Sakaria 8 - Wunta Mempori

Tekaduduido to Isaraeli 8:1-17

¹ Haweomo pau-Do Ueno luwuakoano, kanandio,

² ”Kanandiomo pau-Do Ueno luwuakoano: Aroa-Ku tedoa mawongkoakono Sioni ka mawongko-Ku atuu tedoa langkai ndi onae.

³ Kanandiomo pau-Do i Ue: Aku mekule i Sioni ka Aku mo'ia i tonga-tongano Yerusale. Yerusale ta pinau Kota Metenunu, ka torukuno-Do Ueno luwuakoano ta pinau Torukuno Mempori.

⁴ Kanandiomo pau-Do Ueno luwuakoano: Ta hina mbo'u ue tama ka ue beine anu mentoro-ntoro a tanalapa i Yerusale, singge mia mo'ini tuko hangano tende ntinuwuno.

⁵ Luwuno tanalapano kota atuu ta bukeako ana ntama ka ana beine anu memawongko mpepalindo i tu'ai.

⁶ Kanandiomo pau-Do Ueno luwuakoano: Tewala i tempo atuu luwuno toreano tongku andio mpotae mongkona atuu tedoa kinohali-haliako, nde Aku koa mbo'u motaeke tedoa kinohali-haliako? Kanandiomo pau-Do Ueno luwuakoano.

⁷ Kanandiomo pau-Do Ueno luwuakoano: Menteeano, Aku kumaduduio bawaa-Ku inso i wita sabaano oleo hawe i wita sumooano.

⁸ Aku wawa ira mpekule, ka dompo'ia i tonga-tongano Yerusale. Ka ondae mbo'u ira megagi bawaa-Ku ka Ongkue ta gagi Ue Alado a laro mpetenunu ka menteea.”

⁹ Kanandiomo pau-Do Ueno luwuakoano, ”Pokorosoomo aroamu, hei luwuno mia anu lano rumongeomo pau andio, anu pinohawedo nabi, tempono i wineweu pondasino Raha-Do Ueno luwuakoano, ka iwinangu Raha Mempori atuu.

¹⁰ Hangano se'eluno tempo atuu nahina urado mia, ka pinotuwu mbo'u nahina urado. Mia anu meluarako ka mewinso nahi ta rodo hangano hinao iwali. Kuweweuo luwuno mia pada mpe'iwali.

¹¹ Sine kanandio-andio, nahi Kuweweu ira mbo'u toreano tongku andio kana tempo i ndi'ipua, kanandiomo pau-Do Ueno luwuakoano.

¹² Hangano, Aku morawo rodoa. Keu anggoro ta mewua, wita ta mehasili ka langi ta mompowee uwoi tontoruno. Luwuno atuu Aku weeako ira toreano tongku andio gagi tiado.

¹³ Tewala i ndi'ipua megagi komiumo totonaa i olodo luwuno tongku, hei suku Yehuda ka suku Isaraeli, kanandio-andio Aku kumadudui komiu, ranta ka imegagi ronso. Siimo doito, pokorosoomo aroamu!”

¹⁴ Hangano, kanandiomo pau-Do Ueno luwuakoano, ”Tewala i ndi'ipua montoo Akumo mompotii masolaa ndi omiu, tempono uempu'umiu mpokontekuda Aku, ka nahi Kupe'o'ole, pau-Do Ueno luwuakoano,

¹⁵ sine a tempo andio mepokule Aku, tinoo-Ku moweweu moiko i Yerusale ka a nsuku Yehuda. Siimo doito!

¹⁶ Ndiomo luwuakoano anu asalakono komiu meweweuo: Impepaumo tementee a mpe'asa miamiu ka impoputusimo songka anu moleo, anu mompokomanangai, a luwuno pewowa langkaimiu.

¹⁷ Si mposongka mosa'oa i laro aroamiu a mpe'asa miamiu kasi moruana mpesumpa nahi mentee. Hangano luwuno atuu Ku'o'aliaakono, kanandiomo pau-Do i Ue.”

Tempo puasa anu mowawa po'undea 8:18-19

¹⁸ Haweomo pau-Do Ueno luwuakoano ndi ongkue, kanandio,

¹⁹ ”Kanandiomo pau-Do Ueno luwuakoano: Tempo puasa a wula ko'opaa, wula ko'olima, wula ko'opitu ka wula kohopulu ta gagi po'undea ka mawongko ka gagi luwuno tempo porame-ramea anu mokomawongko ira suku Yehuda. Onaemo pu'uno kekewoiomo menteea ka sintuwu!”

Luwuno tongku umungke Ira i Ue 8:20-23

²⁰ Kanandiomo pau-Do Ueno luwuakoano, ”Ta gagi mbo'u nine luwuno tongku ka palilino hadio kota me'aiwa;

²¹ ka palilino kota anu asa ta lumako a mpalilino kota anu susua ka mepau, ’Aiwamo ka tomelako mpokomolusao aro-Do i Ue ka umungke Ira Ueno luwuakoano! Ongkue mbo'u aku lumako!’

²² Gagi hadio tongku ka sukuno tongku anu moroso ira me'aiwa umungke Ira Ueno luwuakoano i Yerusale ka mokomolusao aroa-Do i Ue.”

²³ Kanandiomo pau-Do Ueno luwuakoano, ”I tempo atuu hopulu mia inso a mperupa-rupa tongku ka pau ira me'inio moroso ntu'u tapuno lemba meloeno asa to Yahudi ka mpepau: Inehemami melako meronga saru omiu, hangano kimerongeomo, nine Ondae Ue Ala kumongkomi komiu!”