Tegagia 16 - Wunta Mempori

I Hagari me'anaakono i Sumaila, anano i Burama

¹ I Sarai, beineno i Burama, nahina ana ipe'anaakono. Onae hinao asa mia atano beine meneeako i Hagari, to Masiri.

² Motaeomo i Sarai ndi Burama, ”Uto'orio, Ondae i Ue nahi Dopemoikoo kupe'ana. Pewowaliakonomo ataku atuu, bara'ura molalo onae aku mokompohawe ana.” I Burama merorongeakono pinauno i Sarai.

³ I Sarai, beineno i Burama, umalao i Hagari, atano, to Masiri atuu ka iweeakono i Burama, tamano ka igagi beineno. Tempo atuu i Burama mo'iaomo i wita Kana'a, i larono hopulu nta'u.

⁴ I Burama mewowaliakono i Hagari ka beine atuu mentia. Mansano tumo'orio i Hagari, nine onae mentia, ipe'uru-uruo ueno.

⁵ Motae i Sarai ndi Burama, ”Pompokongkodei anu pinemarasaiku andio onaemo salamu. Lano ongkue weeakomu ataku, sine da iaopo ito'orio, nine onae mentia, ipe'uru-uru aku. Po'ineeomo Ondae i Ue gagi Puu Mpobitara i oloku ka omue.”

⁶ Motae i Burama ndi Sarai, ”Onae atamu! Onae a laro mpabawamu. Weweuomo ndi onae hapa anu pinemoikomu.” Ka i'amba i Sarai mokonsiio i Hagari, ranta ka ipolai bintao.

⁷ Mala'eka-Do i Ue tepohaweakono i Hagari umpeda mata uwoi a nsala lumako i Siuri, asa mata uwoi i pada one.

⁸ Ipotae, ”Hagari, atano i Sarai, inso isuake omue ka isuake ba ulako?” Sumangki i Hagari, ”Ongkue molai bintao i Sarai, ueku.”

⁹ Ka i'amba Mala'eka-Do i Ue motaeakono, ”Pekulemo a uemu, po'ineeomo upinokonsii i totono pabawano.”

¹⁰ Mala'eka-Do i Ue motaeakono mbo'u, ”Aku weweuo inulemu tedoa hadio, ranta nahi pinokodoa hangano hadiono.”

¹¹ Motaeomo mbo'u Mala'eka-Do i Ue ndi onae, ”Omue kontongaamu mentia ka kome'anaako asa ana ntama. Konumeeakono i Sumaila, hangano Dorongeomo i Ue a laro tepokonsiimu.

¹² Onae ta gagi asa mia kana kalide mo'ila. Kaeno ta mo'ewai sompo mia ka kaeno sompo mia ta umewaio. Maupo isua ipo'ia i'ewaio luwu pepaekompono.”

¹³ Ka i'amba i Hagari pauo nee-Do i Ue anu mepau Iramo ndi onae atuu, ”Omiumo Eli-Roi.” Hangano ipotae, ”Mentee ntu'uke i ndi'ai kukita Ira umari-Do kumita aku?”

¹⁴ Onaemo pu'uno sumuru atuu nineeako Sumuru Lahai-Roi, anu po'iangano i olono Kadesi ka Beredi.

¹⁵ I Hagari me'anaakono asa ana ntama anano i Burama ka i Burama numeeakono nana'ote anu pine'anaakono i Hagari atuu i Sumaila.

¹⁶ Tinuwuno i Burama halu pulu ka onoo nta'u, tempono i Hagari me'anaakono i Sumaila anano i Burama.