Sakaria 6 - Wunta Mempori

Pongkita ko'oalu: opaa kareta petea 6:1-8

¹ Mengkita aku mbo'u ngkoraane, ka kukitao opaa kareta petea meluarako inso i olono orua torukuno. Ka torukuno atuudo luwuno torukuno mala.

² Kareta amba-ambano irendeo ngara motaha, kareta ko'orua irendeo ngara mo'ito,

³ kareta ko'otolu irendeo ngara mopute, ka kareta ko'opaa irendeo ngara anu meboti-boti, luwuno memoroso.

⁴ Motae akumo a mala'eka anu mepau ndi ongkue, ”Hapake pengkonaano luwuno andio, ueku?”

⁵ Mala'eka atuu sumangki ndi ongkue, ”Luwuno andio mpeluarako a opaa siuno langi umarido mpe'aro ndi Ondae Ueno asa wawontolino.”

⁶ Anu rinendeno ngara mo'ito atuu meluarako lumako i Wita Utara; anu mopute atuu meluarako i bungkudo; anu meboti-boti atuu meluarako lumako i Wita Selata;

⁷ Luwuno ngara anu moroso atuu mpeluarako, marente ira melako mesompoo tolino. Mepauomo, ”Imelakomo mesompoo tolino!” Onaemo ka domesompoo tolino.

⁸ Ka i'amba mebooli ndi ongkue, ”Kitao, ondae anu mpeluarako melako i Wita Utara atuu ira mpokorodoo Penaa-Ku i Wita Utara.”

Ramba-ramba uluno sando mpesomba langkai ka i Tumba 6:9-15

⁹ Haweomo pau-Do i Ue ndi ongkue, kanandio,

¹⁰ ”Alaomo inso a arataano i Helidai, i Tobia ka i Yedaya, mia mentinadi anu mpekule iramo inso i Babeli. Lakomo oleo andio a rahano i Yosia anano i Sepanya.

¹¹ Alaomo salaka ka wulaa, weweuomo ramba-ramba ulu ka pokonaakonomo atuu a uluno Sando Mpesomba Langkai Yosua anano i Yosadaki.

¹² Pauakonomo: Kanandiomo pau-Do Ueno luwuakoano: Kitaomo, asa mia anu meneeako i Tumba. Onae ta mentumba inso a mpo'iangano ka wanguo raha-Do i Ue.

¹³ Onaemo anu ta wanguo raha-Do i Ue, ka onaemo anu ta mohawe pompelangkai ka ta mentoro moparenta a wawo ngkadera poparentaano. Ta hina asa mia sando mpesomba a wawo ngkadera poparentaano ka me'asa mpau manangai ta kongko i olodo.

¹⁴ Ramba-ramba ulu atuu ta gagi tondoni pepopoto'ori a raha-Do i Ue ndi Heleni, ndi Tobia, ndi Yedaya a pompehohawano i Yosia anano i Sepanya.

¹⁵ Mia inso i olaiano ira me'aiwa mpetonda mpowangu raha-Do i Ue. Ka komiu mento'orio nine Ondae Ueno luwuakoano anu tumena aku aiwa ndi omiu. Mongkona andio ta gagi, tewala mentee ntu'u imperorongeakono pau-Do i Ue, Ue Alamiu.”