Tegagia 12 - Wunta Mempori

I Burama pinoboi

¹ Mepau Iramo i Ue ndi Burahima, ”Lakomo inso i witamu, inso a mpepaekompomu ka inso a rahano amamu i wita anu Aku tumisoakomu.

² Aku weweuko gagi tongku anu langkai, rumonsoko, saru weweuo neemu telele, ka omue kogagi ronso.

³ Aku rumonso ira mia anu rumonsoko, ka tumotonaa ira mia anu tumotonaako, ka hangano omue luwuno suku i wawontolino ira mpohawe ronso.”

⁴ Ka i'amba lumakoomo i Burama kana anu pinau-Do i Ue ndi onae, ka i Lo'oti mbo'u metonda meronga onae. Tinuwuno i Burama pitu pulu ka olima nta'u tempono i pelungka inso i kota Harani.

⁵ I Burama wawao i Sarai, beineno, i Lo'oti, anano pepaekompono, ka luwuno arataa anu pinumpudo ka luwuno mia anu hinawedo i kota Harani. Ondae mpelungka melako i wita Kana'a, ka do'amba mehawe i ra'ai.

⁶ I Burama melempa lumaloo wita atuu hawe i asa po'ianga umpeda i Sikemi, a ngkeu tarabanti i More. Tempo atuu to Kana'a mpo'ia i wita atuu.

⁷ Tempo atuu Ondae i Ue mepopokita ndi Burama ka Dopepau, ”Wita andio Aku weeako ira inulemu.” Ka i'amba i tu'ai iwanguo meda pontunua pesomba ndi Ondae i Ue anu mepopokita Iramo ndi onae.

⁸ Ka i'amba inso i tu'ai onae melimba a mentorukuno i sabaano oleo Beteli. Ipasao kemano i olono Beteli i sumooano oleo ka kota Ai i sabaano oleo. Ka i'amba i tu'ai iwanguo meda pontunua pesomba ndi Ondae i Ue ka moboio nee-Do i Ue.

⁹ Umarino atuu i Burama melungka ka melempa motilalo lumako i wita Nege.

I Burama i Masiri

¹⁰ Tempono hinao mokoninggoa i wita atuu, i Burama lumako i Masiri ta mo'ia i ra'ai gagi mia hawe, hangano mokoninggoa i wita atuu mongkokodoito.

¹¹ I tempono onae ta mewinso i Masiri, ipotaeakono i Sarai, beineno, ”Kuto'orio, nine omue asa beine anu tekosi.

¹² Tewala domengkitako to Masiri, ira mpotae: Beineno atuu. Ka i'amba ira mpepate aku ka dompo'ineeko tuwu.

¹³ Potaemo nine omue uaiku, ka domengkita aku koa moiko hangano omue, ka ongkue pino'inee tuwu, hangano omue.”

¹⁴ Tempono i Burama mewinso i Masiri, to Masiri mengkitao nine beine atuu tedoa tekosi.

¹⁵ Luwuno anu langkai potorono ndi Pirao mengkitao i Sarai, ka do'amba me'unde-undeo i arono i Pirao. Beine atuu winawa a langkanaeno.

¹⁶ I Pirao tumotowoo moiko i Burama hangano beine atuu. I Burama mohawe asa bawaa bembe bimba, sapi, kalide lakino, ata tama ka beine, kalide waino ka unta.

¹⁷ Sine Ondae i Ue mompotii pohuku anu langkai ndi Pirao ka luwuno ihino langkanaeno, hangano i Sarai, beineno i Burama atuu.

¹⁸ Ka i'amba i Pirao moboio i Burama, ka ipotae, ”Hapake anu wineweumu andio ndi ongkue? Tembio nahi upauo nine onae beinemu?

¹⁹ Tembio ka upotae, ’Onae uaimu,’ ranta ka ku'alao gagi beineku? Kanandio-andio, ndiomo beinemu, alao ka lakomo!”

²⁰ Ka i'amba i Pirao parentao ba opia mia lumako wawao i Burama saru beineno ka luwuno arataano.