Sepanya 2 - Wunta Mempori

Petena ka dontepidi 2:1-3

¹ Impepumpumo ka inteporokomo, hei tongku anu nahi mpoto'ori mongkoko'ii,

² se'eluno napi pe'umbaako pompakosi ndi omiu, oleo anu telalo kana ota, se'eluno ihawe tekuda-Do i Ue anu tensila ndi omiu, se'eluno ihawe oleo pontekudaako-Do i Ue ndi omiu.

³ Ungke Iramo i Ue, oo luwuno mia anu me'urumako i wita anu weweuo songka-Do. Ungkeomo moleoa, ungkeomo pe'urumakoa; bara'ura komiu koa ntekadudui a oleo tekudaa-Do i Ue.

Pohuku a luwuno tongku 2:4-15

⁴ Hangano Gasa ta bininta ka Asikeloni ta gagi boni-boni; palilino Asidodi ta sinaari ntonga oleo ka Ekeroni ta rinongka.

⁵ Memasola komiu ntu'u palilino wita i wiwi ntahi, omiu tongku Kereti! Ndi omiumo pau-Do i Ue andio: Hei Kana'a, witado to Pelisiti! Aku mepateko, ranta nahina mbo'u palilimu.

⁶ Wita i wiwi ntahi ta gagi tongampada, po'iangado puu mpopakambi ka walado bawaano bembe bimba.

⁷ Wita atuu ta gagi tiado luwuno toreano suku Yehuda. Ira mpopakambi i ra'ai ka mpepombole a luwuno raha i Asikeloni tempono owowa oleo. Hangano Ondae i Ue, Ue Alado Ira mekakaako ira ka wali mokomoikoo teweweudo.

⁸ ”Kurongeomo pontetewehi inso a nto Moabi ka po'ani-anido inuleno i Amoni, kana'umpe domentetewehi ira bawaa-Ku ka me'unde-undeo koroido a witado bawaa-Ku atuu.

⁹ Onaemo pu'uno, Ongkue anu tuwu, kanandiomo pau-Do Ueno luwuakoano, Ue Alado to Isaraeli, menteeano Moabi ta gagi kana Sodomo ka inuleno i Amoni kana Gumora, onaemo gagi tongampada melaro rui, po'ianga pongkekea ohia, ka po'ianga boni-boni ranta nahina tampulaano. Luwuno toreano bawaa-Ku ira mpopomuru ndi ondae ka anu toreano inso a tongku-Ku ondae mpe'ueo.”

¹⁰ Ndiomo anu ira mehaweo gagi euno pompelangka-langkaido, hangano mpontetewehi iramo ka me'unde-undeo koroido a bawaa-Do Ueno luwuakoano.

¹¹ Ira medoito ndi Ondae i Ue, hangano Ira mokotampulao luwuno pinesombai susua i tolino. Luwuno tongku wita i wiwi ntahi ira mpenggolontu mpesombai Ira, singge mia inso a mpo'iangano.

¹² Omiu mbo'u, hei to Etiopia, komiu memate tetoboako ponai-Ku.

¹³ Ira tumaangakono kae-Do a utara, rumopuo Asuri, ka weweuo Niniwe boni-boni, mokari kana pada one.

¹⁴ I tonga-tongano ira mpepombole bawaano kondehora, luwuno rupano kondehora a ntobu; moiko manu-manu undani ke manu-manu koro ira mpewongi a luwuno untuno karu raha; manu-manu koa ta umu'uni a pentangoa, ka manu-manu paa-paa a mentoweano pewowa: Dopi keu arasino terongkaomo!

¹⁵ Onaemo kota anu mo'unde, palilino merodo ka anu motae i laro aroano, ”Butu ongkue anu kongko, nahina anu susua!” Onae gagiomo ntu'u po'ianga anu londa, pepomboleado kondehora mo'ila. Sompo mia anu lumaloo ta mesiili ka mekambe-kamberoako kaeno.