Sepanya 1 - Wunta Mempori

Puu mpau 1:1

¹ Pau-Do i Ue anu hawe ndi Sepanya anano i Kusi anano i Gedalia anano i Amaria anano i Hisikia tempono i Yosia anano i Amoni, mokole i Yehuda.

Pohukua a oleo-Do i Ue 1:2-18

² ”Aku rumoahio morina luwuakoano inso i wawontolino, kanandio pau-Do i Ue.

³ Aku rumoahio mia ka pinotuwu; Aku rumoahio luwuno manu-manu a laro meene ka bou a ntahi. Aku dumontai ira mia anu nahi tondao parenta-Ku ka mokotampulao mia inso i wawontolino, kanandiomo pau-Do i Ue.

⁴ Aku tumaangakono kae-Ku ndi Yehuda ka luwuno palilino Yerusale. Aku mokotampulao inso a mpo'ianga andio luwuno toreano Baala ka neeno sando mpesomba lahumoa i olodo luwuno sando mpesomba.

⁵ Aku mokotampula ira mbo'u anu mpenggolontu mpesombaio sorodaduno langi a wawo ato ka ondae anu mpenggolontu mpesomba, mpesumpa mpetenunu ndi Ondae i Ue, sine mpesumpa mbo'u a lahumoa Milikomi,

⁶ saru ondae anu mpebungkui Ira i Ue, anu nahi ungke Ira i Ue ke mo'ema pontiso-Do.”

⁷ Pomperodomo i aro-Do Ue Ala, hangano oleo-Do i Ue rangkuomo. Mentee ntu'u, Ondae i Ue mompatinda Iramo pesomba sinumbele ka mokomemporiomo luwuno inolu-Do.

⁸ ”A oleo pesomba sinumbele inso ndi Ondae i Ue atuu, Aku humuku ira mia pinemota'u, luwuno ana ntamado mokole ka luwuno mia anu mompokona sangka anu susua.

⁹ Ia oleo atuu Aku humukuo luwuno mia anu melonsokio montoweano pewowa ka buketiakono pobobarasaia ka pompopo'oo rahano uedo.

¹⁰ Ka a oleo atuu, kanandiomo pau-Do i Ue, ta teronge pebooli inso a Mpewowa Langkai Bou ka ponsabangia inso a Mpe'iniaa Sarai ka unino tehoa langkai inso a luwuno pongku wita.

¹¹ Ponsabangimo, hei palilino Nohu! Hangano luwuno puu mpebalu-balu pingkoomo, luwuno puu mpontimba salaka tampulaomo.

¹² Ia tempo atuu Aku paresao Yerusale saru mowawa pansona ka Aku humukuo luwuno mia anu bakuomo kana anggoro a wawo potonduano ka anu mepau i laro aroano: Ondae i Ue nahi Ira moweweu moiko ke moweweu mosa'o!

¹³ Arataa pompolido ta rinontu ka luwuno rahado ta gagi boni-boni. Ondae mpowangu raha sine nahi ira mpo'iangario; mpelere anggoro ira sine nahi ira mpo'inu anggorono.”

¹⁴ Oleo-Do i Ue anu mongkokongiri atuu rangkuomo, rangkuomo ka haweno magasi ntu'u! Tedoa mapari pebooli a oleo-Do i Ue! Puu mpetea mbo'u mpohio i oleo atuu.

¹⁵ Oleo atuu oleo tekudaa, oleo mosusaa ka masukaraa, oleo tekalea ka rodoa, oleo wongimpusu ka menggao-nggao, oleo menseru ka wongi-wongi,

¹⁶ oleo pompuuria tawuwua ka pohio mpetea a luwuno kota pekorahakoa ka a menara sompo siuno anu mantande.

¹⁷ Aku mompotii masusaa a mia, ka dompelempa kana mia morawu, hangano mentehala iramo ndi Ondae i Ue. Reado ta te'uwu kana pampawu ka haro kompodo te'uweti anu mokoburu.

¹⁸ Salaka ke wulaa nahi pokokadudui ira a oleo tekudaa-Do i Ue. Asa wawontolino ta pingko ikaano api mahakino aroa-Do, hangano matea, tendeano matea mongkokongiri pinotii-Do a luwuno palili i tolino.