Tegagia 3 - Wunta Mempori

Mia tedonta a laro hala ka poko'ariano

¹ Ule onaemo anu lalu pande i olono luwuno kondehora mo'ila anu pinokogagi-Do Ue Ala. Ule motaeakono beine atuu, ”Manasa Ondae Ue Ala mepau, ’Si kaano wuano luwuno keu a bonde andio,’ menteeke?”

² Sumangki beine atuu a ule, ”Wuano luwuno keu a bonde andio moiko kikaano,

³ sine mongkona wua inso a ngkeu anu kongko i tonga-tongano bonde, Ondae Ue Ala mepau: Si kaano ke maupo dumanggio, te'ingka mate komiu.”

⁴ Sine, ule motaeakono beine atuu, ”Mentee ntu'u nahi komiu mate.

⁵ Tendeano, Doto'orio Ue Ala, nine tempono ikaano matamiu ta te'ungkahi, ka komiu gagi kana Ondae Ue Ala, tumo'orio mongkona anu moiko ka anu mosa'o.”

⁶ Ikitao beine atuu nine wua ngkeu atuu moiko ba ikinaa ka tekosi kikitaano. Ka mbo'u, keu atuu mompadii aroa hangano mompowee ponto'ori. Ka i'amba mo'opu wuano ka ikaano; ipoweeakono mbo'u tamano anu perongano, ka tamano mbo'u kumaano.

⁷ Ka i'amba te'ungkahiomo matado orua ira ka doto'orio nine kolambe-lambe ira. Doposombu ira lewe ngkeu ara ka doweweuo kembido.

⁸ Tempono dorongeo suara-Do Ue Ala anu melempa-lempa a bonde owowa oleo, mia atuu ka beineno mewuni inso i aro-Do Ue Ala i olodo keu a laro bonde.

⁹ Ondae Ue Ala moboio mia atuu, ka Dopepau, ”Isuakoke?”

¹⁰ Onae sumangki, ”Tempono kurongeo suara-Miu a bonde, gagi aku doito, hangano kolambe-lambe aku, onaemo ka kupewuni.”

¹¹ Pau-Do, ”Isemake pauakomu nine omue kolambe-lambe? Nde ukaanoke wuano keu anu Ku'ontoo ba ikinaa?”

¹² Sumangki mia atuu, ”Beine anu Iweeakune i horiku, onaemo anu moweeakune wuano keu atuu, ka kukaano.”

¹³ Mepau Iramo Ue Ala a beine atuu, ”Hapa anu wineweumu andio?” Motae beine atuu, ”Ule atuu anu popandei aku, ka kukaano.”

¹⁴ Ka i'amba Ondae Ue Ala mepau a ule atuu, ”Hangano moweweukomo kanatuu, tetotonaakomo i olodo luwuno pinotuwu ka i olodo luwuno kondehora mo'ila. Omue komelempaako kompomu ka awu wita ta kaangamu asa ntinuwumu.

¹⁵ Aku moweweu pe'iwalia i olomu ka beine andio, i olodo inulemu ka inuleno; inuleno ta puroo ulumu, ka omue kotumungkuo tundono.”

¹⁶ Mepau Ira a beine atuu, ”Aku mokohadioo pe'iseimu tempono umentia; upe'ana komompemahaki; po'eheno aroamu te'aro a ntamamu, sine onae ta pabawaiko.”

¹⁷ Ka Do'amba mepau ndi Adama, ”Hangano omue merorongeakono pauno beinemu ka mongkaa wuano keu anu umari Kuparentaakomu: Si kaano, ka tetotonaaomo wita hangano wineweumu atuu. Kome'i'isei mo'ungke kaangamu inso a wita atuu asa ntinuwumu.

¹⁸ Tongangkura rui ka ewo rui ira mentuwu a witamu, ka pinopaho a lere ta gagi kaangamu;

¹⁹ saru te'iti ko'isomu mo'ungke kaangamu, ranta ka upekule gagi wita, hangano inso i ra'ai u'inala. Hangano omue awu wita, komekule gagi awu wita.”

²⁰ Mia atuu numeeakono beineno i Hawa, hangano onae gagi ine a luwuno anu tuwu.

²¹ Ondae Ue Ala moweweuakono i Adama ka beineno lemba meloe inso a ngkuli, ka Do'amba mokonaako ira.

²² Mepau Iramo Ue Ala, ”Menteeano mia gagiomo kana asa inso ndi Ontae, tumo'orio mongkona anu moiko ka anu mosa'o. Kanandio-andio, kasi mansa tumandeo kaeno ka ipo'ala mbo'u wuano keu tuwua atuu kumaano, ka ituwu ranta nahina tampulaano.”

²³ Onaemo pu'uno Ondae Ue Ala sumaario inso a bonde Paradesi ka i'anggao wita insoano i'inala.

²⁴ Dosaario mia ka i sabaano oleo bonde Paradesi Donaa ira kerubi saru ponai anu langano tesiarawo, anu dumagaio sala lumako a ngkeu tuwua.