Tegagia 11 - Wunta Mempori

Menara i Babeli

¹ I'asa wawotolino horio asa koa pau ka mpekena luwu dompepau.

² Tempono luwuno mia mpelungka melako i sabaano oleo ka domehaweo lembono i wita Sineari, merodo iramo mpo'ia i ra'ai.

³ Singge mia motaeakono walino, ”Aiwa tompoweweu watu tela ka tomentunuo temomoiko.” Ka i'amba watu tela atuu domempakeo gagi watu ka tere gagi potakono.

⁴ Mpotae ira mbo'u, ”Aiwamo tompowangu asa kotato ka asa menara anu punsuno hawe i langi. Aiwamo tompo'ungke nee, kasi tontesiarawo i asa wawontolino.”

⁵ Ka i'amba Ondae i Ue metii kumitao kota ka menara anu winangudo anano mia atuu.

⁶ Mepau Iramo i Ue, ”Ondae andio asa tongku ka luwudo asa koa pepaudo ka ndio da pompu'uano usahado. Mompu'u kanandio-andio maupo hapa anu sinongkado, nahina anu nahi ira mpokogagio.

⁷ Laluopo Topetii ka Toposisinggeo paudo i ra'ai, ranta nahi dontepoto'ori mbo'u paudo.”

⁸ Kanatuumo Dosiarawo ira i Ue inso i ra'ai i asa wawontolino, ka mpenaa-naa ira mewanguo kota atuu.

⁹ Onaemo pu'uno kota atuu nineeako Babeli, hangano i tu'aimo Doposisinggeo i Ue pau i asa wawontolino ka insomo i tu'ai Dosiarawo ira i Ue i asa wawontolino.

Inuleno i Semu

¹⁰ Ndiomo inuleno i Semu. Tempono tinuwuno i Semu asa etu nta'u, orua nta'u umarino lolowi, onae hinao anano i Aripakasadi.

¹¹ I Semu tuwu lima etu nta'upo mbo'u, umarino hina i Aripakasadi. Onae mbo'u hinao ba opia anano tama ka beine.

¹² Mansano tinuwuno tolu pulu ka olima nta'u, i Aripakasadi hinao anano i Sela.

¹³ I Aripakasadi tuwu pato etu ka otolu nta'u mbo'u, umarino hina i Sela. Onae mbo'u hinao ba opia anano tama ka beine.

¹⁴ Mansano tinuwuno tolu pulu nta'u, i Sela hinao anano i Eberi.

¹⁵ Mansano tuwu pato etu ka otolu nta'u mbo'u, umarino hina i Eberi. Onae mbo'u hinao ba opia anano tama ka beine.

¹⁶ Mansano tuwu tolu pulu ka opaa nta'u, i Eberi hinao anano i Pelegi.

¹⁷ I Eberi tuwu pato etu ka tolu pulu nta'u mbo'u, umarino hina i Pelegi. Onae mbo'u hinao ba opia anano tama ka beine.

¹⁸ Mansano tinuwuno tolu pulu nta'u, i Pelegi hinao anano i Rehu.

¹⁹ I Pelegi tuwu rua etu ka osio nta'u mbo'u, umarino hina i Rehu. Onae mbo'u hinao ba opia anano tama ka beine.

²⁰ Mansano tuwu tolu pulu ka orua nta'u, i Rehu hinao anano, i Serugi.

²¹ I Rehu tuwu rua etu ka opitu nta'u mbo'u, umarino hina i Serugi. Onae mbo'u hinao ba opia anano tama ka beine.

²² Mansano tuwu tolu pulu nta'u, i Serugi, hinao anano i Nahori.

²³ I Serugi tuwu rua etu nta'upo mbo'u, umarino hina i Nahori. Onae mbo'u hinao ba opia anano tama ka beine.

²⁴ Mansano tuwu rua pulu ka osio nta'u, i Nahori, hinao anano i Tera.

²⁵ I Nahori tuwu asa etu hopulu ka osio nta'u mbo'u, umarino hina i Tera. Onae mbo'u hinao ba opia anano tama ka beine.

²⁶ Mansano tuwu pitu pulu nta'u, i Tera hinao anano, i Burahima, i Nahori, ka i Harani.

Tutuluno i Tera

²⁷ Ndiomo tutuluno soborino i Tera. I Tera hinao anano, i Burahima, i Nahori ka i Harani. I Harani hinao anano, i Lo'oti.

²⁸ Tempono i Tera, amano da tuwu, i Harani mate i wita hinaano, i Uri-Kasidimi.

²⁹ I Burama ka i Nahori, singge ira mo'ala beinedo. Beineno i Burama, onaemo i Sarai, ka beineno i Nahori, onaemo i Milika, anano i Harani. I Harani atuu, amado i Milika ka i Yisika.

³⁰ I Sarai bita, nahi pe'ana.

³¹ I Tera wawao i Burahima, anano ka i Lo'oti, ana'ueno, onaemo anano i Harani, saru i Sarai, ponino, beineno i Burahima, anano atuu. Onae melungka saru ondae inso i Uri-Kasidimi ira melako i wita Kana'a. Ka do'amba mehawe i kota Harani ka merodo i ra'ai.

³² Tinuwuno i Tera rua etu ka olima nta'u, ka onae mate i kota Harani.