Tegagia 24 - Wunta Mempori

I Ribeka gagi beineno i Saki

¹ I Burahima mota'uomo ka tende ntinuwu; Onae doronsoo i Ue a laro luwuakoano.

² Motaeomo i Burahima a atano anu lalu mota'u i laro rahano, anu pinoweeako pabawa a luwuno anu pine'ueno, ipotae, ”Moikoomo naaomo kaemu i totono puu mpa'aku,

³ ka kupo'ala sumpamu a nee-Do i Ue, Ue Alano asa wawo langi ka tolino, nine nahi komo'alaakono anaku beineno inso i olono ana beinedo to Kana'a i olono po'iangaku.

⁴ Sine, omue asalakono lumako i wita insoaku ka a mpe'etuku ka upo'alaakono beineno i Saki, anaku.”

⁵ Ipotae atano ndi onae, ”Tewala beine atuu nahi behe tumonda aku aiwa i wita andio, asalakonoke aku wawao anamiu mekule i wita insoamiu ueku?”

⁶ Sine, motae i Burahima ndi onae, ”Petangkoro, si wawao anaku mekule i ra'ai.

⁷ Ondae i Ue, Ue Alano asa wawo langi, Dopoboi akumo inso a rahado amaku ka inso i witado pepaekompoku, ka mepau Iramo ndi ongkue, saru mesumpa, kanandio, ’A inulemu Aku meweengakono wita andio.’ Ondaemo anu montena Mala'eka-Do melempa i aromu, ranta ka upokompo'alaakono inso i ra'ai beineno anaku.

⁸ Sine tewala beine atuu nahi behe tumondako, tepotolaakomo inso a mpesumpamu ndi ongkue andio. Butumo koa, anaku si wawao mekule i ra'ai.”

⁹ Ka i'amba ata atuu numaao kaeno i totono puu mpa'ano i Burahima, ueno, ka mesumpa ndi onae mongkona po'emano ueno atuu.

¹⁰ Ka i'amba ata atuu umalao hopulu unta inso a untano ueno, ka ilako saru mowawa mperupa-rupa sangka anu masuli olino, arataano ueno. Onae melungka te'aro i Arami-Mesopotamia a ngkotano i Nahori.

¹¹ Iparenta ira unta atuudo mpenggolontu i bungkuno kota atuu, umpeda asa sumuru uwoi, tamo ngkiniwia, tempodo beine mpeluarako mpontambu uwoi.

¹² Mepauomo, ”Ue, Ue Alado ueku i Burahima, Po'ineeomo Iweweu aku me'ura oleo andio, Ipopokitaomo pompehohawa-Miu ndi ondae ueku i Burahima.

¹³ Kanandio-andio ongkue mentade umpeda a mata uwoi, ka ana beinedo palilino kota andio mpeluarako me'aiwa mpontambu uwoi.

¹⁴ Po'ineeomo ka igagi kanandio: ana beine anu kutotowoakono pau andio, ’Tulungi aku lingkeo takeamu atuu, ka kupo'inu,’ ka isangki, ’Po'inumo, ka luwuno untamu mbo'u aku mopo'inu ira,’ onaemo anu pinakosi-Miu tiano ata-Miu i Saki. Kanandiomo aku tumo'orio, nine ipopokitaomo pompehohawa-Miu ndi ondae ueku.”

¹⁵ Napi umari mepau, haweomo i Ribeka anano i Betueli, ana ntamano i Milika, beineno i Nahori. I Nahori atuu pepaekompono i Burahima. I Ribeka mowawa takea a wawo oweano.

¹⁶ Ana beine atuu tedoa tekosi rupano, onae da ana beine, napi hori domedanggio tama. Onae metii a mata uwoi atuu umihiio takeano, ka i'amba mewuatako mbo'u.

¹⁷ Ata atuu melulu tepohaweakono ka ipotae, ”Tulungi aku poweeakune mo'inu tedei uwoi inso a ntakeamu atuu.”

¹⁸ Sumangki, ”Ipo'inumo ue.” Ipari-pario motiio takeano a ngkaeno ka ipoweeakono mo'inu.

¹⁹ Mansano umari moweeakono mo'inu ata atuu, ipotae, ”Tiado mbo'u luwuno untamiu aku montambu uwoi, ranta ka dome'umari luwu mpo'inu.”

²⁰ Ipari-pario tumawao uwoi inso a ntakeano a laro dula ka ipelulu mbo'u montambu uwoi a nsumuru; onae montambu uwoi tiado luwuno untano mia atuu.

²¹ Mia atuu mo'ia mekokoongakono ka ito'orio ba Doweweuo koa i Ue pelempano mehasili ke naahi.

²² Mansano luwuno unta atuu me'umari mpo'inu, mia atuu umalao tole-tole wulaa anu mobeano entonga sikala ka asa pasa mala-mala ngkae anu mobeano hopulu sikala wulaa,

²³ ka ipotae, ”Anano isemake omue? Ku'emao ka upauakune! Hinao po'iangake peratoamami a rahado amamu?”

²⁴ Isangkio, ”Amaku i Betueli, anano i Milika ndi Nahori.”

²⁵ Motae mbo'u ana beine atuu, ”Moiko seami ka kaangado pinotuwu hadio ndi omami, po'ianga mbo'u peratoa hinao.”

²⁶ Ka i'amba menggolontuomo mia atuu mesomba ndi Ondae i Ue,

²⁷ ka ipotae, ”Inunde-unde Iramo i Ue, Ue Alado ueku i Burahima, anu nahi Dopotolao pompehohawa ka petenunu-Do inso ndi ondae ueku atuu. Ongkue mbo'u Dotaate akumo i Ue a nsala lumako a rahado pepaekompodo ueku andio.”

²⁸ Ana beine atuu melulu, ka i'amba tumutuluo anu gagi atuu a mpe'asa rahano ineno.

²⁹ I Ribeka hinao pepaekompono tama meneeako i Laba. I Laba melulu meluarako tepohaweakono mia atuu a mata uwoi hieno,

³⁰ umarino kumitao tole-tole atuu ka mala-mala a ngkaeno pepaekompono, ka rumongeo pinauno i Ribeka, pepaekompono. ”Kanatuumo ipotae mia atuu ndi ongkue.” I tepohaweakono mia atuu, anu da mentade i horido untano umpeda mata uwoi atuu.

³¹ Ipotae, ”Aiwamo, omiu anu rinonso-Do i Ue, tembio ka upentade i bungkuno? Kupatindaomo raha po'iangamiu, ka po'iangado mbo'u untamiu.”

³² Ka i'amba mia atuu mewinso a laro raha. Lampido unta linohu, seami ka kaangado ta wineeako unta atuudo, ka uwoi pewo'ohi ngkaruno mia atuu saru luwuno mia anu perongano.

³³ Sine mansano pinatinda kaanga i arono, motaeomo mia atuu, ”Nahi aku mongkaa tewala napi kupohaweo pe'oliwi anu winawaku andio.” Sumangki i Laba, ”Pauomo.”

³⁴ Ka i'amba motae, ”Ongkue andio atano i Burahima.

³⁵ Ondae i Ue tedoa rumonso ira ueku atuu, ranta ka dogagi kaea. Ondae i Ue moweeako ira asa bawaa bembe bimba ka sapi, wulaa, ka salaka, ata tama ka beine, unta ka kalide.

³⁶ I Sara, beinedo ueku atuu, i tempono domota'u, dope'anaakonomo asa ana ntama, anado ueku atuu; a anado atuu ondae ueku meweengakono luwuno arataado.

³⁷ Ondae ueku atuu mo'ala iramo sumpaku, ’Nahi komo'alaakono anaku beineno inso i olodo ana beine to Kana'a, anu witado kupo'iangario andio,

³⁸ tendeano omue asalakono lumako a rahado amaku ka a nsukuku mo'alaakono beineno anaku.’

³⁹ Kusangki ira ueku atuu, ’Bara'ura beine atuu nahi behe tumonda aku.’

⁴⁰ Sine dopotae ndi ongkue, ’Ondae i Ue, anu i aro-Do kutuwu, Ira montena Mala'eka-Do kumongkomiko, ka Ira weweuo pelempamu mehasili, ranta ka upo'alaakono beineno anaku inso a nsukuku ka inso a rahado amaku.

⁴¹ Omue butu mokotola inso a sumpamu ndi ongkue, tewala omue hawe a nsukuku ka nahi domeweeakomu beine atuu. Butu onae atuu ka upokotola inso a sumpamu ndi ongkue.’

⁴² Ka oleo andio kuhawe a mata uwoi hieno, ka kupepau, ’Ondae i Ue, Ue Alado ueku i Burahima, tewala ipemoikoo weweuo pelempaa anu kutondao andio mehasili,

⁴³ Ikita akumo mentade umpeda mata uwoi andio, po'ineeomo ka igagi kanandio: Tewala asa ana beine meluarako ta aiwa montambu uwoi, ka kupotaeakono: Tulungi aku, poweeakune uwoi tedei inso a ntakeamu atuu aku mo'inu,

⁴⁴ ka isangki aku: Po'inumo, ka tiado luwuno untamu aku montambu mbo'u uwoi, ka onaemo beineno anado ueku atuu anu pinakosi-Do i Ue.’

⁴⁵ Napi umari kupepau i laro aroaku, i Ribeka aiwa mowawa takea a wawo oweano ka metii a mata uwoi atuu, ka i'amba montambu uwoi. Kupotaeakono: Tulungi aku poweeakune mo'inu.

⁴⁶ Ipari-pario motiio takea atuu inso a wawo oweano, ka ipotae: Ipo'inumo, ka luwuno untamiu mbo'u aku mopo'inu ira. Ka ku'amba mo'inu, ka luwuno unta mbo'u atuu ipopo'inu ira.

⁴⁷ Umarino atuu mesikeno aku ndi onae: Anano isemake omue? Isangki aku, ’Ongkue anano i Betueli, anano i Nahori. I Betueli atuu anano i Nahori ndi Mikali.’ Ka ku'amba mokonaakono tole-tole a engeno ka mala-mala a ngkaeno.

⁴⁸ Ka ku'amba menggolontu mesomba ndi Ondae i Ue, saru umunde-unde Ira i Ue, Ue Alado ueku i Burahima, anu tumaate akumo a nsala anu mentee, aiwa mo'alakono anado ana beineno pepaekompodo ueku andio.

⁴⁹ Kanandio-andio, tewala behekomiu mpopokitao pompehohawa ka petenunumiu ndi ondae ueku atuu, ipauakunemo. Tewala naahi, ipauakune koa mbo'u, ka kupewolili i koana ke i manggali.”

⁵⁰ Ka i'amba i Laba ka i Betueli sumangki, ”Luwuno andio tepu'u inso ndi Ondae i Ue; nahi kipolio mompau hapa mbo'u ndi omue moiko ke mosa'ono.

⁵¹ Kitao, i Ribeka kongko i aromu, alaomo ka lakomo, po'ineeomo i gagi beineno anano uemu, kana anu pinau-Do i Ue.”

⁵² Mansano rumongeo atano i Burahima atuu paudo, menggolontuomo ra'ino hawe a wita mesomba ndi Ondae i Ue.

⁵³ Ka i'amba ata atuu lumuarakono peramba-ramba wulaa ka salaka saru sangka, ka luwuno atuu iweeakono i Ribeka. Ipoweeakono koa mbo'u pepaekompono ka ineno luwuno sangka anu masuli olino.

⁵⁴ Umarino atuu mpongkaa ka mpo'inu iramo, onae ka luwuno mia anu perongano, ka mperato ira. Mo'oruno mpewangu ira ka motae ata atuu, ”Ipo'inee akumo mekule ndi ondae ueku.”

⁵⁵ Sine dopotae pepaekompono ka ineno i Ribeka, ”Po'ineeomo ana beine atuu ka ipo'ia saru omami, tedeinomo tehopulu oleo mbo'u, ka i'amba moikoomo ulako.”

⁵⁶ Sine isangki ira, ”Si me'onto aku, sekono Doweweuomo i Ue pelempaku mehasili; ipo'inee akumo lumako, ka kupekule ndi ondae ueku.”

⁵⁷ Dopotae, ”Moikoopo tompoboio ana beine atuu ka tomensikenoo.”

⁵⁸ Domempoboiomo i Ribeka ka dompotaeakono, ”Behekoke lumako meronga mia andio?” Isangki ira, ”behe aku.”

⁵⁹ Ka do'amba mebeheakono i Ribeka, pepaekompodo, ka anu mekakaakono lumako meronga atano i Burahima ka luwuno miano.

⁶⁰ Domeronsoo i Ribeka, dompotaeakono, ”Pepaekompomami, po'ineeomo ka ugagi mosowu-sowu hadiono, ka inulemu mpentorokio luwuno kotano iwalido.”

⁶¹ Ka i'amba i Ribeka saru luwuno atano beine mpepatinda, ka mpesawi a unta mentondao mia atuu. Kanandiomo iwawao ata atuu i Ribeka ka ipelempa mekule.

⁶² Kontongaano atuu i Saki aiwa inso a pepontuno sumuru Lahai-Roi. Onae mo'ia i wita Nege.

⁶³ Tamo ngkiniwia, i Saki kontongaano meluarako ta melempa-lempa i tonga mpada. Mansano mengkita ngkoraane, ikitao hinao ba opia unta me'aiwa.

⁶⁴ I Ribeka mbo'u mengkita ngkoraane ka mansano kumitao i Saki, onae mompari-pari metii inso a untano.

⁶⁵ Ipotaeakono ata atuu, ”Isemake tama atuu anu melempa itongampada te'aro ndi ontae?” Sumangki ata atuu, ”Ondaemo ueku.” Ka i'amba i Ribeka umalao petutuwino ka itutuwio rupano.

⁶⁶ Ka i'amba ata atuu tumutuluakono i Saki luwuno anu wineweuno.

⁶⁷ Ka i'amba i Saki wawao i Ribeka a ngkemano i Sara, ineno, ka i'alao gagi beineno. Onae ipehohawao i Saki ka i Saki tetarero, umarino mate ineno.