Tegagia 29 - Wunta Mempori

I Yako kumombiao i Lea ka i Raheli

¹ Ka i'amba melungkaomo i Yako inso i tu'ai lumako i witado to sabaano oleo.

² Tempono mengkita limbu-limbu, i kitaomo asa sumuru a mpada ka otolu bawaa bembe bimba mpelungku umpeda a nsumuru atuu. Hangano, inso a nsumurumo atuu mia mpopo'inu ira bawaano bembe bimba atuu. Ka ndio watu tutuwino sumuru atuu, langkai.

³ Tewala luwuno bawaano bembe bimba atuu mepinumpu i ra'ai, luwuno puu mpopakambi melundio watu atuu inso a ngangano sumuru, ka i'amba bawaano bembe bimba atuu mempinopo'inu. Ka i'amba watu atuu pinokule a ngangano sumuru atuu.

⁴ Mesikenoomo i Yako ndi ondae, ”Pepaekompo, inso isuake omiu?” Mesangki ira, ”Omami inso i kota Harani.”

⁵ Ipotaeako ira mbo'u, ”Nde imento'orioke i Laba, ana'ueno i Nahori?” Mesangki ira, ”Humbee, kimento'orio.”

⁶ Isikeno ira mbo'u, ”Nde moi-moiko ira koake?” Mesangki ira, ”Humbee, moi-moiko ira koa. Kitao, atuu i Raheli, anano anu beine, aiwa saru asa bawaa bembe bimbano.”

⁷ Ka i'amba motae i Yako, ”Da ondau oleo, napi tempono domepinumpu pinotuwu. Ipopo'inu ira bawaano bembe bimbamiu atuu, ka i'amba melako pakambi ira mbo'u.”

⁸ Sine, mesangki ira, ”Nahi kami mpokoweweuo atuu sangkadio tepumpuomo luwu bawaano pinotuwu atuu. Umarino atuu ka i'amba linundi watu atuu inso a ngangano sumuru ka kimpopo'inu ira bawaano bembe bimba mami.”

⁹ Kontongaano mepauako ira, haweomo i Raheli saru asa bawaa bembe bimbano amano, hangano onaemo anu pakambi ira.

¹⁰ Mansano kumitao i Yako i Raheli, anano i Laba pepaekompono ineno, saru asa bawaa bembe bimbano i Laba, aiwaomo merangkuhako, ka i'amba lumundio watu atuu inso a ngangano sumuru, ka ipopo'inu ira asa bawaa bembe bimbano i Laba, pepaekompono ineno.

¹¹ Ka i'amba i Yako woo-wooo i Raheli saru mengese meroku.

¹² Ka i'amba i Yako pauakono i Raheli nine onae pe'etuno amano i Raheli, ka anano i Ribeka. Meluluomo i Raheli tumutuluakono amano.

¹³ Nahi tehine umarino rumongeo i Laba lele mongkona i Yako, anano pepaekompono atuu, meluluomo tumotowoo. Ikopuio ka iwoo-wooo i Yako, ka i'amba wawao i rahano. Ka i'amba i Yako tumutuluakono i Laba luwuno anu pinembasaino.

¹⁴ Motae i Laba ndi onae, ”Menteeomo omue rea ka ihiku.” Mo'iaomo i Yako saru onae i larono asa wula.

¹⁵ Ka i'amba i Laba motaeakono i Yako, ”Butu hangano omue pe'asa reaku, tekonake omue mo'angga mpena ndi ongkue? Pauakune hapa anu tekona gagi tambomu.”

¹⁶ I Laba hinao anano orua ira ana beine; anu aka neeno i Lea ka anu uai neeno i Raheli.

¹⁷ I Lea moleu-leu pematano, sine i Raheli tekosi koroino ka tekosi rupano.

¹⁸ I Yako tedonta aroano ndi Raheli. Onaemo ka ipotae, ”Aku mo'angga ndi omiu i larono opitu nta'u ka iweeakune i Raheli, anamiu anu uai atuu.”

¹⁹ Sumangki i Laba, ”Laluopo onae kuweeakomu sekonopo a mia susua. Po'iamo ndi ongkue.”

²⁰ Ka i'amba i Yako mo'angga i larono opitu nta'u ka iwineeako i Raheli. Sine, tempo opitu nta'u atuu ituduo kana ba opia oleo koa hangano tedonta aroano ndi Raheli.

²¹ Umarino atuu i Yako motaeakono i Laba, ”Iweeakunemo anu ta beineku atuu, hangano sompoomo tempoku, ka kupewowaliakono.”

²² Ka i'amba i Laba umolu ira luwu mia a mpo'ianga atuu ka ipoweweu pelimbua.

²³ Sine, i tempono wongi i Laba umalao i Lea, anano, ka iwawao ndi Yako. Ka i'amba i Yako mewowaliakono.

²⁴ I Laba, meweengakono mbo'u i Silipa, atano beine ndi Lea, anano, gagi atano.

²⁵ Tempono mo'oru mengkaa beine atuu i Lea! Ka i'amba i Yako motaeakono i Laba, ”Hapake anu wineweumiu ndi ongkue? Kombake ka kuhaweo i Raheli kupo'angga ndi omiu? Tembio ka ipopo'oo aku?”

²⁶ Sumangki i Laba, ”A mpo'ianga mami andio nahi domeleleongakono mia mpoweweu kanandio: mopokombiao uaino mese'elungio akano.

²⁷ Pokosompoomo ari opitu oleo pekombiamu saru anaku andio. Ka i'amba anaku anu susua mbo'u kowineeako gagi tambomu, poolo ka upo'angga ndi ongkue opitu nta'u mbo'u.”

²⁸ Iweweuomo i Yako kanatuu. Ipokosompoo opitu oleo pekombiano saru i Lea, ka i'amba i Laba weeakono i Raheli, anano gagi beineno.

²⁹ I Laba mbo'u meweengakono i Biliha, atano beine ndi Raheli, anano, gagi atano.

³⁰ I Yako mbo'u mewowaliakono i Raheli, tendeano ikekewoiopo i Raheli sekonopo i Lea. Kanatuumo ipo'angga ndi Laba i larono opitu nta'u mbo'u.

Luwuno anano i Yako

³¹ Mansa-Do kumitao i Ue nine i Lea nahi kekewoio, Do'ungkahiakono pe'anakaano, sine i Raheli biita nahi pe'ana.

³² I Lea mentia, ka ipe'anaakono asa ana ntama, ineeakono i Rube, hangano ipotae, ”Menteeano Dokitaomo i Ue marasaiku; kanandio-andio manasa tamo kumekewoi aku tamaku.”

³³ Onae mentia mbo'u, ka ipe'anaakono asa ana ntama, ipotae, ”Menteeano Dorongeomo i Ue nine nahi kukinekewoi, onaemo ka Dopoweeakune mbo'u ana andio.” Ka i'amba numeeakono anano atuu i Simeo.

³⁴ Onae mentia mbo'u, ka ipe'anaakono asa ana ntama. Ipotae, ”Pohona andio tamaku ta laluopo metako ndi ongkue, hangano otolumo ana ntama kupe'anaakono.” Onaemo pu'uno ineeakono anano atuu i Lewi.

³⁵ Onae mentia mbo'u, ka ipe'anaakono asa ana ntama. Ipotae mbo'u, ”Pohona andio, aku montarimakasi ndi Ondae i Ue.” Onaemo pu'uno ka ineeakono anano atuu i Yehuda. Umarino atuu nami pe'ana mbo'u.