Tegagia 23 - Wunta Mempori

Mateno i Sara ka po'olia pekaburuano

¹ Sara tuwu i larono asa etu rua pulu ka opitu nta'u; kanatuumo melaino tinuwuno i Sara.

² Ka i'amba i Sara mate i Kiriati-Araba, onaemo Heberoni, i wita Kana'a, ka i'amba i Burahima aiwa sumabangio ka mengeseio i Sara.

³ Umarino atuu mentade i Burahima inso i horino beineno anu mate atuu, ka i'amba motaeako ira inuleno i Heti,

⁴ ”Ongkue andio mia hawe anu mo'ia sarai i olomiu. Impowee akumo pekaburua gagi tiaku i olomiu, ka kupokowawao wata ngkoroino beineku ka kumaburuo.”

⁵ Mesangki ira inuleno i Heti ndi Burahima,

⁶ ”Ironge kamimo, ue mami. Omiu andio asa petewawa langkai ndi omami, gagi ikaburuomo wata ngkoroido beinemiu a mpekaburua mami anu lalu moiko. Nahina maupo te'asa mia inso ndi omami anu nahi ta patindaakomiu pekaburuano, ka ikaburuo wata ngkoroido beinemiu.”

⁷ Ka i'amba menggolontuomo i Burahima i arodo inuleno i Heti, palilino wita atuu,

⁸ ka ipotae ndi ondae, ”Tewala impemoikoo kuwawao wata ngkoroino beineku ka kumaburuo, onaemo ka imeronge aku ka mentulungi aku umemao ndi Eperoni anano i Sohari,

⁹ ka iweeakune kunepo Makapela pine'ueno, anu po'iangano i tompano lereno. Moikoomo iweeakune saru olino buke gagi pekaburua pine'ueku i olomiu.”

¹⁰ I tempo atuu i Eperoni kongko i olodo inuleno i Heti. Ka i'amba sumangki i Eperoni, to Heti, ndi Burahima, anu domerongeo inuleno i Heti ka luwuno mia anu hawe a mpewowa langkaino kota,

¹¹ ”Naahi ueku, ironge aku. Lere atuu kuweeakomiu ka kunepo mbo'u anu i ra'ai kuweeakomiu. I arodo luwuno pe'asa tongkuku kuweeakomiu. Ikaburuomo wata ngkoroido beinemiu.”

¹² Ka i'amba menggolontuomo i Burahima i arodo palilino wita atuu,

¹³ ka ipotae ndi Eperoni, anu domerongeo, ”Tewala upemoikoo, ronge akumo: Aku umowahio olino lere atuu, tarimaomo inso ndi ongkue, ka ku'amba kumaburuo wata ngkoroino beineku i ra'ai.”

¹⁴ Sumangki i Eperoni ndi Burahima,

¹⁵ ”Ueku, ironge aku: asa mpo'ianga wita me'oli pato etu sikala salaka, hapamo pengkonaano atuu ndi omiu ka ongkue? Ikaburuomo koa wata ngkoroido beinemiu.”

¹⁶ I Burahima tumondao po'emano i Eperoni. I arodo inuleno i Heti, itimbao salaka tiano i Eperoni, montonda hadiono anu inemano, pato etu sikala salaka, kana pe'olia i olodo mia mpebalu-balu.

¹⁷ Kanatuumo lereno i Eperoni, anu po'iangano i Makapela isabaano oleo Mamere, lere ka kunepo anu ira'i saru luwuno keu a lere atuu, ka luwuno tida wita atuu,

¹⁸ melimba gagi i Burahima me'ueo, i arodo inuleno i Heti ka luwuno mia anu hawe a mpewowa langkaino kota.

¹⁹ Umarino atuu i Burahima kumaburuo i Sara, beineno, a laro ngkunepo a lere i Makapela, isabaano oleo Mamere, onaemo Heberoni i wita Kana'a.

²⁰ Kanatuumo lere saru kunepo anu kongko i ra'ai, melimba inso a inuleno i Heti ndi Burahima gagi kaburu pine'ueno.