Sepanya 3 - Wunta Mempori

Hukuno Yerusale 3:1-8

¹ Masola ntu'u, kota umewa ka mokoburu, kota anu bukeako pompokonsiia atuu!

² Onae nahi behe merorongeakono patudu ka nahi pomperio pongkuahako; onae nahi pe'ala-ala Ira i Ue ka nahi aiwa ndi Ondae Ue Alano.

³ Mia pinemota'udo i ra'ai onaemo singa anu mengaoli; luwuno puu mpobitarano onaemo serigala wongi anu nahi pobinta maupo hapa hawe mo'oru.

⁴ Luwuno nabino onaemo pompokomarisu ka mpo'ewai pedandia; luwuno sando mpesombano mokoburutio hapa anu mempori, pe'uru-uruo songka Taura.

⁵ Sine Ondae i Ue atuu moleo i tonga-tongano, nahi Dopoweweu anu mosa'o. Mo'oru me'eu mo'oru Ondae mompowee songka-Do; i tempono saba oleo nahi Dohori menaa-naa. Sine mia lambaha nahi ponto'ori mokoko'ii!

⁶ ”Kupokotampula iramo tongku; luwuno menara a nsiuno ropuomo. Kuperawo-rawoomo luwuno salado, ranta nahina mia telalo. Luwuno kotado ropuomo, ranta nahina mbo'u mia ke palilino.

⁷ Kupewowoloo: Manasa kanandio-andio onae ta doito ndi Ongkue; onae ta merioo pohuku. Luwuno anu Kuhukuakono nahi ta kumolupeo. Sine tendeano kogagi-gagino dompoweweu anu mokoburu.

⁸ Onaemo pu'uno, sikori Akumo a oleo Kugagi sakosii, kanandiomo pau-Do i Ue. Hangano, Kupo'asaomo aroa-Ku, Aku pumpu ira luwuno tongku ka poparentaa ka Aku umuwuo tekuda-Ku ndi ondae, luwuno tekuda-Ku anu tensila. Menteeano asa wawontolino ta pingko ikaano api mahakino aroa-Ku.”

Dandi tekaduduia 3:9-20

⁹ ”Menteeano, umarino atuu Aku balio wiwido luwuno tongku gagi wiwi anu morina, ranta luwudo mempoboio nee-Do i Ue, mpesomba ndi Ondae mperonga-ronga.

¹⁰ Inso i asatowano luwuno korono i Etiopia, luwuno mia anu mesombai Aku, bawaa-Ku anu ntetia-tia, ira mpowawa pesomba ndi Ongkue.

¹¹ Ia oleo atuu nahi komohawe mokoko'ii hangano luwuno pe'ewa anu wineweumu ndi Ongkue, hangano i tempo atuu Aku meliahako inso i tonga-tongamu luwuno miamu anu mpo'unde a laro pompelangka-langkai, ka omue nami komompelangka-langkai mbo'u torukuno anu pinokomempori-Ku.

¹² I olomu Aku mo'ineeo tuwu aasa bawaa anu tedoa motewe ka me'urumako. Ondae mpo'ungke pepekaduduiado ndi Ondae i Ue.

¹³ Toreano to Isaraeli atuu nahi ira mpoweweu anu mosa'o. Nahi ira mpegaupi ka a laro ngangado nahi ta hinawe elo pompopo'oo. Mentee ntu'u, ondae ira mengkana bimba anu mpongkuri ewo ka mpepombole nahina anu monsosanggoli.”

¹⁴ Peboo-boolimo, hei ana beine Sioni, peboo-boolimo, hei Isaraeli! Po'undemo ka mawongkomo tompaano aroamu, hei ana beine Yerusale!

¹⁵ Dotadiomo i Ue hukumu, Dowowangunsule iramo iwalimu. Ondae i Ue, Mokole i Isaraeli kongko i tonga-tongamu. Omue nahi kodoito mbo'u a masolaa.

¹⁶ Ia oleo atuu ta pinau ndi Yerusale, ”Siimo doito, hei Sioni! Si po'ineeo kaemu molema.

¹⁷ Ondae Ue Alamu kongko i tonga-tongamu; Ondaemo pongkiari anu mompowee ponangia. Domawongkoakomu saru buke po'unde. Dopokowo'ohuko a laro pompehohawa-Do, Ondae meboo-booliako pebooli mpo'unde hangano omue,

¹⁸ kana ia oleo tepotowoa langkai.” ”Aku tumadio masolaa inso ndi omue, ranta nami upontembi mbo'u motata.

¹⁹ Menteeano i tempo atuu Aku humuku ira luwu anu mokonsiiko, sine Aku kumaduduio anu pungku, pumpu ira anu ntesiarawo ka weweu ira anu pinokoko'ii gagi inunde-unde ka telele neeno i asa wawontolino.

²⁰ Ia tempo atuu Aku wawa komiu mpekule, ia tempo atuu Aku pumpu komiu, hangano Aku weweo neemiu gagi telele ka inunde-unde i olodo luwuno tongku i tolino saru wali mokomoikoo teweweumiu i arono matado,” pau-Do i Ue.