Tegagia 15 - Wunta Mempori

Pedandia-Do Ue Ala saru i Burama

¹ Ka i'amba haweomo pau-Do i Ue ndi Burama a laro asa pongkita, ”Siimo doito, Burama, Ongkuemo kantamu; tambomu ta tedoa langkai.”

² Sumangki i Burama, ”Oo Ue Ala, hapake anu Komiu weeakune? Aku mate nahina anaku, ka anu ta me'ueo rahaku onaemo i Eliese, to Damasi atuu.”

³ Motae mbo'u i Burama, ”Omiu nahi poweeakune inule, ranta asa ataku anu ta gagi me'ueo arataaku.”

⁴ Sine, haweomo pau-Do i Ue ndi onae, kanandio, ”Mia atuu nahi ta gagi me'ueo arataamu, tendeano ana ngkoroimu, onaemo anu ta gagi me'ueo arataamu.”

⁵ Ka Do'amba i Ue wawao i Burama meluarako ka Dopepau, ”Pentombumo i langi ka doaomo anano wula, tewala upokodoao.” Mepau Ira mbo'u ndi onae, ”Kanatuumo te'ipua hadiono inulemu.”

⁶ I Burama me'ala-ala Ira i Ue ka Ondae i Ue mementeeo po'emano.

⁷ Pau-Do mbo'u i Ue ndi onae, ”Ongkuemo Ue, anu wawako meluarako inso i Uri-Kasidimi ka Kuweeakomu wita andio gagi tiamu.”

⁸ Motae i Burama, ”Oo Ue Ala, kana'umpeke aku tumo'orio, nine aku me'ueo?”

⁹ Pau-Do i Ue ndi onae, ”Alaa-Kune asa sapi waino tinuwuno otolu nta'u, asa bembe waino tinuwuno otolu nta'u, asa bimba lakino tinuwuno otolu nta'u, asa manu-manu wurokou ka asa anano manu-manu marapati.”

¹⁰ Luwuno atuu i'alao tia-Do i Ue ka ibansio gagi orua. Ka i'amba batu-batuno atuu inaao anu asa i horino anu susua. Sine, manu-manu atuu nahi bansio.

¹¹ Tempono dontetopa manu-manu mpongkaa bau i wawono bauno kondehora atuudo, isaari ira i Burama.

¹² Tamo sumoo oleo, i Burama tekoturi rodo. Ka i'amba wongi mpusu anu mongkokongiri metii tumutuwio.

¹³ Pau-Do i Ue ndi Burama, ”To'oriomo ntu'u nine inulemu ira megagi mia mehawe i asa wita, anu komba tiado, ka nine ira mempine'ata ka binobarasai i larono pato etu nta'u.

¹⁴ Sine tongku anu ta me'ata ira, Aku humukuo. Umarino atuu ira mpeluarako mpowawa arataa anu hadio.

¹⁵ Omue kolumako manangai ndi ondae uempu'umu ka kokinaburu tempono moputeomo wuumu.

¹⁶ Sine inule anu ko'opaa ira mpekule i ndi'ai, hangano mosa'ono poweweudo to Amori atuu napi inihii ranta kanandio-andio.”

¹⁷ Tempono sumoo oleo ka ipetii wongi-wongi, tengkitaomo api anu me'ahu ka pansona melanga telalo i olono batu-batuno bau atuu.

¹⁸ I Oleo atuu Ondae i Ue mowutu pedandia saru i Burama ka mepau, ”A inulemumo Kuweeako ira wita andio, mompu'u inso a ngkoro Masiri hawe a ngkoro Eparata, korono anu langkai atuu,

¹⁹ onaemo witado to Keni, to Kenasi, to Kadimoni,

²⁰ to Heti, to Perisi, to Repaimi,

²¹ to Amori, to Kana'a, to Gerigasi ka to Yebusi.”