anu hinawemu.”

¹⁸ Se'eluno napi tampula penaano hangano onae mate, ipoponeeo anano atuu i Beni-Oni, sine amano numeeakono i Benami.

¹⁹ Kanandiomo mateno i Raheli, ka i'amba kinaburu a nsala lumako i Eparata, onaemo Beteleme.

²⁰ I Yako mompontade tugu i wawono kaburuno; onaemo atuu tugu kaburuno i Raheli hawe kanandio-andio.

²¹ Umarino atuu melungkaomo i Isaraeli, ka i'amba pasao kemano i asatowano Migidali-Ederi.

^22a Tempono i Isaraeli mo'ia i wita andio, gagiomo nine i Rube lumako moturi saru i Biliha, kombia mongurano amano, ka i Isaraeli rumongeo anu gagi atuu.

Luwuno anano i Yako ka mateno i Saki

^22b Luwuno ana ntamano i Yako porokono hopulu ka orua.

²³ Luwuno anano inso ndi Lea onaemo i Rube, ana akano i Yako, ka i'amba i Simeo, i Lewi, i Yehuda, i Isakari ka i Sebulo.

²⁴ Luwuno anano inso ndi Raheli onaemo i Yusupu ka i Benami.

²⁵ Luwuno anano inso ndi Biliha, ata beineno i Raheli onaemo i Dani saru i Napatali.

²⁶ Luwuno anano inso ndi Silipa, ata beineno i Lea onaemo i Gadi ka i Asere. Onaemo atuu luwuno ana ntamano i Yako anu pine'anaako i Padana-Arami.

²⁷ I Yako aiwa ndi Saki, amano, i Mamere umpeda i Kiriati-Araba, onaemo atuu Heberoni. I tu'aimo dopo'ia i Burahima ka i Saki gagi mia mehawe.

²⁸ Tinuwuno i Saki asa etu ka halopulu nta'u.

²⁹ Ka i'amba i Saki tampula penaano, mate ka pinumpu a uempu'uno; onae mota'u ka tende ntinuwu. I Esau ka i Yako, anano kumaburuo.