Tegagia 34 - Wunta Mempori

I Dina ka i Sikemi

¹ Asa tempo i Dina, ana beineno i Lea anu pine'anaakono ndi Yako, lumako tepohaweako ira beine i wita atuu.

² Mansano i Sikemi, anano i Hemori, to Hewi, anu pabawa i wita atuu, kumitao i Dina, ipolaisakono ka idadaio.

³ Sine aroano metako ndi Dina, anano i Yako; tedonta aroano a ana beine atuu, ka i'amba mokorodoakono aroano ana beine atuu.

⁴ Ka i'amba motaeomo i Sikemi ndi Hemori, amano, ”Ipesikenoakune a ana beine andio gagi beineku.”

⁵ Irongeo i Yako nine i Sikemi sumosa'aio i Dina, ana beineno. Sine luwuno ana ntamano mekongko ira a mpada saru pinotuwudo, onaemo ka ipenoro-noro mpiha i Yako ranta ka dompekule.

⁶ I Hemori amano i Sikemi, lumako tepohaweakono i Yako ta mepauakono.

⁷ Tempono dompekule anano i Yako inso a mpada, domerongeo anu gagi atuu. Mia andiodo memahaki aroa ka tedoa ira ntekuda hangano i Sikemi moweweuomo mokoburu i olodo to Isaraeli mewowaliakono ana beineno i Yako, hangano poweweu anu kanandio nahi moiko iwineweu.

⁸ I Hemori mepau ndi ondae kanandio, ”Aroano i Sikemi anaku kumekewoio anamiu. Tewala impemoikoo iweeakonomo gagi beineno anaku,

⁹ ka po'ineeomo to mpenggoe rea molalo pekombiaa; iweeakamimo ana beinemiu ndi omami ka ime'ala iramo ana beine mami.

¹⁰ Impo'iamo i olomami; wita andio te'ungkahi ndi omiu. Impo'iamo i ndi'ai, impelelumo po'ehemiu, ka impope'uemo wita i wita andio.”

¹¹ Ka i'amba i Sikemi motaeakono amano nana'ote atuu ka a luwuno pepaekompono, ”Po'ineeomo ka kupohawe pompehohawamiu, hapa anu inemamiu ndi ongkue aku meweengakono.

¹² Maupo te'opia hadiono doi gau pekombiaa ka pompowee anu imempopotembiakune, aku weeakomiu kana anu inemamiu ndi ongkue. Polomo koa, weeakunemo ana beine atuu gagi beineku.”

¹³ Ka i'amba luwuno anano i Yako atuu sumangkiako ira pe'akala i Sikemi ka i Hemori, amano. Hangano i Sikemi sumosa'aiomo i Dina, uaido,

¹⁴ mpotae iramo a orua mia atuu, ”Nahi kami mpokoweweuo anu kanandio, meweengakono uaimami a asa tama anu nahi petindi hangano anu kanatuu gagi mokoko'iia ndi omami.

¹⁵ Butu kanandio pesalaano ka kimpoko'induo po'emamu. Tewala omiu mpengkena kana omami, sompo tama i olomiu tinindi,

¹⁶ ka ki'amba mpeweengako ira ana beinemami ndi omiu ka mpo'ala ana beinemiu. Kami koa mpo'ia i olomiu, ka kita megagi asa tongku.

¹⁷ Sine tewala nahi iperorongeakono po'emamami ka impetindi, kami wali me'alao ana beinemami, ka ki'amba melako.”

¹⁸ Pinaudo dopemoikoo i Hemori ka i Sikemi, anano i Hemori.

¹⁹ Mia mongura atuu mompari-pari weweuo, hangano ineheno a anano i Yako. Metiangi mbo'u onae asa mia anu tedoa pinelangkai i olodo luwuno pe'etuno.

²⁰ Ka i'amba i Hemori ka i Sikemi, anano, lumako a mpewowa langkaino kotado, ka dopepau a mpalilino kota atuu, kanandio,

²¹ ”Mia atuudo inehedo tuwu manangai saru ontae. Po'ineeomo dompo'ia i wita andio ka dompelelu po'ehedo; kombake wita andio sompo molueno tiado? Moiko tompo'ala ana beinedo gagi beineto ka moiko tompoweeako ira ana beineto.

²² Sine, butu ndio po'emado mia atuudo me'induo mpo'ia i oloto, ka tomegagi asa tongku: sompo tama i oloto tinindi kana ondae mbo'u mentinindi.

²³ Arataa, ka luwuno pinotuwudo, kombake luwuno atuu ta gagi ontae mpe'ueo? Po'ineeomo koa tome'induo po'emado, ka dokongko mpo'ia i oloto.”

²⁴ Po'emado i Hemori ka i Sikemi, anano, dome'induo luwuno mia anu hawe a mpewowa langkaino kota atuu. Ka i'amba tinindiomo sompo tama, onaemo luwuno anu hawe a mpewowa langkaino kota.

²⁵ A oleo ko'otolu, tempono kontongaado mpompemahaki, i Simeo ka i Lewi, orua ira anano i Yako, luwuno pepaekompono i Dina, singge umalao ponaido. Dosapoio kota atuu nahina anu umewa saru mpepate ira sompo tama.

²⁶ I Hemori mbo'u ka i Sikemi, anano, dopepateako ira mata mponai. Do'alao i Dina inso a rahano i Sikemi, ka do'amba lumako.

²⁷ Ka i'amba mehawe iramo anano i Yako merontuo arataado mia anu mempinepate atuu, ka dompomuruo kota atuu, hangano sinosa'aiomo uaido.

²⁸ Bawaano bembe bimba ka sapido, kalidedo ka luwuno anu kongko i larono ka i bungkuno kota atuu domewawao.

²⁹ Luwuno kaeano ka luwuno anano ka beineno domentawa ira ka mpomuruo, tewinso luwuno anu hina a luwuno raha.

³⁰ I Yako motaeako ira i Simeo ka i Lewi, ”Isolangi akumo mokomosa'oo neeku a mpalilino wita andio, a nto Kana'a ka to Perisi, kahinaano luwuno miaku tedei koa. Tewala ntepo'asa ira me'ewai aku, manasa domenangi aku, ka aku pinepate, ongkue saru luwuno ihino rahaku.”

³¹ Sine sumangki ira, ”Tembio uaito ka iwineweu kana asa beine belesu!”