Sakaria 9 - Wunta Mempori

LUWUNO PINAU ANU TA GAGI MONGKONA HAWE-DO I MESIA LAMORO 9–14 Pau-Do anu pabawa a luwuno tongku petengi-tengino Isaraeli 9:1-8

¹ Pau-Do anu pabawa. Pau-Do i Ue kongko i wita Hadaraki ka penaa-naaano i Damasi. Hangano ndi Ondaemo i Ue te'aroano matano luwuno mia, luwuno suku Isaraeli,

² kota Hamati anu metida saru onae, Tirusi mbo'u ka Sidoni, maupo kana'umpe pandedo mposongka.

³ Kota Tirusi mowangu rere benteno ka mohowu salaka kana awu wita saru wulaa kana rege a nsala.

⁴ Sine kanandio-andio, Ira umalao i Ue ka metadiakono rosono Tirusi a laro ntahi, sekono kota atuu ta kumaano api.

⁵ Kota Asikeloni ta kumitao, ka i'amba gagi doito; Gasa mbo'u, ka i'amba tedoa mondende; Ekeroni kanatuu koa mbo'u, hangano pomperorohino tedupaomo. Inso i Gasa ta tampula mokole ka kota Asikeloni nahi ta pino'iangario mbo'u.

⁶ I Asidodi ira mpo'ia inule mpesalo, ka pinerorohodo to Pelisiti Aku mokotampulao.

⁷ Aku metadiakono rea inso a ngangano ka mokoburua inso a olo ngisino. Ondae anu ntepo'ia ira megagi mia-Do Ue Alato. Ondae ira megagi kana aasa suku i Yehuda, ka to Ekeroni mbo'u gagi kana to Yebusi.

⁸ Aku mekema i raha-Ku gagi puu mpodagaido anu wela telalo; nahi ta hina mbo'u anu aiwa mokonsiio, hangano kanandio-andio Kudagaiakono mata-Ku Ongkue-Ku.

Hawe-Do Mokole Sintuwu 9:9-10

⁹ Peboo-boolimo temeroku, hei ana beine Sioni, peboo-boolimo, hei ana beine Yerusale! Kitao, mokolemu hawe ndi omue; onae moleo ka poponangi. Onae mauru ka mesawi a asa kalide, kalide lakino anu mongura.

¹⁰ Onae ta mokotampulao kareta inso i Eperai ka ngara inso i Yerusale; pana mpetea ta pinokotampula ka onae ta paleleo manangai a luwuno tongku. Wita pinabawaino ta tewile malua inso a ntahi hawe a ntahi ka inso a Ngkoro Eparata hawe a luwuno tompano tolino.

Isaraeli pinokomoiko 9:11-17

¹¹ Mongkona omue, hangano rea pedandia-Ku saru omue, Aku motola ira miamu anu mentinaha inso a ngkineke anu nahina uwoi.

¹² Pekulemo a ngkota bentemu, hei luwuno mia mentinaha anu buke pomperorohi! A oleo koa mbo'u andio Kupauakomiu: Aku moweeakomiu euno meluka mpendua!

¹³ Hangano, Yehuda Kupadiio ndi Ongkue kana wo'eno pana ka umihiiakono Eparai. Aku mesoeakono luwuno anamu, hei Sioni, a luwuno anamu, hei wita Yawani, Aku pakeko kana ponaino asa puu mpe'iwali.

¹⁴ Ondae i Ue Ira mepopokita ndi ondae, ka ana mpana-Do ta mompalari kana koliki. Ondae Ue Ala Ira puurio tawuwua ka lumako monsapoi a laro lompiu inso i selata.

¹⁵ Ondae Ueno luwuakoano anu dumagai ira ka ira mepingkoo saru mperawo-rawo ira watu pongkembi. Ira mempo'inu ka ira mpohohoi kana molanguako anggoro, lulua kana loea kodei ponsiwui, merano kana luwuno siuno meda pontunua pesomba.

¹⁶ Ondae Ue Alado, ia oleo atuu anu kumadudui ira, bawaa-Do, kana bawaano bimba. Ondae kana luwuno paramatano ramba-ramba ulu anu tesosangkilo i wita-Do.

¹⁷ Mentee ntu'u, tedoa moiko ka tedoa ira ntekosi! Mangalitau ntetiangi hadio hangano gandu ka ana beine hangano anggoro.