Tegagia 25 - Wunta Mempori

Inuleno i Burahima inso ndi Ketura

¹ I Burahima mo'ala mbo'u asa mia beineno, neeno i Ketura.

² Beine atuu me'anaakono i Simurani, i Yokisani, i Medani, i Midiani, i Isabaki ka i Suahi.

³ I Yokisani hinao anano i Sieba ka i Dedani. Inuleno i Dedani, onaemo to Asuri, to Letusi ka to Leumi.

⁴ Luwuno anano i Midiani onaemo i Epa, i Eperi, i Heno, i Abida ka i Elida'a. Onaemo atuu luwuno inuleno i Ketura.

⁵ I Burahima weeakono luwu i Saki arataano,

⁶ sine a luwuno anano anu hinaweno inso a luwuno beine mongurano, ipoweeako ira ihi ngkae. Ka i'amba tempono onae da tuwu, itena ira melako inso i arono i Saki, anano, i sabaano oleo, i Wita Sabaano oleo.

I Burahima mate ka kinaburu

⁷ Tinuwuno i Burahima hawe asa etu pitu pulu ka olima nta'u,

⁸ ka i'amba tampula penaano. Onae mate i tempono moputeomo wuuno, mota'u ka tende ntinuwu. Onae pinumpu a uempu'uno.

⁹ Luwuno anano, i Saki ka i Sumaila, kumaburuo a laro ngkunepo Makapela, a lereno i Eperoni anano i Sohari, to Heti, lere anu po'iangano i sabaano oleo Mamere,

¹⁰ anu umariomo i'olio i Burahima inso a inuleno i Heti. I ra'aimo dokinaburu i Burahima ka i Sara, beineno.

¹¹ Mansano mate i Burahima, Ondae Ue Ala rumonsoo i Saki, anano. I Saki rodo mo'ia umpeda sumuru Lahai-Roi.

Inuleno i Sumaila

¹² Ndiomo inuleno i Sumaila, anano i Burahima, anu pine'anaakono i Hagari, beine to Masiri atuu, atano i Sara.

¹³ Ndiomo needo anano i Sumaila, pinau montonda potudano domehina: i Nebaioti, ana akano i Sumaila, tudano i Kadari, i Adibe'eli, i Mibisami,

¹⁴ i Misima, i Duma, i Masa,

¹⁵ i Hadadi, i Tema, i Yeturi, i Napisi ka i Kedama.

¹⁶ Onaemo atuu luwuno anano i Sumaila, ka onaemo atuu luwuno needo, montonda iniado ka montonda pekemaado, hopulu ka orua petewawa suku, singge mia saru sukuno.

¹⁷ Tinuwuno i Sumaila, asa etu tolupulu ka opitu nta'u. Onae tampula penaano, mate ka pinumpu a uempu'uno.

¹⁸ Inuleno mpo'iangario wita inso i Hawila hawe i Siuri, anu po'iangano i sabaano oleo Masiri te'aro i Asuri. Ondae rodo mpo'ia ntepopo'aro saru luwuno pepaekompodo.

I Esau ka i Yako pine'anaako

¹⁹ Ndiomo tutuluno inuleno i Saki, anano i Burahima. I Burahima hinao anano i Saki.

²⁰ Tinuwuno i Saki pato pulu nta'u, tempono i'alao i Ribeka, anano i Betueli, to Arami inso i Padana-Arami, pepaekompono beine i Laba, to Arami atuu, i'alao gagi beineno.

²¹ I Saki mekakaiakono beineno ndi Ondae i Ue, hangano beineno atuu biita nahi pe'ana. Ondae i Ue uminduo pekakaino, onaemo ka imentia i Ribeka, beineno atuu.

²² Sine anano a laro mpe'anakaano mambe ewa, ka ipotae, ”Tewala kanandio, tembio ka kupembasaio anu kanandio?” Ka i'amba lumako mesikeno ndi Ondae i Ue.

²³ Pau-Do i Ue ndi onae, ”Orua tongku a laro mpe'anakaamu, orua suku tongku ira mensua inso a laro mpe'anakaamu. Suku tongku anu asa ta lalu moroso sekonopo anu susua, ana anu te'aka ta gagi ata a ana anu uai.”

²⁴ Mansano haweakoomo tempono ta me'ana, lano ana indua anu kongko a laro mpe'anakaano.

²⁵ Anu amba-ambano meluarako, motaha-taha, asa ngkoroino kana lemba meloe anu mewulu. Onaemo pu'uno, ka inineeako i Esau.

²⁶ Umarino atuu meluarakoomo uaino; kaeno uminio tundono i Esau. Onaemo pu'uno, ka inineeako i Yako. Tinuwuno i Saki nomo pulu nta'u tempono dopine'anaako.

²⁷ Nana'ote orua atuu kolangka-langkaido: I Esau gagi asa mia anu pande mowemba, asa mia anu ineheno mo'ia i tonga mpada, sine i Yako onae asa mia anu modato peleluno, anu ineheno mo'ia a ngkema.

²⁸ I Saki mehohawao i Esau, hangano ineheno mongkaa bau pinongko'alano, sine i Ribeka mehohawao i Yako.

I Esau umasao te'akano

²⁹ I asa oleo i Yako tekonai hinao ninahuno, tempono i Esau hawe mompemokendo inso a mpada.

³⁰ Motae i Esau ndi Yako, ”Po'ineeomo kupongkaa tedei inso anu motaha-taha atuu, hangano mokendo aku.” Onaemo pu'uno ka inineeako i Edomi.

³¹ Sine, motae i Yako, ”Asao ari tia te'akamu ndi ongkue.”

³² Sumangki i Esau, ”Kitao, ongkue ilawu mate; hapa tuduno tia te'aka atuu ndi ongkue?”

³³ Motae i Yako, ”Pesumpa ari ndi ongkue.” Mesumpaomo i Esau ndi onae, ka i'asao tia te'akano ndi Yako.

³⁴ Ka i'amba i Yako moweeakono roti ka wua inahu motaha ninahuno atuu ndi Esau. Onae mongkaa ka mo'inu, ka i'amba mentade lumako. Kanatuumo i Esau nahi pelangkaio tia te'akano atuu.