Sakaria 14 - Wunta Mempori

Ondae i Ue gagi mokole i Yerusale 14:1-21

¹ Menteeano, ta hawe oleono ndi Ondae i Ue, tempono pinomuru inso ndi omue ta tinia-tia i tonga-tongamiu.

² Aku pumpu ira luwuno tongku ka dompeteaakono Yerusale. Kota atuu ta pinongko'ala, luwuno raha ta rinontu ka luwuno beine ta pinewowaliako. Entonga inso a mpalilino kota atuu asalakono melako a pontadia, sine anu susuano inso a tongku atuu nahi ta pinokotampula inso i kota atuu.

³ Ka i'amba Ondae i Ue Ira lumako metea umewaio luwuno tongku atuu kana Dopetea a oleo peteaa.

⁴ I tempo atuu karu-Do ta melanda a pongku wita Saitu anu po'iangano tepo'aro saru Yerusale i sabaano oleo. Pongku wita Saitu atuu ta tebansi orua inso i sabaano oleo hawe i sumooano oleo, ranta ka igagi lembono anu tedoa molue. Asa ntia orua inso a pongku atuu ta mepahe i utara ka asa ntia oruano mbo'u i selata.

⁵ Komiu mempolai a lembono luwuno torukuno-Ku, hangano lembono torukuno atuu ta hawe i Asali. Komiu mempolai kana hori komiu mempolaiako lelu tempono i Usia, mokole i Yehuda. Ka i'amba Ondae i Ue, Ue Alaku, Ira hawe, ka luwuno mia mempori merongaako Ira.

⁶ I tempo atuu nahina wanta butu pompemorini ka baaku.

⁷ Sine ta hina asa oleo anu Doto'orio i Ue, nahina meene ke wongi, maupo i tempono wongi hinao wanta.

⁸ A oleo atuu uwoi tuwu ta waa inso i Yerusale, asa ntia oruano waa a ntahi i sabaano oleo, ka asa ntia oruano mbo'u a ntahi i sumooano oleo. Kanandiomo anu ta gagi i tempo motu'i ka i tempo morini.

⁹ Ondae i Ue Ira gagi Mokole i asa wawontolino. I tempo atuu, Ondae i Ue atuu asa ka asa koa mbo'u nee-Do.

¹⁰ Luwuno wita andio ta bali gagi kana lembono, inso i Geba hawe i Rimoni i selatano Yerusale. Sine kota andio ta kontasi-tasi ka kongko mpiha a mpo'iangano, inso a mpewowa langkai Benami hawe a mpo'iangano pewowa langkai tese'elu, onaemo pewowa langkai Siuno, ka inso a menara Hananeeli hawe a mpopuro'ia anggorodo mokole.

¹¹ Mia ira mpo'ia mpiha i ra'ai, hangano poropua nahi ta hina mbo'u, ka Yerusale ta rodo mpiha.

¹² Ndiomo pohuku-Do i Ue anu Ira humukuakono luwuno tongku anu meteaakono Yerusale: ihido ta gagi moboo kontongaado da mpentade, matado ta gagi moboo a laro bolono ka elodo ta gagi moboo a laro ngangado.

¹³ I tempo atuu ta gagi tewukaa langkai inso ndi Ondae i Ue i olodo, ranta singge mia uminio moroso kaeno pe'asa miano ka montande kae umewaio kaeno pe'asa miano.

¹⁴ Yehuda mbo'u ta metea umewaio Yerusale. Ka i'amba pinumpuomo arataado luwuno tongku a mpetengi-tengi: wulaa, salaka ka sangka, porokono tedoa hadio.

¹⁵ Pohuku kanatuu mbo'u ta umaluo ngara, bagali, unta, kalide ka luwuno pinotuwu anu kongko a laro luwuno pekemaado sorodadu atuu.

¹⁶ Umarino atuu luwuno mia anu tebinta inso i olodo tongku anu sumapoiomo Yerusale, ira me'aiwa mpenggolontu mpesombai Ira Mokole, Ueno luwuakoano a nta'u me'eu ta'u, ka ira mpokomaroao oleo langkai Laika Lewe Ngkeu.

¹⁷ Sine tewala inso i olodo luwuno suku i tolino hinao anu nahi aiwa i Yerusale ta menggolontu mesombai Ira Mokole, Ueno luwuakoano, manasa ndi ondae nahi ta metii usa.

¹⁸ Tewala sukudo to Masiri nahi dome'aiwa ka nahi dompe'aro, ndi ondae nahi ta metii usa. Ndiomo pohuku anu Do'aluako ira i Ue a luwuno tongku anu nahi aiwa mokomaroao oleo langkai Laika Lewe Ngkeu.

¹⁹ Onaemo pohuku a nto Masiri ka pohuku a luwuno tongku anu nahi aiwa mokomaroao oleo langkai Laika Lewe Ngkeu.

²⁰ I tempo atuu ta teburi a dio-diono ngara, ”Mempori ndi Ondae i Ue!” ka luwuno kawali a raha-Do i Ue ta kana luwuno loea kodei ponsiwui i arono meda pontunua pesomba.

²¹ Ka luwuno kawali i Yerusale ka i Yehuda ta gagi mempori ndi Ondae Ueno luwuakoano. Luwuno mia anu mompesombaako pesomba ta aiwa umalao ka numahuo i larono. Nahi ta hina mbo'u puu mpebalu-balu a raha-Do Ueno luwuakoano i tempo atuu.