Tegagia 26 - Wunta Mempori

I Saki, i Ribeka ka i Abimele

¹ Gagiomo mokoninggoa i wita atuu, susua mbo'u mokoninggoa amba-ambano anu gagiomo tempono i Burahima. Onaemo pu'uno i Saki ka ilako i Gerari, ndi Abimele, mokoledo to Pelisiti.

² Ka Do'amba i Ue mepopokita ndi onae saru mepau, ”Siimo lako i wita Masiri, po'iamo i wita anu Aku pauakomu.

³ Po'iamo i wita andio gagi mia mehawe. Aku kumongkomiko ka rumonsoko, hangano ndi omuemo ka a inulemu Aku meweengakono luwuno wita andio ka Aku umihiio sumpa anu Kupauomo ndi Burahima, amamu.

⁴ Aku weweuo inulemu hadio kana anano wula i langi. Aku weeako ira inulemu luwuno wita andio, ka hangano inulemu luwuno tongku i tolino ira mpohawe ronso.

⁵ Hangano, iperorongeakonomo i Burahima pau-Ku ka metenunu weweuo anu asalakono iweweuo ndi Ongkue: luwuno parenta, pompakosi, ka songka-Ku.”

⁶ Gagi mo'iaomo i Saki i Gerari.

⁷ Tempono mia a mpo'ianga atuu mpesikeno mongkona beineno, motaeomo, ”Onae pepaekompoku,” hangano doitono pauo, ”Onae beineku,” hangano ipewowoloo, ”Ba mansa dompepate aku palili a mpo'ianga andio hangano i Ribeka, nde tekosi rupano.”

⁸ Mansano mo'ia i ra'ai ba opia tempo tehineno, i Abimele, mokoledo to Pelisiti atuu mentango inso a pentangoa, ikitao i Saki tekonai mewoo-woo saru i Ribeka, beineno.

⁹ Ka i'amba i Abimele moboio i Saki ka ipotae, ”Menteeano onae beinemu, kana'umpe ka upotae: Onae pepaekompoku?” Sumangki i Saki ndi onae, ”Hangano kupewowoloo: Ba mansa aku mate hangano onae.”

¹⁰ Sine motae i Abimele, ”Hapa andio anu wineweumu ndi omami? Ta mansa gagi, asa mia inso a tongku andio me'asa mpoturiakono beinemu, ranta ka upoweweuakami salamami.”

¹¹ Ka i'amba i Abimele moluarako parenta a luwuno tongkuno, ”Isema anu dumanggio mia andio ke beineno, manasa onae hinuku mate.”

Pedandiado i Saki ka i Abimele

¹² I Saki morawo inii i wita atuu ka ilarono ta'u koa mbo'u atuu onae mohawe hasilino meluka asa etu. Onae Doronsoo i Ue.

¹³ Mia andio gagi kaea, kotehi-tehineno kokae-kaeano, ranta ka igagi tedoa kaea.

¹⁴ Onae hinao bawaano bembe bimbano ka sapino saru hadio atano, ranta to Pelisiti memosisiri ndi onae.

¹⁵ Luwuno sumuru, anu a tempono i Burahima, amano, kinekedo atano amano atuu, dometutuwiomo to Pelisiti ka hinowuiako wita.

¹⁶ Ka i'amba i Abimele motaeakono i Saki, ”Lakomo inso ndi omami hangano omue gagikomo lalua pabawa sekono omami.”

¹⁷ Lumakoomo i Saki inso i tu'ai, mekema i lembono Gerari ka mo'iaomo mpiha i ra'ai.

¹⁸ Ka i'amba i Saki wali kumeke ira sumuru uwoi anu kineke tempono i Burahima, amano, ka anu domentutuwiomo to Pelisiti umarino mate i Burahima. Ineeakono luwuno sumuru atuu montonda luwuno nee anu dopoponeeakono amano.

¹⁹ Tempono dompokeke atano i Saki i lembono atuu, domehaweo i tu'ai mata uwoi anu da tuwu.

²⁰ Ka i'amba puu mpopakambido to Gerari mpe'u'ua saru puu mpopakambino i Saki. Dompotae, ”Uwoi andio uwoimami” I Saki numeeakono sumuru atuu Eseki, hangano ondae mpe'u'ua saru onae.

²¹ Ka do'amba mpokeke sumuru susua, ka mia atuudo mpe'u'uaakono mbo'u sumuru atuu. I Saki numeeakono sumuru atuu, Sitina.

²² Onae melimba inso i tu'ai ka mongkeke sumuru susua, sine mongkona sumuru andio nahi dompe'u'ua. Sumuru andio ineeakono Rehobo, ka ipotae, ”Kanandio-andio Dopokomalua kitamo i Ue, ranta ka tompokompo'ule i wita andio.”

²³ Inso i ra'ai onae lumako i Bereseba.

²⁴ Ia wongi atuu Ondae i Ue mepopokita ndi onae saru mepau, ”Ongkuemo Ue Alano i Burahima, amamu. Si doito, hangano Ongkue kumongkomiko. Aku rumonsoko ka weweuo inulemu hadio hangano tetenaa-Ku i Burahima.”

²⁵ Ka i'amba i tu'ai i Saki mowangu meda pontunua pesomba ka moboio nee-Do i Ue. Ipasao kemano i tu'ai, ka i tu'aimo atano dompokeke sumuru.

²⁶ Haweomo i Abimele inso i Gerari ndi Saki, meronga i Ahusati, sambe'eno ka i Pikoli, petewawa sorodaduno.

²⁷ Sine motae i Saki ndi ondae, ”Tembio ka ime'aiwa ndi ongkue? Kombake ime'o'aliaakune, ka imentena akumo lumako inso ndi omiu?”

²⁸ Mesangki ira, ”Kimengkitaomo, nine omue Doronsoko i Ue. Onaemo ka kimpotae: Moikoopo tompoweweu sumpa petenunu i oloto, olomami ka omue. Moikoomo kimpowutu pedandia saru omue:

²⁹ Omue nahi komoweweu mosa'o ndi omami, kana omami nahi kami merisuiko, kana omami mpoweweu butu anu moiko ndi omue, ka mpo'ineeko ka ulako saru sintuwu. Kanandio-andio omue anu Doronsoko i Ue.”

³⁰ Ka i'amba i Saki moweweuako ira pelimbua, ka dompongkaa ka mpo'inu.

³¹ Tisomono mo'oru pada iramo mpesumpa. Ka i'amba motola ira i Saki melako, ka ondae mebintao saru sintuwu.

³² Ia Oleo atuu atano i Saki mehawe ira mempauakono mongkona sumuru anu domengkekeomo, saru mpotae ndi onae, ”Mpohawe kamimo uwoi.”

³³ Ka i'amba numeeakono sumuru atuu Sieba. Onaemo pu'uno neeno kota atuu Beresieba, hawe kanandio-andio.

I Esau ka orua ira kombiano

³⁴ Tempono tinuwuno i Esau pato pulu nta'u, i'alao i Yuditi, anano i Be'eri to Heti, i Basama mbo'u, anano i Eloni to Heti, gagi beineno.

³⁵ Beine orua ira atuu mokomahakio aroado i Saki ka i Ribeka.