Sakaria 2 - Wunta Mempori

Pongkita ko'otolu: asa mia mongura anu mo'ini koloro posongka 2:1-5

¹ Mengkita aku ngkoraane ka kukitao asa mia anu mo'ini koloro posongka.

² Ka ku'amba mesikeno, ”Omue kolumako isua?” Sangkino ndi ongkue, ”Lumako i Yerusale, kumitao ba'opia molueno ka ondauno.”

³ Kontongaano mala'eka anu mepau ndi ongkue atuu lumako i arono, lumakoomo asa mala'eka susua umpedaakono,

⁴ ka i'amba onae pinoweeako parenta, ”Pelulumo, pauakonomo mia mongura atuu: Yerusale ta pino'iangario kana kota nahi perere watu, hangano hadiono mia ka pinotuwu i larono.

⁵ Ongkue isa'a, kanandiomo pau-Do i Ue, ta gagi rere watu me'api lumimbuo, ka Aku gagi marambaa i larono.

Mia mentinadi pinoboi mpekule i Sioni 2:6-13

⁶ Hio, Hio! Pelulumo inso i Wita Utara, kanandiomo pau-Do i Ue, hangano te'aro a opaa mata angi Kusiarawo komiumo, kanandiomo pau-Do i Ue.

⁷ Hio! Pepotolamo lako i Sioni, hei omiu anu mpo'ia i Babeli!

⁸ Hangano kanandiomo pau-Do Ueno luwuakoano, anu a laro maramba-Do tumena akumo, mongkona luwuno tongku anu mpomuru komiumo, hangano isema dumanggi komiu, pengkonaano dumanggio ihi mata-Do.

⁹ Menteeano Aku tumandeo kae-Ku umewai ira, ka ondae ira megagi pomuruado mia anu hieno mpetuundu ndi ondae.” Ka komiu mento'orio, nine Ondae Ueno luwuakoano anu tumena aku.

¹⁰ ”Peboo-boolimo ka po'undemo, hei ana beine Sioni, hangano menteeano Aku hawe ka mo'ia i tonga-tongamiu. Kanandiomo pau-Do i Ue.

¹¹ I tempo atuu hadio tongku ira tepo'asaako Ira i Ue ka gagi bawaa-Ku ka Aku mo'ia i tonga-tongamiu.” Ka kotumo'orio nine Ondae Ueno luwuakoano anu tumena aku ndi omue.

¹² Ondae i Ue Ira umalao me'ueo Yehuda a wita anu mempori, ka Ira wali binikio Yerusale.

¹³ Penoro-noromo, hei luwuno anu tuwu i aro-Do i Ue, hangano mentade Iramo inso a mpo'ianga-Do anu mempori.