Sakaria 3 - Wunta Mempori

Pongkita ko'opaa: sando mpesomba langkai Yosua 3:1-10

¹ Ka i'amba pinopokitaomo ndi ongkue sando mpesomba langkai Yosua mentade i arono Mala'eka-Do i Ue ka i Mosa'o mentade i koanano ta tumuntuo.

² Ka i'amba mepau Iramo i Ue ndi Mosa'o atuu, ”Ondae i Ue tekudaakomu, hei i Mosa'o! Ondae i Ue, anu binikio Yerusale, tekudaakomu! Kombake onae andio mia nahi me'ura anu pinadiiomo inso a api?”

³ Tempo atuu i Yosua mompokona sangka anu merege tempono ipentade i arono Mala'eka atuu,

⁴ anu motae ndi ondae anu mpekakaakono, ”Imelohuomo sangka merege atuu inso ndi onae.” Ka i'amba ndi Yosua ipotae, ”Kitao, saru andio ku'oniniomo salamu! Aku mokonaakomu sangka porame-ramea.”

⁵ Ka ku'amba mepau, ”Moikoomo peboo ulu mempori pinokona a uluno!” Ka do'amba mpokonao peboo ulu mempori a uluno ka mpoposangkao, kontongaano Mala'eka-Do i Ue mentade i tu'ai.

⁶ Ka i'amba Mala'eka-Do i Ue atuu mompowee pe'inia ndi Yosua, ipotae,

⁷ ”Kanandiomo pau-Do Ueno luwuakoano: Tewala omue tuwu montonda sala-Ku ka weweuo anggaa anu Kuweeakomu, omue komoparenta raha-Ku ka mekario kintala-Ku ka Aku moweeakomu po'ianga i olodo anu mpopekakaako i ndi'ai.

⁸ Rongeomo, hei sando mpesomba langkai Yosua! Omue ka wali-walimu anu mpentoro i aromu, mentee ntu'u omiu megagi aasa petondoni nine menteeano Aku tumenao tetenaa-Ku, Meneeako i Mentumba.

⁹ Hangano, kitaomo paramata anu Kupeweengakonomo ndi Yosua, asa paramata mensiu opitu, menteeano Aku moweweu nggori i wawono, kanandiomo pau-Do Ueno luwuakoano. Aku pahihio salano wita andio i larono asa oleo.

¹⁰ A oleo atuu, kanandiomo pau-Do Ueno luwuakoano, singge mia ta umoluo walino mentoro a ntoto ngkeu anggoro ka a ntoto ngkeu ara.”